Lab Made 分子雪糕專門店：秋山之行（一）：薯薯粟粟

入秋喺行山好季節，繼十月初倒行麥理浩徑，即喺晌麥理浩徑第10段由尾倒番轉行，今趟就再接再厲嚟新界西北再行過，因為住近西鐵入嚟依邊超方便。依次目標喺元朗大棠嘅楓香林，仲打算玩足全日，所以，中午由元朗大棠開始，經大欖自然教育徑，回走麥理浩第10段過屯門，因為天朗氣清，舒服怡人，行得爽啲。山徑出口位就喺屯門市中心，對住屯門市廣場，辛苦大半日，慰勞吓自己之餘，更順便補充一吓糖份，貪得意嚟到Lab Made，又睇吓有咩新意！

依間Lab Made有少量吧位，雖然唔多，大概8-9個，不過，食雪糕唔會太耐，人流快，唔介意稍等吓都會等到位。

Lab Made嘅雪糕比較溶得快，所以店面都有個溫馨提示，此外，佢哋堅持真正全天然，唔加人工穩定劑，除質量嘅保證之外，相信俾個信心食客，等大家食得安心啲。

雪糕每兩星期都會轉款，每次都有4款口味，定價為$39-$44，標明每杯1.5球，並且會列明有咩易引起過敏嘅成份，如雞蛋、奶製品、果仁……等等，減低過敏人士中招嘅風險，確喺細心周到。今期嘅4款口味：冰之粟一燒、薑汁蕃薯、薄荷朱古力脆脆及蜂蜜杏仁乳酪，由於前兩者都頗有特色，較為重「分子」意味，所以，就揀咗試依兩款。

晌等候嘅過程，見啲店員將啲材料攪呀攪，整呀整，加入液態氮，煙霧瀰漫，幾科幻感呀，轉眼就整好啲雪糕球喇。

冰之粟一燒 $44

聽店員過依個喺同卡樂B嘅合作，所以，就連個杯都貼咗「卡樂B粟一燒」嘅標籤，插住兩條粟一燒，又淋上少少焦糖漿，個賣相一身金黃。

唔單止個雪糕好重粟一燒味，味道喺甜中帶鹹，而且雪糕內仲有粟一燒碎粒，食落都仲脆口；因為粟一燒有一定厚度，所以，就算食到尾聲，除表面少少腍之外，咬落仲仍有香脆嘅口感，好有驚喜，俾人一種好搞嘢嘅感覺。

薑汁蕃薯 $44

薑汁蕃薯分子雪糕同樣都做得幾靚仔，雪糕唔喺一球球，而喺壓得滿滿一整杯，再以蕃薯蓉唧花，都幾有心思。雪糕主要喺得薑汁味，而蕃薯味則嚟自後加上面嘅蕃薯蓉，未有預期咁雪糕有薑味，又有蕃薯味；不過，較意外喺雪糕內仲混有薑糖，立時成件事又變得有趣咗。

最後，雖然12月初未喺大棠楓香林最盛嘅時候，但都想跟大家分享少少楓香（去完先知跟楓葉唔同）及沿途一啲植物嘅相片，部份都幾有趣。（註：小弟椰菜花、西蘭花就識，啲植物名事後問番熟知花花草草嘅表姨甥嘅！另外，楓香林喺晌12月6日拍攝。）

先嚟楓香林嘅相片：

再睇沿途一植物嘅相片：

雞冠花

大頭茶

白色簕杜鵑

紅木

是日嘅秋山之行仲未完，因買咗西鐵全日通，「專燈」坐西鐵落元朗食素作晚餐呢！

個人評分
味道：9/10
環境：7/10
服務：8/10
抵食：7/10
平均每人消費：HK$44

餐廳資料：

Lab Made 分子雪糕專門店
屯門屯隆街3號屯門市廣場1期3樓3219及3221號舖

聯絡電話欠奉