菲爾斯曲奇專賣店 Mrs. Fields Cookies：好友狂嚐曲（廿七）

老婆同樣都鍾意食曲奇，但凡事總有例外，依個「例外」就喺美式曲奇，一來佢覺得太甜，二來佢覺得美式曲奇口感軟腍腍，唔知點咁，古古怪怪，然而小弟就乜都啱，所以，好友所贈嘅菲爾斯曲奇就可以由小弟一人獨享。

因為喺作為聖誕禮物，友人非常有心思，連菲爾斯聖誕鹿禮物罐一併送上，可知，個禮物罐要另外花錢買，佢實在太客氣喇。

打開膠罐，內裡啱啱好裝到6塊菲爾斯曲奇，每塊以獨立紅紙袋包好；既然喺美式曲奇，特點就喺軟身煙韌，濃香偏甜，雖知道佢哋嘅曲奇都喺每日新鮮烘焗，食用期都喺得幾日，所以，我都要趁快食開始依次甜蜜煙韌之旅。

牛奶朱古力曲奇

牛油曲奇加牛奶朱古力粒嘅組合，簡單，基本，煙韌嘅曲奇富牛油香味，久唔久一啖半啖咬下朱古力粒，雖然甜膩，但好味。

草莓芝士蛋糕曲奇

屬於新口味，曲奇中有啲草莓粒，又有啲芝士粒，幾得意，幾特別，味道豐富。

白朱古力果仁曲奇

果仁曲奇一向喺曲奇嘅熱門之選，尤其果仁烘得夠脆嘅時，特別有果仁香，不過，白朱古力就唔喺好覺得有佢存在。

牛奶朱古力果仁曲奇

跟白朱古力果仁相類似，只喺改用上牛奶朱古力，果仁與朱古力並存，口感不俗，更覺好味。由於依款曲奇重複咗，所以，實際6塊曲奇，只有5款口味。

純朱古力曲奇

雖然叫純朱古力，其實只喺用咗啲半甜嘅朱古力粒，少甜之餘，朱古力粒比較醇甘。

再次多謝友人嘅聖誕禮物，雖然小弟無預備到禮物俾佢，但都祝福佢工作順利，生意蒸蒸日上！

個人評分
味道：7/10
環境：- /10
服務：- /10
抵食：- /10
平均每人消費：HK$0（禮物）

餐廳資料：
菲爾斯曲奇專賣店 Mrs. Fields Cookies
油麻地油麻地港鐵站YMT20號舖
2342 3317