奇華餅家 Kee Wah Bakery：秋山之行（二）：順道手信

行完山，又晌Lab Made食完分子雪糕，正離開屯門市廣場1期之際路經奇華，就順道打個白鴿轉，睇睇有咩零食、餅食之類可以買嚟送俾啲朋友。以賣唐餅起家嘅奇華，時至今日，啲產品已經好多元化，經常推陳出新，覺得佢喺間幾成功嘅本地餅家、本地品牌。

就嚟又到聖誕，作為一間商業品牌，又點會錯過依個黃金檔期吖。睇見一套3盒綠白紅小鐵罐嘅「聖誕節禮盒」（$135），各有唔同圖案，精緻討好，頗有聖誕佳節氣氛。 

打開後原來每罐有兩款唔同嘅奇華產品，即喺一共有成6款之多，又幾好喎，可以試到唔同嘅美點餅食。

綠罐

內有6塊「朱古力粒朱古力曲奇」及6塊「提子燕麥曲奇」（其實，透明膠包裝盒後都有列晒所有產品種類及數量），全部獨立包裝，幾衛生乾淨，又唔使一次過要食晒佢。前者曲奇朱古力味幾濃郁，又有啲朱古力粒粒混晌曲奇其中；而後者曲奇加咗提子乾及燕麥，粗糙有咬口，加上兩者都鬆脆度十足，好易一塊接一塊食唔停口。

 朱古力粒朱古力曲奇

提子燕麥曲奇

白罐
內裡嘅「手製南瓜籽脆糖」及「手製杏仁小紅莓鳥結糖」均各有10粒，同樣都喺獨立包裝，方便衛生。前者脆糖主要以南瓜籽做，酥脆得很，有麥芽糖香，但無過甜，好食；後者鳥結糖清甜煙韌，少少偏甜，當中嘅原粒杏仁好脆身，而小紅莓雖然每粒得少少，但酸香味突出。

手製南瓜籽脆糖 

手製杏仁小紅莓鳥結糖

紅罐
只有兩個「香芒金酥」及兩個「鳳梨金酥」，每個都好墜手。切開一試，兩者都填滿好多果蓉，前者芒果味唔算得好濃郁，但口感不俗，軟軟綿綿，而外皮烘得鬆化香酥；後者食到果蓉內有絲絲菠蘿肉，兼且都帶有幾清香嘅菠蘿味。

香芒金酥

鳳梨金酥

綠罐嘅曲奇及紅罐嘅酥餅作為下午茶就最好不過，而白罐嘅脆糖大可作為牙痕時嘅零食，所以，送禮自用兩皆宜。逛完屯門，都喺時候準備出發秋山之行最後一站，落元朗食晚飯，一張西鐵全日通，晌屯門、元朗遊嚟遊去，包埋輕鐵同K車，再返美孚，都喺$25，真抵呀！

個人評分

味道：8/10
環境：7/10
服務：7/10
抵食：7/10
平均每人消費：HK$45

餐廳資料：
奇華餅家 Kee Wah Bakery
屯門屯隆街3號屯門市廣場一期1樓1105號舖
2613 0822