藍海洋美食廣場 Ocean Blue Food Court：不值一洋

雖然居住香港幾十年，其實好多地方都未曾去過，就好似今日入到嚟嘅科學園，就喺小弟嘅第一次踏足，以往，都只不過喺坐車路過。點解今次入咗嚟，因為老婆教會搞咗個科學園半日遊，其實，主要喺入去科學園個美食廣場「Ocean Blue」食餐自助午餐，兼順道遊一轉科學園。

美食廣場食自助餐？無錯，平日佢就當然喺為附近所有寫字樓職員提供午餐嘅食晏地方，至於六、日，據知有時會被啲團體包場搞自助餐，小童、長者收$80，成人就收$148，當然，有教會少少補貼，實際唔使俾咁多，不過，收咁嘅價，又喺美食廣場嘅製作，可預期嘅質素會去到邊。

如果單講環境，其實幾舒服寫意，因為一邊對外都喺落地大玻璃窗，加上超高樓底，極盡開揚。不過，由於本身喺一個美食廣場，所以，座椅都喺回歸番美食廣場格局。事後先知，可以坐出面露天位，因為天氣清涼，坐出面就仲好。

平時食自助餐唔會點提及啲餐具，因為平常不過，無咩好講，但今次點都可以講兩句，第一句喺膠刀膠叉膠羹，第二句紙杯，貫徹美食廣場風格。服務亦都普通，有啲食物，尤其甜品，好快就無晒，亦見補充唔多。 

雖然我哋都有成過百人，但食物區就只有一頭、一尾兩個，都喺放同樣嘅食物，而且，擺放嘅地方唔多，食物嘅種類亦都少，質素普普通通咁啦，所以，標題先叫做不值一「洋」，真喺不值一揚。

先講吓有咩嘢食，餐廳尾一字長枱乜都睇晒，擺位絕對喺有位就擺，麵包旁你會見到一大盅木瓜雪耳糖水，而沙律旁又會有芝士蛋糕及三文治，一大櫃牛奶公司雪糕喺眾多小朋友嘅恩物。

餐包，喺啲港式西餐廳常見嗰款，唔好期望會喺暖嘅。依家，就連快餐店、茶記嘅牛油都用上獨立小盒裝，估唔到依度可以慳到就咁，幾大磚牛油就咁放喺度。餐包側有壺忌廉湯，質素喺點唔知，因為覺得頗普通，無飲。

沙律類，有一大盆蟹柳鮮果沙律，其次有啲沙律菜、紅腰豆、車厘茄、青瓜粒、粟米粒、烘麵包粒及芝士粉，再加兩兜「杰撻撻」嘅沙律醬及千島醬，此外，晌當中無啦啦又有一兜鴨腎，不過，味道又唔錯喎。

熱盤，連埋飯麵，都叫有12盆嘢選擇，感覺喺大路嘅菜式，又喺話好唔好，話差又未算咁囉！計有……，唔多講，有相有真相。

前後3碟熱盤就試咗大部份嘢，較為好食喺啲魚柳同茄汁醋扒，講到尾，都只不過喺快餐店嘅水平。

生果，只有木瓜及西瓜兩款，所以，選擇喺「食」同「唔食」。而甜品有一盅杰到不得了嘅木瓜雪耳糖水，削得緊要嘅芒果布甸，以及芝士蛋糕，期間出過啲泡芙及紅豆糕，仲有牛奶公司雪糕。當中，芝士蛋糕味道唔錯，不過，睇外觀，以透明膠紙包住，就肯定喺來貨。

最後都未夠飽，唯有食多一轉沙律菜配生果搭一「球」紅豆雪糕。

飲品，除有咖啡、奶茶（喺自沖茶包加花奶）之外，仲有疑似果汁先生嘅生汁，因為佢部機有「果汁先生」嘅標誌，但味道就肯定溝淡咗。

今次志在支持吓教會活動嘅場，對個自助午餐，本身一早無抱咩期望，所以，亦唔會有咩失望，篇食評，同樣都喺hea住寫，但喺，就真實反映番小弟對間餐廳出品嘅觀感。相信以咁嘅質素，都喺一次性生意，回頭客相信都無乜。

個人評分
味道：5/10
環境：8/10
服務：6/10
抵食：6/10
平均每人消費：HK$100（有教會補貼）

餐廳資料：
藍海洋美食廣場 Ocean Blue Food Court
沙田香港科學園科技大道西 8號尚湖樓地下S033-034號舖
2210 7022