上樓上就好好多，多張6人圓枱或4人方枱，較靜局，而且，嚟嘅人都喺斯文客，交談都唔會太嘈炒，更顯得清靜。一室以白色為主，加少少小型水晶燈，予人感覺爽朗。
午市主要供應套餐「行政午餐」，分頭盤（10選1）、主菜（17選1）、湯及甜品，包白飯一碗，定價為3道菜$198，而4道菜則$218，另收加一服務費，所以，晌度食個晏起錶價就二百多，非一般打工仔嘅選擇。
北芪黨參燉乳鴨
湯品嘅選擇喺十豆蟲草鬚湯或老火靚湯，咪以為後者喺普普通通嘅例湯，原來今日嘅老火湯喺「北芪黨參燉乳鴨」，一聽之下感覺喺咪好唔同呢。原盅清燉，還加了桂圓，呷一啖讓人潤澤無比，清甜醇厚，起首嘅「例湯」已經有種先聲奪人嘅姿態。
頭盤、主菜，我哋各人按喜好各揀一款，其實，每個類別都有咁多選擇，的確令人好易三心兩意！雖然有分話頭盤、主菜，但頭盤嘅份量亦只喺比主菜稍為細碟一啲，喺頭盤嘅煙燻乳鴿因只得半隻，才叫做明顯細份，所以，一個套餐都可以睇為「兩餸飯」啊！
清酒魚湯煮蜆魚湯加入點點薑絲，辟晒任何腥味，而魚味嚟得淡雅，唔會太過濃，又呷到少少清酒酒香；蜆隻肥大肉厚，味道鮮甜，吐晒沙，唔會食食吓巉口，而湯中仲有少少白蘿蔔條，清甜無渣。
龍井菊花煙燻乳鴿（半隻）
因為作為頭盤，所以，只得半隻。雖然乳鴿煙燻唔及酥炸咁脆口，不過，茶葉香氣清幽，乳鴿肉質嫩滑，亦帶有茶葉芳香，就算只喺食得一小件，都喺食得津津有味。
蝦油法國芥籽芥末拌鮮魷
蝦醬鮮魷就食得多，估唔到芥籽芥末拌鮮魷效果都好掂，鮮魷炒得好軟腍，而芥末味辛而不辣，點到即止，唔會好嗆喉。
店方上菜都頗快，除咗因為套餐嘅菜式有一定嘅規限範圍之外，其次，食客唔算多。頭盤一道接一道，好快又上埋主菜，雖然主菜共有17款選擇，但喺，其中有兩款（清蒸游水海斑及雞油花雕蒸花蟹配陳村粉）喺要額外加錢。
芥蘭頭抽炒和牛腩片小弟覺得依道菜最體現到佢用料精，因為啲芥蘭全部都喺最嫩嘅部位，翠綠爽脆，所切嘅長度均一；而牛腩片非常嫩口，又夠肉味，簡單以頭抽炒，真喺已經夠晒好食。
龍井煙燻米鴨配黑糖羅望子醬
主菜同樣多揀咗一道煙燻菜式，喺龍井煙燻米鴨，肉質當然以乳鴿滑嫩好多，但米鴨亦唔差，鴨肉軟腍細緻，沾一點黑糖羅望子醬，夾雜埋茶葉香，立時產生出化學作用，因為羅望子無酸梅咁酸，所以，淡酸醇甜中滲出幽幽茶香，細味先嗒出當中嘅味道。
魚湯腐皮浸時蔬
食咩都要有個平衡，加上同行朋友喜歡素菜多，一道魚湯腐皮浸時蔬就最好不過。魚湯晌先前一道清酒魚湯煮蜆已分享過，鮮腐皮有豆香，時蔬以白菜仔入饌，雖然加入幾片「油炸鬼」，依然喺一道好清淡嘅菜式。
子薑雪糕
甜品有生磨杏仁茶及是日甜品，本來都飽晒，其實都無打算叫，但老友話點都要試吓佢哋嘅自家製雪糕（桂花杞子雪糕、子薑雪糕），口味獨特，故此，就試了後者。子薑味十分突出而唔會太辛辣，有份醒神嘅感覺，不過，質感唔算軟滑。
大班樓果然有質素，雖然幾道菜都唔喺咩花巧嘢，但紮實嘅功夫，用料嘅堅持，喺可以食得到。最後，又喺老友做咗大斑，請我食依餐，要佢破費真喺唔好意思，同佢講好，下次由小弟付鈔，千祈唔好同我爭！
個人評分
味道：9/10
環境：8/10
服務：7/10
抵食：7/10
平均每人消費：HK$240
環境：8/10
服務：7/10
抵食：7/10
平均每人消費：HK$240
餐廳資料：
大班樓 The Chairman
中環九如坊18號地下
2555 2202
大班樓 The Chairman
中環九如坊18號地下
2555 2202
沒有留言:
發佈留言