香茶房 Kaorisabo：好友狂嚐曲（廿六）

自從年半前寫依個系列開始，不期然多咗收到朋友醒我嘅曲奇美食作為小禮物，亦間接讓小弟認識到更多唔同嘅曲奇品牌或小店，就好似今次介紹嘅「香茶房」，好陌生嘅名字，好低調嘅小店。

收到禮物時，食友無甚介紹，事後上其官網睇，始發覺喺一間食品店，專營日本茶葉食品，有日本茶葉、雪糕、卷蛋及零食……等等，甚至日本茶具、瓷器都有。

所獲送贈嘅喺一包曲奇，從官網所知，曲奇有3款味道：静岡焙茶曲奇、京都抹茶曲奇及北海道黑豆曲奇，每包裝有10塊，只含一款味道，塊塊均獨立包裝，不過食友知我心多，將後兩者曲奇溝勻俾我，等小弟可以一次試到兩款口味。

京都抹茶曲奇

據介紹，曲奇採用宇治山政小山園特上抹茶粉，雖然唔知其來頭，但特上即喺頂級，總之就靚材料嚟，點解咁講，因為一打個獨立包裝袋，色澤深綠，抹茶氣味濃郁幽香，味甘帶苦，充滿驚喜，鬆脆嘅口感，無疑喺高質素出品。

北海道黑豆曲奇

黑豆又如何？黑豆曲奇應該都喺第一次食，所以，極之有「新鮮」感，採用北海道黒豆，啲黑豆味幾重，做成曲奇，味道的確幾得意，唔食落口，仲以為喺伯爵茶或芝麻曲奇，因為餅身滿滿黑點。

睇成份招紙時，見到印有明愛天糧包餅工房，原來喺同社企明愛天糧合作，仲晌網頁標明用上日本特上食材、全手工製造、無色素、無香料、無防腐剤，值得多啲支持一下！

藉此再次多謝食友，讓我認識到香茶房依間日本食物小鋪，亦讓我有個美味嘅和風下午茶，可惜當時晌公司欠咗杯甘醇嘅綠茶。

http://www.kaorisabohk.com/

個人評分
味道：9/10
環境：- /10
服務：- /10
抵食：- /10
平均每人消費：HK$0（禮物）

餐廳資料：
香茶房 Kaorisabo
中環租庇利街 1號喜訊大廈 6樓601室
9531 0353