秋冬食煲仔飯喺常識吧，不過，早前朋友晌話晌香港地試過一款「暖意飯煲飯」，原個電飯煲捧上枱，好搞鬼，覺得新鮮有心思。暖意飯煲飯系列（$56-$58）有3款：粟米馬蹄咸魚茸豬肉餅飯、甜梅菜五花腩魚塊飯及窩蛋牛肉餅飯，包香茶一杯，話就話需時15-20分鐘，可惜小弟當晚被告知單多，要等45分鐘，唔等喺常理吧，所以，無奈只好有機會晌屋企自家整個住家版暖意飯煲飯！
其實無暖意飯煲飯都無緊要，因為晌眾多餐牌中仲有一款心水選擇，就喺「原盅燉湯」套餐，天寒地凍有啲燉湯落肚，寧捨暖笠笠。款式有蔘鬚杞子紅棗燉牛面肉、西洋菜南北杏燉豬小展及黨蔘杞子紅棗燉雞，款款賣$78，配一碗惹味鴛鴦臘腸飯及香茶一杯。雖然去到餐廳8:00pm都未過，竟然賣晒，可見個原盅燉湯套餐幾受歡迎。
由於燒味飯唔喺太想食，結果，就點咗一款巧手小菜，並且加錢變套餐。
茄汁西蘭花炒蝦球 $76
雖然試唔到個飯煲飯，又跟原盅燉湯無緣，但喺估唔到個炒蝦球幾得。墊底嘅西蘭花腍身得嚟仲帶少少爽，可謂熟透度啱啱好。而蝦球既大隻，又新鮮爽口，食得出唔喺雪藏貨色，隻隻蝦球都掛滿汁，至於個茄汁唔過酸，但又醒胃，兼且唔會有太多餘茨汁，恰到好處，甚有水準及鑊氣嘅小炒！
白飯、老火靚湯 +$11
是晚嘅老火靚湯喺青紅蘿蔔煲豬展，唔算有咩特別，平平穩穩，但白飯煮得軟綿有飯味，晌「山區」食到好嘅飯唔喺一件易事啊！
自家製紅棗桂圓茶 +$13
每一款滋潤熱飲單售要$25杯，但加配只需$13啫。比起咖啡、奶茶、華田之類，確喺滋潤健康之選。桂圓茶飲落幾舒服，口感潤澤，味道清香，又有唔少桂圓肉，豈止滋潤，啱晒我。
本身一支公食個套餐，有湯、有飯、有餸好夠飽，不過，阿姐推介佢哋啲糖水好靚，加配亦有優惠，見唔喺貴，又好耐無食啲傳統中式糖水，所以，揀咗一碗湯圓生磨腰果露。甜品定晌$22-$25唔算貴，而且全部都有「加配優惠」，大部份喺傳統中式，少部份喺新派港式。
湯圓生磨腰果露 +$20
生磨腰果露原價賣$22，加湯圓賣$25，但跟餐加配只需$20。入口腰果味好香濃，質感滑溜，又少甜，一客有5粒迷你芝麻湯圓，都只喺加多$3，非常之抵；而且，湯圓細細粒，皮薄煙韌，麻蓉香甜，與其周圍搵甜品食，就真喺不如晌度食埋先走。
巧手小菜款式其實都幾多，有成30多款，個人而言，定價覺得有點高，拍近一啲小型中菜館，配白飯加例湯又要額外加錢，不過，計及質素，以及環境、服務，其實，可以當喺去咗間菜館食飯。
個人評分
味道：8/10
環境：8/10
服務：7/10
抵食：7/10
平均每人消費：HK$120
味道：8/10
環境：8/10
服務：7/10
抵食：7/10
平均每人消費：HK$120
餐廳資料：
香港地 Hong Kong Day
大角咀海泓道1號奧海城三期UG65號鋪
2758 5228
香港地 Hong Kong Day
大角咀海泓道1號奧海城三期UG65號鋪
2758 5228
沒有留言:
發佈留言