2+2 Café：平2近人

雖然個人而言，都幾鍾意食自助餐，因為一次過由冷盤，大菜，甜品可以想試乜就試乜，想食幾多就幾多，完全唔使太多顧慮，不過，老婆「詐型」話我次次食自助餐都暴食暴飲，所以，都食少咗好多，下午茶自助餐更好耐無食添。今次，就趁過新年前嚟個最後一擊下午茶自助餐，帝都酒店嘅2+2 Café做緊主題「香芒燕會」下午茶自助餐，芒果一向啱晒小弟！

其實，本身幾鍾意食下午茶自勝餐，因為可以一餐頂三餐，通常有打算食下午茶自助餐時，早餐就會食晏啲，之後就一次過當晒午餐、下午茶及晚餐，再者，又以下午茶自助餐定價做得平易近人呢！

咪以為2+2 Café得入門口咁細，隔條扶手電梯另一邊仲有個用餐區，地方頗闊落，而大部份食物都放晒晌依邊，分咗多個區域，由沙律、麵包、餐湯、冷盤、凍海鮮、魚生、熱盤、粉麵檔、即製薄餅、串燒、咖喱、酥餅、甜品……，一應俱全。你話喺唔喺當埋午餐、晚餐都得呢！

沙律、冷盤、凍海鮮

小弟食自助餐有個慣性，就喺「沙律先食」，因為真喺幫助到消化、開胃，可以食多好多嘢。沙律吧及預製沙律分開咗兩邊擺，感覺有少許唔方便，不過，選擇唔少，一定可以組合到美味嘅心水沙律。此外，我又鍾意晌沙律之上加啲冷盤、凍海鮮，添加沙律滋味。

數款沙律菜，加啲粟米粒、煙肉碎、橄欖，淋少少意大利油醋汁，又添少少雜果沙律，糝少少芝士粉，再加埋凍甜蝦、青口，已經成為一碟清新味美嘅豐富前菜。讓胃納醒醒神、熱熱身，好繼續迎接美食。

麵包、餐湯

食太多凍嘢啲人話傷胃，所以，第二輪嚟個熱湯就最好不過；單飲湯就單調啲，加點麵包、熱食襯一襯喺咪有心思啲呢！餐湯一中一西，西湯嘅日式蟹肉配意大利菜湯不其然成為首選，嫌一般餐包太普通，近沙律吧嗰邊有啲特色點嘅三文治可供選擇；此外，熱盤類別中又有唔少細細件嘅小食。

日式蟹肉配意大利菜湯做得唔錯，蟹肉就唔太多，但個湯味道酸酸香香，好鮮活；啲油炸小食志在過吓口癮，但要推介喺另外兩款晌熱盤中攞嘅小食：燴雜菜粒燕窩酥盒及芒果蟹肉批，前者喺主題食物之一，外皮酥脆，有入燕窩自然秤高幾分；而後者好似蛋撻仔嘅蟹肉批，芒果味道突出，又食到絲絲蟹肉，正呀！

 日式蟹肉配意大利菜湯

燴雜菜粒燕窩酥盒及芒果蟹肉批

熱盤、咖喱、串燒、即製薄餅
以下午茶自助餐而言，依度嘅熱盤比預期多，而且唔喺馬馬虎虎嘅款式。單講熱盤，一列長枱已在十多款熱食，此外，仲有咖喱、串燒、即製薄餅、粉麵檔……等等多類熱食，想飽肚絕對唔喺問題。

我就鍾意樣樣執少少做個熱食拼盤，揀啲自己喜歡嘅食物。馬來牛肉沙嗲、馬來雞肉沙嗲、印式雞肉咖喱、燴豬柳、韓式泡菜安格斯牛柳炒飯、即製薄餅都喺小弟嘅心水，整體味道不俗，尤其啲沙嗲、咖喱同個炒飯，熱辣惹味。沙嗲因製作需時，現場即烤，頗搶手。

十多款熱盤當然試唔晒，另外，粉麵檔、魚生、丹麥酥餅……等等都無食到（只放啲相俾大家參考吓），因為相對依啲嘢，小弟更想留肚食甜品。

甜品

因為甜品真喺頗多選擇，中西皆有，要數真喺有排寫出嚟，除多款個裝蛋糕，又有幾款主題亮點甜品：燕窩蛋白蛋撻、焗芒果燕窩梳乎里，又有法式炸麵糰，以及一整櫃迷你件裝凍餅。

一口氣拎咗11款，有燕窩蛋白蛋撻、栗子撻、聖誕布甸蛋糕、雲石芝士餅、鮮檸檬撻、綠茶慕絲蛋糕、芒果蛋糕、法式炸麵糰、紅莓芝士蛋糕、咖啡蛋糕及紅莓奶凍（只憑記憶，可能名稱跟餐廳有出入）。依碟嘢喺一人份，即喺由小弟食晒，朋友都話我有啲誇，不過，好食嘅話要處理掉都只喺輕而「2」舉嘅事，確實，好幾款甜品都極有水準，就好似鮮檸檬撻，面頭焗蛋白好香脆，脆撻內嘅鮮檸檬醬酸香清新，而綠茶慕絲蛋糕嘅綠茶味好香濃，慕絲做得柔滑輕盈，仲有紅莓芝士蛋糕亦都出色，紅莓香味細緻。食完依碟甜品真喺夠晒皮，所以，都無試主題嘅焗芒果燕窩梳乎厘。

食甜點總唔可以少杯咖啡，餐廳飲品採自助形式，不過，都喺一般啡茶、檸水之類。小弟嘅鮮奶咖啡喺咖啡機出品，都唔錯啦，除非用上好差嘅豆啫，而枝裝汽水及生啤則要另外加錢享用。

依次嘅香芒「燕」會下午茶自助餐做到12月已經完咗，跟住落嚟好似會做芝士主題，有幾「芝」味要試過先知，不過，以今次嘅經驗，相信值搏率高，絕對試得過，成人$248一位，部份信用卡有8折優惠。

個人評分
味道：8/10
環境：8/10
服務：8/10
抵食：8/10
平均每人消費：HK$225

餐廳資料：
2+2 Café
沙田白鶴汀街8號帝都酒店3樓
2694 3886