麵飽王快餐餅店 Bread King：我的星期六美孚早餐 ~ 十年如一

好耐無寫過「我的星期六美孚早餐」系列，都應該隔咗大半年有多，皆因寫得八八九九，無試新店就費事寫。有朝幫襯居所附近嘅「麵飽王快餐餅店」，心血來潮又想寫吓，翻睇記錄，原來對上一次個食評已經喺3年前嘅事。

環境上，全無任何改變，一樣嘅枱，一樣嘅櫈，只喺牆上嘅「菜牌」底紙，由螢光黃變成螢光橙。幾塊掛晌牆上70、80年代嘅Vita贊助白膠板，仍然擔起佢哋嘅歷史任務。

當出面成日講點樣競爭大，要不斷求變，晌依度喺不變應萬變，3年前嘅早餐ABCD，3年後嘅早餐一樣都喺嗰4款ABCD。

早餐A $25

睇啲款式就知，佢哋嘅早餐喺好大路、好傳統嘅組合，我嘅早餐A，火腿通粉、西煎雙蛋，配熱奶茶，清淡嘅火腿通粉，煎過籠嘅西煎雙蛋，不過不失嘅熱奶茶，食嘅只喺一份懷舊嘅「味道」。

老婆一向講健康多過我，但今次佢竟然揀公仔麵餐，認真少有，其實，公仔麵餐（$28）比早餐（$25）仲要貴。

五香肉丁蛋麵餐 $28

正想搵吓啲五香肉丁喺邊，阿姐一句話晌晒下底，唔知喺恍然大悟，抑或喺估佢唔到嘅感覺。個公仔麵同樣普普通通，三幾粒五香肉丁跟一隻煎蛋，只喺喜歡佢加咗啲菜心而已。

對照兩次嘅食評，「麵飽王」真喺絕對無變過，環境依然喺咁殘舊，早餐ABCD依樣都喺嗰4個組合，其他嘢都一樣無變，唯一有變就只有價錢，有種時光停留嘅錯覺，真喺十年如一！

個人評分
味道：6/10
環境：6/10
服務：6/10
抵食：6/10
平均每人消費：HK$27

餐廳資料：
麵飽王快餐餅店 Bread King
美孚清麗商場地下6-8號
2745 5565