緣來素食 Destine Vegetarian Restaurant：秋山之行（三）：緣來，又幾好食！

由元朗行到過嚟屯門，晌屯門Lab Made小休兼食分子雪糕，逛咗陣屯門再搭番西鐵落元朗食飯，點解要專誠過嚟食晚飯，皆因老婆嘅同事介紹佢一間素食店：「緣來素食」，反正買咗張西鐵全日通，點搭都得。

嘩，未夠6:30pm，小店已坐滿人，店內確實地方淺窄，感覺真喺幾逼，不過，嚟得嘅人都喺志在食餐素，唔會吹水打牙骹，食完就走，故此，翻枱都快。整體環境裝修簡約，無咩神神佛佛嘢，而侍應勤快，招呼有禮。

今次點菜由老婆發辦，因為有同事推介，其實都已有心水內定。

等候上菜期間，先試試小食涼拌大豆芽，清爽味美。順帶一提，茶芥收$6位，另收加一服務費。

蟲草花燉原隻椰皇 $38

喺是晚必點推介嘅時令燉湯，雖然材料全素，但意外咁濃香清潤，撈幾撈就知有好多料，蟲草花、栗子、紅棗、冬菇、椰皇肉，認真超正，所以，我哋各人一盅，滋潤到底。

芝麻手撕雞 $28

雖然個樣似手撕雞，不過口感就唔多似，反而似啲無晒肥膏嘅日本肥牛，軟軟腍腍，本身無乜醬汁，只喺糝上芝麻，所以，勿期望好重芝麻香。

大漠羊肉串 $38

不論味道及質感，勁似羊肉串燒，只喺無羶味而已，最抵死喺又燒得焦香，猶出串燒肉，最重要個沙嗲醬真喺幾得，好有花生香。一客有成4串，抵食又好味，果然好介紹！

原隻南瓜黑松露焗飯 $88

個南瓜焗飯賣相好有睇頭，飯粒分明，飯內有素蝦、素丸，而且個白汁幾香，又有淡淡黑松露菌香，不過，食到中段就出問題。其一喺啲黑松露主要晌啲白汁度，所以，下底個朕焗飯無晒白汁就會無咁香，食到尾就更加唔覺；其二，唔知喺唔喺因為多數客人都喺較年長，所以，個南瓜似喺烚過或蒸過再焗，故此，南瓜肉較濕較腍，腍到好似南瓜蓉，瓜味亦淡，口感唔喺太好啫。

最後，仲有免費贈送嘅紅豆黑糯米，依款糖水我哋久唔久都有煲，因為夠簡單。紅豆起沙夠綿，黑糯米夠腍，又帶點煙韌，糖水內有少少椰奶香，兼且少甜，所以，食完唔使過去佳記，又可以慳番啲。

其實食素一向都唔喺平，加上我哋喺散嗌添，不過，其實店方都有推出2、4、6人自選套餐（$188、$348、$498），包小食、滋潤湯水、小菜或粉麵飯，真喺超值，只喺是日十五齋期，套餐暫停而已。

元朗返美孚，西鐵一程話咁快就到，亦都結束咗是日嘅元朗、屯門秋山之行。行咗成日，出咗身汗，又食得飽飽，好滿足！

個人評分
味道：8/10
環境：6/10
服務：8/10
抵食：8/10
平均每人消費：HK$133

餐廳資料：
緣來素食 Destine Vegetarian Restaurant
元朗建業街98號滿利大廈地下
3489 6428