餐廳佔商廈全層，一出電梯就喺，用餐區呈L形，室內環境相當之大，樓底又高，灰色雲石，深啡木枱襯綠色皮椅，無一般傳統泰菜館嘅感覺，型格得嚟仲有少少科幻感。靠落地玻璃窗一排位固然有街景睇吓，感覺好啲，不過，最裡面幾張卡位，因為挨背夠高，私隱度亦好啲。
餐廳中央位置放有多款新入貨嘅海鮮，如：大元貝、貴妃蚌、大魷魚、虎蝦……等等，最啱做炭燒菜式，一嚐食材真味。
例行公事，梗先翻一翻餐牌，大概了解吓有咩選擇。由沙律、頭盤、肉類、海鮮、湯類、蔬菜、粉 / 飯、飲品及甜品，基本上一應俱全。雖話位處尖沙咀，但定價又唔算貴喎，好似頭盤咁，除泰式生蝦、螄蚶、拼盤外，大部份都喺五、六十有交易，肉類都唔過百，而飯麵都喺六、七十搞掂，實屬相宜。
先嚟幾款飲品，朋友揀嘅椰青（$38），評語喺冰涼清甜，而椰汁冰（$20）或許有人覺得普通，但喜愛椰香嘅朋友，就會覺得濃香好飲。小弟就較愛晌秋冬滋潤嘅感覺，所以點一杯龍眼冰（$38），透徹嘅糖水少甜，龍眼肉又有健脾胃之效。題外話講開，侍客嘅暖水唔喺普通開水，而喺香茅茶，滲有淡淡香茅味。
椰青（$38）
椰汁冰（$20）
龍眼冰（$38）
泰式生蝦 $108賣相吸引嘅泰式生蝦，一客有8隻，泰式生蝦最緊要趁凍食，店員溫馨提示過生蝦上嘅泰國辣椒都幾辣，所以，夾埋塊生蒜片，沾少少秘製泰醬食就可以喇。蝦肉鮮甜爽口，泰醬辣得嚟有點點青檸香，刺激開胃。
刺身
印象中真喺好少泰菜館有刺身供應（生蝦除外），因為要攞個刺身牌先可以賣魚生，但一次過又泰菜，又魚生，可謂雙重滋味。由於佢哋唔喺壽司鋪、魚生店，所以，所有刺身種類都視乎當日有咩新鮮貨返，我哋就選咗原條鱲魚、蟶子及帆立貝嚟做刺身，而數量多少隨意！
原條鱲魚刺身 $258
原條上比起得幾片當然好有睇頭啦，魚鱗閃爍，眼珠清澈，大抵喺新鮮度嘅佐證，而刺身切得既薄又均一，師傅手勢無欺場，最重要都喺魚鮮味甜，雖附有秘製泰式醬汁，可以有另一番滋味，但稍嫌易冚過魚嘅鮮味，所以，後尾幾片沾些少醬汁提味就夠。
蟶子刺身 $35 / 隻
估唔到兩隻蟶子都做到咁多，切成粗條，鮮嫩有咬口，因為蟶子較味淡，依個就不妨蘸泰醬同吃。
帆立貝刺身 $34 / 隻
睇見啲帆立貝（帶子）雪白肥美，已經好想一啖咬落去。帆立貝非常厚肉，入口爽嫩鮮甜，同樣，沾少少醬油已能盡嚐鮮味。
沙爹串燒 $58（半打）/ $98（一打）
泰菜常有嘅沙爹串燒晌度當然都唔少得啦，同樣有雞、牛、豬可揀，最正路就喺3款都要晒。雖然肉嘅質素算唔上好高，但串燒帶點炭火香，又有啲焦燶位，自家炒製嘅沙嗲醬亦不俗，所以，都夠惹味。
燒貴妃蚌 $35 / 隻
海鮮吧中嘅蟶子就選擇做刺身，但貴妃蚌還是炭燒好，相信喺新鮮貨式關係，貴妃蚌有海水嘅鹹鮮味，而且蚌肉大而厚身，不過，個人覺得可能燒烤嘅時間長咗啲，蚌肉有些微韌。
冬蔭功海鮮湯 $58（小）/ $98（大）
千呼萬喚始出來嘅冬蔭功海鮮湯，一湯鮮紅，辣度果然唔喺流，但鮮辣酸香，十分醒胃。湯中有青口、魷魚、鮮蝦、草菇……等等，比起普通嘅冬蔭功湯（小$48 / 大$88），有咁多海鮮料都喺加多$10啫，無乜理由唔要有海鮮嘅冬蔭功湯囉！
泰式炒椰苗 $58
蔬菜類選擇唔多，得通菜、芥蘭、椰菜苗及雜菜4款，以椰菜苗較特別少少。椰菜苗口感爽爽脆脆，味道鹹鹹香香。
泰式海南雞 $70（半隻） / $140（全隻）配雞油香飯 $18（6粒） / $36（12粒）
其實對一粒粒波嘅雞油香飯唔陌生，晌馬六甲嘅雞場街，就有間叫「古城雞飯粒」賣出名嘅白切雞及波飯。對比起新加坡嘅海南雞，最明顯就喺泰式海南雞單一啲只跟一款泰式醬汁。然而，啲雞肉挺嫩滑，雞皮亦處理得幾爽口，皮下脂肪又唔太多，水準不賴。至於啲「波仔飯」，搓得緊緻唔鬆散，蘸醬汁，既有點雞油香，又有酸辣味，感覺好唔錯。
今晚試咗唔少菜式，刺生嘅質素確喺唔錯，部份泰式餸菜亦不俗，既然位處晌尖沙咀，撇除一啲刺身、海鮮類，大部份菜式定價唔高，真喺幾適合一大棚人嚟食飯高興吓。
個人評分
味道：7/10
環境：8/10
服務：7/10
抵食：8/10
平均每人消費：HK$290
味道：7/10
環境：8/10
服務：7/10
抵食：8/10
平均每人消費：HK$290
餐廳資料：
泰園
尖沙咀金馬倫道23-25A金馬倫廣場2樓A號舖
3746 9966
沒有留言:
發佈留言