Honey Creme：甜酒遇著韓乳

雖然天氣開始轉冷，但天寒地凍食雪糕，又別有一番滋味。今晚，趁收工過嚟Honey Creme再嚐蜂巢雪糕，咁有興緻皆因推出秋冬限定新口味：百利甜酒 x 韓國牛乳軟雪糕，自不然貪新鮮，一試「酒後」嘅蜂巢雪糕。

櫥窗嘅紐西蘭國家認證100%純天然頂級優質蜂巢及七彩繽紛、五顏六色嘅「雪糕筒樹」依然咁搶眼。天冷啲牛乳軟雪糕無溶得咁快，所以，揀食雪糕筒都喺個好選擇。不過，小弟都喺鍾意杯裝，影相方便，食又方便啲嘛。

新口味百利甜酒系列，共有兩款味道：Baileys Original Almond Chip（百利甜酒杏仁脆片冰淇淋$46）及Baileys Espresso Tiramisu（百利甜酒意大利芝士餅冰淇淋$54）。

不過，鍾情佢啲蜂巢，所以，問吓可唔可以加蜂巢，因為記得最初到訪時，佢哋希望味道夾啲，融和啲，唔容許亂加配料，即喺焦糖爆米花口味唔可以加蜂巢，濃縮咖啡口味又唔可以加有機混和穀粉。但可能知道香港人口味古靈精怪，今次再訪就已經放寬，就可以左配右搭。

Baileys Original Almond Chip $46 + 蜂巢 $10

多多少少都為件蜂巢而嚟，又點可以錯過，今次仲剛啱開盒新嘅即切，當然，佢哋啲蜂巢雪糕流量咁快，粒粒都喺「新鮮」貨色。

百利甜酒會沿雪糕坑紋徐徐流下，所以，由頭食到尾都嗒到醇香酒味，百利甜酒加綿密細滑嘅牛乳雪糕，豐厚濃郁伴有少少酒香，真喺幾夾，除非你本身唔鍾意酒味啫。之不過，啲酒最後都會沉晒底，略為重酒味，加上雪糕都較快溶，所以食到尾變咗少少奶昔咁款，加埋甜酒，哈哈，可以一飲而盡。此外，加上大量香脆嘅杏仁片，又香又脆又增加咗個咬口感；另外，因為件蜂巢喺額外後加，唔會太受啲酒味影響，一如既往，閃亮嘅蜂巢入口煙韌，蜜潤清甜，咬落無渣。

Baileys Espresso Tiramisu $54 + 長崎蛋糕 $6

依個意大利芝士餅版本做法可麻煩得多少少，既以手指餅墊底，又要糝上唂咕粉，加埋百利甜酒、杏仁片，食落口感複雜多變，尤其喺最尾手指餅浸滿甜酒，配合埋啲軟滑雪糕，都有少少喺食緊意大利芝士餅「提拉米蘇」嘅錯覺。額外再加長崎蛋糕，志在滿足吓口腹而已。Honey Crème嘅雪糕都做得頗大杯，所以，一個人食一杯絕對好滿足。

香港嘅秋冬季好短，好快冬去春來，唔知會唔會又有新限定口味呢！？

個人評分
味道：8/10
環境：7/10
服務：8/10
抵食：6710
平均每人消費：HK$58

餐廳資料：
Honey Creme
銅鑼灣利園山道34號地下
3525 1564