酥皮叉燒餐包 $13.8
大大個，漲卜卜，不過餡料好少，而且嚟到都唔熱，唔似即叫即做，幸而味道唔錯，外皮酥脆。對上一次嚟都有叫，簡單嚟講，就喺迷你「菠蘿叉燒包」。
三式腸 $19.8
即喺一碟腸粉有齊蝦腸、牛腸及叉燒腸，適合多心嘅人又或鍾意唔同口味嘅家庭，唔使叫幾碟腸粉咁多。雖然腸粉皮拉得有啲厚，但尚算滑溜，又無話太削，餡料又落得足，無欺場。
鯪魚球灼西生菜 $19.8
老婆同姨仔一向最鍾意食菜，當然依個加埋鯪魚球嘅西生菜就更啱晒大家。估唔到啲鯪魚球幾夠味，有蔥香，又有陳皮香，口感爽彈，意外哋咁好。
甘筍汁流沙包 $9.8
屬優惠美點，只賣$9.8一籠，仲要喺流沙包，點都要嗌番一籠。橙黃色嘅包身，幾養眼，又夠軟熟，咬開流沙澎湃，有鹹蛋黃香，不過無乜甘筍味喎。
鹹水角拼春卷 $13.8
雖然油炸點心香口好味，但疑於唔多健康嘅原因，有依個雙拼可以點少一碟就有兩款炸嘢點心食。春卷普普通通，夠香夠脆都收貨；鹹水角亦都唔差，外皮雖有少少厚，但咬落煙糯唔太黏牙。
海蝦肉丸粥 $19.8
晌酒樓，平時皮蛋瘦肉、柴魚花生就食得多，見有個海蝦肉丸粥就不妨試一試。粥底幾綿，4粒豬肉丸加2隻海蝦，算唔失禮架。豬肉丸幾彈牙，海蝦就唔得，未去殼，食起嚟啲啲麻煩，最弊喺唔多爽。
滋補藥膳雞腳 $12.8
依個雞腳就差少少，雞腳本身有啲甩皮甩骨，藥味又頗淡口，只喺因為食得多豉椒鳳爪先改一改試吓個藥膳雞腳。
沙嗲金錢肚 $19.8
金錢肚炆得好腍又入味，沙嗲汁又惹味，但咪睇佢好似好大碟，下面墊咗炸魚片，第一眼仲以為喺豆腐，比起上次墊蘿蔔大手筆咗。
香煎地瓜餅 $13.8
一向都甚好蕃薯，有時烚蕃薯食都可以當到一餐。個地瓜餅口感唔得，入口有少少硬實，而且蕃薯味好弱，唔值得叫。
鬆軟叉燒包 $13.8
舅仔好鍾意叉燒包，當然點一籠俾佢啦。不過，漏咗單，追完又追，最遲嚟就喺籠包，認真慌失失。而個包包身確喺幾鬆軟，叉燒餡亦唔少，調味不俗，最緊要上到枱時熱辣辣，中式包點咁先好食。
計埋早茶$6位，另收加一，埋單唔使兩舊水，坐足兩粒鐘，一家人閒話家常，怪不得喺週六、日好多香港人嘅家常節目。
個人評分
味道：7/10
環境：7/10
服務：6/10
抵食：8/10
平均每人消費：HK$50
味道：7/10
環境：7/10
服務：6/10
抵食：8/10
平均每人消費：HK$50
稻坊 Tao Square
荔枝角寶輪街1號曼克頓山商場(曼坊)1樓102舖
8300 8140
沒有留言:
發佈留言