佳美餐廳 Cafe De Savoy：街尾搵食

小弟晌返工日子一向食晏唔俾錢，原因只不過公司包伙食，甚少出街食晏，但既然老友大佬東難得晌廣州返落嚟公司「述職」，突然打嚟叫我一齊食晏，當然點都要奉陪啦！雖然大家都喺「中環友」，不過一個晌東，一個晌西，就番佢工作位置，揀定嚟「佳美」食晏，然而，我就要由街頭（相對嚟講）行到去街尾，差唔多由中環嘅一邊行到去中環嘅另一邊。

位處地庫嘅佳美，入口細細，其實唔多起眼，雖然其為一間電影主題嘅酒吧餐廳，內裡有唔少電影海報、人物剪影，但僅此已矣，講真唔多覺有電影主題嘅氣氛。由於臨時臨急，都無訂到位，所以被安排坐晌高腳枱櫈用餐，對我哋兩個男士而言，都無話有咩唔方便。一室主要都喺深啡襯白，不過，高腳櫈就改用鮮艷嘅橙紅皮梳化椅。

午餐套餐主要分為4大類：「創新健康沙律。素食」、「無限煮意。歐陸風情」、「魅力意粉。焗物」及「精選東南亞美食」，一共14款，部份款式訂明可配有機紅米飯、金粟菜香飯、鮮茄醬意粉或薯角野菜沙律，價位為$72 - $108，奉送餐湯及茶啡，如揀特飲則需要另外補錢，加一就慣例啦，溫馨提示，要滿$200先可簽卡。

小圓麥包．羅宋湯

麥包就當然唔喺常見港式嗰種，喺一小個粗麥嘅小圓包，猶幸小圓包仲帶微暖，包心軟熟。而羅宋湯酸香醒胃，有啲辣勁，算唔錯。

焗香草龍脷柳意粉配牛肝菌忌廉汁 $82

大佬東揀咗個焗意粉，份量唔少，似模似樣。少試了一口，龍脷柳都大件厚肉，不過香草味唔突出，意粉算喺合格，無焗過腍，但可惜啲喺個牛肝菌忌廉汁，牛肝菌香味欠奉，換嚟只有芝士香味。

香煎海蝦南瓜意大利飯 $88

小弟就揀意大利飯，一來都幾鍾意食意大利飯，二來用南瓜嚟煮，啱晒我。個飯煮得唔錯，幾濃香南瓜味，啖啖飯都帶著南瓜香，此外，飯粒煙韌，口感滿意，然而，香煎海蝦只此一隻，雖然呎碼唔細，不過都喺兩啖搞掂，幸好喺海蝦挺新鮮，有蝦味，幾彈牙。

即磨咖啡

餐飲點選咖啡，不過只有一般即磨咖啡，別無他選。咖啡幾芳香，唔比連鎖咖啡店差。

兩個老死好好傾，家庭、工作、旅行、教會……乜都講，已經提早蛇咗出去食飯，差啲超時添。

個人評分
味道：7/10
環境：8/10
服務：7/10
抵食：7/10
平均每人消費：HK$94

餐廳資料：
佳美餐廳 Cafe De Savoy
中環德輔道中99-105號大新人壽大廈地庫
2117 1111