中央飯店 Central Restaurant：改投中央

香港租金貴人所共知，舊式酒家、飯店可謂買少見少，當然，晌部份舊區都仲有一啲「珍藏」，「中央飯店」就喺其中一家，瑟縮於深水埗大埔道舊式商住大廈裡面，單睇門面就知佢有幾老香港味道。所以，趁細妹生日，就一於懷舊吓，食慶生飯，雖然已搬離依區快近10年，話晒都喺度由小學讀到中學，老父、細佬妹、親戚都仲住晌依區，偶爾都走過嚟行吓，對深水埗都頗有感情架！

除咗門面夠「老餅」之外，內裡環境可以用有啲殘舊嚟形容，昏昏暮暮嘅環境，灰灰黑黑嘅天花，部份牆身仲唙貼緊防火膠板，而天花上吊住嘅水晶燈，相信當年已喺相當奢華嘅裝飾。而晚市嘅客人多數都喺上年紀嘅街坊居多，因為見佢哋同啲伙計頗熟絡，偶有一、兩枱稍年輕嘅客人。雖然環境喺就喺舊啲，不過，招呼確實唔錯。

咪睇「中央」一介平民飯店仔，環境又噏噏耷耷，要豪嘅一樣得，餐牌第一版就有魚翅、鮑魚，雖然唔知會有幾多客會叫，但標得價，就自然有供應。

除此之外，個餐牌都分得頗為仔細，湯羹類、家禽類、豬牛類、魚類都好正常，但刻意分開埋石斑類、鮮魷 / 土魷類就頗有趣。

店家嘅招牌菜有梅菜扣肉同鹽焗雞，前者因為過肥，家人唔多鍾意食，而後者點都要叫半隻一試。講開梅菜扣肉，記得以前細細個住晌石硤尾時，仲喺7層H形嘅廉租屋，就喺依家美荷樓青年旅舍對下個地盤，有幢「14座」（以前啲公屋興排「冧把」），地下有間叫「永源茂」嘅客家菜館，做嘅梅菜扣肉非常好食，去親都差唔多次次叫。

迷你八寶冬瓜盅 $90
湯羹類估佢唔到咁多，足有成19款，一般都喺賣$50-$60個，非常經濟實惠，依家出面啲集團式酒樓都喺出三幾款作為每晚主打咋。見佢牆上有個推介：冬瓜盅，仲每日有限，所以點一個嚟試試，嘩！講就話「迷你」，連渣帶湯都分到成10碗有多，所以，絕唔迷你。而且，好多料，有蝦、魚、鹹肉、鮮蓮子、冬菇……等等，湯頭幾清甜。我哋4個人，真喺飲湯都夠飽呀！哈哈！

菜遠鮮魷 $60

上文都講過佢特別將鮮魷、土魷分為一類，可見唔喺求求其其，15款裡面都有部份喺較少見，例如：蝦醬吊片柏葉、菜遠鳳肝鮮魷、薑蔥鴛鴦魷。雖然我哋所揀嘅喺簡簡單單菜遠鮮魷，但鮮魷多到鋪滿碟，入口爽甜，菜心亦都好靚吓，兼且大碟份量足，認真抵食。

菠蘿咕嚕肉 $55

依道菜差唔多同親我自己喖邊家人食唐餐都例叫咁滯，因為細佬妹鍾意嘛。中央做嘅菠蘿咕嚕肉非常有水準，咕嚕肉嘅粉漿適中，啖啖肉，酸甜有致，又唔嗆喉，連菠蘿、青椒都落足無慳皮。以前玩工聯會啲中菜班，師傅話一碟例牌餸菜應該大概8兩重，眼前碟咕嚕肉點止呀！

東江鹽焗雞 $140（半隻）

話晒招牌菜，所以有一定嘅期望。其實雞類一共有4款主打，包括東江鹽焗雞、東江奔霸王雞、脆皮炸子雞、碧綠上湯雞，全部都喺半隻賣$140，全隻賣$260，如果人多，與其叫全隻都只喺平$20，就不如叫兩款半隻仲划算，可以試試唔同做法喺點嘛。雖然我哋叫得半隻，但一樣夠晒大份，皮下脂肪少，雞皮帶爽，而且十分入味，個人覺得唔點沙薑都已經好OK，不過，有啲部位韌，有啲則好細滑，但整體都認為隻雞喺上算！

另外，茶錢收番$5位，白飯就$8碗，較出面酒樓便宜，不過，咪以為佢舊就唔收加一，10%服務費喺照收你，而且，只收現金，咪諗住碌卡呀。我哋4個人雖然只喺點咗3餸1湯，但食得小弟非常之飽，中央嘅菜式稱得上大件夾抵食，味道又不俗，可繼績支持嘅老飯店。同一段大埔道隔幾個街口仲有稻香同明星，但值得改投「中央」啊！

個人評分
味道：8/10
環境：6/10
服務：8/10
抵食：9/10
平均每人消費：HK$110

餐廳資料：

中央飯店 Central Restaurant
深水埗大埔道140號東盧大廈地下
2777 6888