北京人家 House of Beijing：北京不覺

晌荃灣荃新天地嘅北京人家都唔喺第一次到訪，曾經嚟過幫襯晚市，慶祝老婆生日，不過都已經喺幾年前嘅事。嗰次嘅感覺喺菜名特別，但味道普通，定性為平淡嘅一餐，今次與另一對教會夫婦再訪，無乜特別原因，只喺貪其環境好，適合慢慢傾，慢慢食。

一向都幾鍾意美心嘅中餐館，尤其又一城八月花、尖沙咀潮庭……等等，裝潢、服務做得非常到位。以依間北京人家嚟講，大堂一字長形夠通透，通花吊燈有中國特色，布梳化椅貼背好挨，環境稱得優雅舒適。不過，午市人手明顯不足，望落好似一個侍應要應付十多張枱，見佢哋成日四圍張羅。

我哋一行4人，雖然有啲4人用嘅「午市自選小菜套餐」（$388，另收茶位費、前菜費及加一服務費），包點心、冷盤、湯羹、小菜，如果有心嚟試佢小菜其實都幾抵食，因為都有好多款風味小菜可揀，如宮爆明蝦球、糟溜魚片……等等，不過，我哋就只喺想食吓點心啫。

點心紙就一小張睇晒，京川滬粵美點、生滾粥品、精美廚點、現拉腸粉、各式飯麵、特色甜品共70多款，無話分大中小點咁煩，每款食物下都標明價錢，明碼實價。另外，茗茶$9位，收加一，但睇番張單，兜前菜就無收過錢，唔知喺免收定打漏！

前菜

小小一兜蒜泥青瓜豆腐乾，青瓜爽口又富香蒜味，而豆腐乾腍腍韌韌有咬口，豆味濃。呷啖茶，食啲前菜開開胃。

灌湯小籠包 $32

皮唔算好厚，但摺紋做得較粗疏，尤其埋口位，咬落一舊粉咁。唯餡肉及湯汁都交足課，前者幾鮮味，後者則清甜。

蜆芥鯪魚球 $42

一客6粒，炸得甘香，入口熱辣辣，鯪魚球魚味濃，又彈牙，因為調味唔錯，淨食都OK，沾咗蜆芥反而鹹得滯。

煎芋頭糕 $16

一年只有過農曆年食得多之外，平時真喺好少點依道點心，美心出品嘅芋頭糕一向足料，芋頭味香濃，質感挺實，唔會靠溝粉，煎得香口都收貨啦。

鮮菌腸粉 $36

個腸粉真喺幾貴，不過，相信貴在人工及手工。腸粉即拉，睇相你就知個皮拉得有幾薄，而且又夠滑溜；內裡嘅餡料非常多，有冬菇、磨菇、甘筍粒……等等，切得丁方巧小，樣樣都喺功夫。

豉油皇炒腸粉 $32

腸粉喺蝦米腸，但嫌佢蝦米少，不過，勝在炒得「勻巡」，條條腸粉都上晒色，蘸點麻醬已經好好食。

馬拉盞 $16

馬拉糕獨立版，雖然質感鬆軟，有蛋糕清香味，但都喺鍾意一底底，一件件嗰啲馬拉糕，感覺更富彈性。

蔥油大餅 $32

勁多蔥，啱晒小弟。咪睇佢好似好大個，怕食落好滯膩，請放心，因為大得嚟薄，加上多蔥，感覺較為輕盈。可能有啲人覺得唔抵食，蔥油大餅一般都又大又厚，如果你喺想要大厚嘅蔥油餅，依個就真喺唔太啱你喇。

酒釀燕麥小丸子 $20

酒釀小丸子重點在於個酒釀及桂花，兩者都好平衡，糖水入口有微微酒味又嗒到桂花香，小丸子煙煙糯糯，特別加入燕麥，多添一份咬口感，仲有少少似食糯米麥粥嘅感覺。

齋睇店名「北京人家」會有個錯覺佢喺賣京菜，查實無論晚市定午市，都唔只京菜一種，仲有川滬粵菜，所以，今次食評個標題「北京不覺」其中一個含義想講就喺唔覺佢只賣京菜；其二，跟這對教會夫婦都認識咗唔少年日，間唔時完咗教會崇拜都會一齊去食吓茶，彼此嘅情誼真喺「不經不覺」累積咗咁耐。

個人評分
味道：6/10
環境：8/10
服務：7/10
抵食：6/10
平均每人消費：HK$75

餐廳資料：

北京人家 House of Beijing
荃灣楊屋道1號荃新天地上層地下43及81號舖
2941 0066