Cafe 1950歐陸餐廳：歐陸小農舍包羅萬有多國菜

自從搬咗去美孚住，又近西鐵站，入去元朗、屯門…等地搵食嘢稍為多咗，因為一條西鐵真喺帶嚟好多方便，比起去港島東相對仲要近哩！就算今晚難得掹車邊同幾位食友入到屯門安定邨嘅Cafe 1950搵食，食完坐返巴士60X一程過出返美孚，都唔使半個鐘，估唔到可以咁「快趣」。

Cafe 1950位處剛翻新嘅商場地鋪，估唔到佔地頗大，睇落可容納百多人，裝潢帶有鄉郊小農舍嘅感覺，杏、啡、棕色磚牆、牛奶桶花樽、大大細細嘅盆裁、大木箱、懷舊留聲機……等等，好多田園小擺設，加上地方闊落，樓底也挺高，配以淺啡色木枱木椅，又採用半開放式格局，令人感覺舒適唔拘束，所以環境上確搶咗唔少分。

店家以歐陸餐廳掛帥，不過，概略翻過一轉餐牌，不難發現，何止歐陸菜，直頭有茶記精神，提供多國菜式，有不同地方嘅特色小食、德國肉腸、沙律、意大利薄餅、迷你火鍋、西式焗飯、意式燴飯、異國炒飯、蛋包飯、石頭鍋飯、意粉、扒類……。雖未至於應有盡有，但至少適合唔同人嘅口味需求。

 特色小食 

 特色小食

 德國肉腸、沙律

意大利薄餅 

迷你火鍋 

 西式焗飯、意式燴飯

 異國炒飯、蛋包飯、石頭鍋飯

 意粉

 扒類

歐陸菜

晚市，以套餐為主，分1人套餐及4人套餐，前者以所揀嘅主菜而定價（除特色小食、散點德國肉腸、沙律、意大利薄餅），已包埋餐湯及餐飲；後者則定價$398，有小食拼盤1客、主菜2客、甜品4客，同樣包餐湯及餐飲。餐飲喺一般茶啡，若想轉其他特飲如啤酒、餐酒、梳打、自家調製雞尾酒……等等，只需額外補回「跟餐價」就可以嘞，所以選擇多彈性較大。

羅宋湯（隨餐附送）

入口頗辣，但酸度啱啱好，夠醒胃，欠缺個歐陸餐包，有就更好！

荔枝松葉蟹棒沙律（非套餐類別）$47

沙律一共在4款供應：凱撒沙律（$38）、無菌溫泉蛋凱撒沙律（$43）、煙三文芒果柚子沙律（$49）及我哋所試嘅荔枝松葉蟹棒沙律。估唔到啲蟹棒幾OK喎，加上甜蜜嘅荔枝肉（罐頭貨），清爽嘅沙律菜，仲有粟米粒、車厘茄，配以酸酸甜有啲泰式風味嘅醬汁，效果唔錯，清新開胃！

軟殼蟹芒果米紙卷（非套餐類別）$28

一客兩大條米紙卷分開4件，以生菜包住軟殼蟹，再包上薄薄一層越南米紙，睇落通透，淋上芒果醬汁，入口涼涼爽爽，香甜芒果醬之下喺卜卜脆嘅軟殼蟹及爽脆嘅生菜，確喺唔錯嘅小食，好適合夏天嘅菜式。

黑松露海鮮意式燴飯（套餐類別）$65

若非味道上有啲過鹹，個意式燴飯應算喺有水準，因為不單飯粒煙韌，份量十足，而且黑松露醬落得一啲都唔手緊，變得香味突出。海鮮料亦不頗，有墨魚仔、鮮蝦、青口，連賣相都做得有板有眼，都只喺賣$65咋喎。

柏林肉腸拼盤配酸菜（套餐類別）$92

以長方形砧板盛載一客有6款肉腸嘅拼盤，份外型格，瑞士蘇寶力腸（牛仔肉，足9吋長），黑森林腸（德式豬肉，有8吋長），維也納腸（豬肉，6吋長），蘑菇雞肉腸（雞肉，4吋長），脆皮波子腸（香草煙牛肉）及法蘭克福腸（豬肉加牛肉，6吋長），每款腸都各有一件，餐廳本身嘅德國肉腸散叫，共有8款之多。小弟嘗試計吓拼盤比散叫抵幾多，吓！竟然一樣價喎，當想話咪以為拼盤一定抵啲嘅時候，想番起個拼盤喺當套餐計，包餐湯、餐飲，咁！始終都喺拼盤抵。其實撇除運算上計落抵唔抵，德國腸本身就唔平，所以依家$92就一次過試到6款腸，真喺抵食之選。肉腸各有特色，以蘇寶力腸及脆皮波子腸最得小弟歡心，因為蘇寶力腸以牛仔肉做，肉味較香，而波子腸外皮香脆，腸肉又有香草及煙燻味。最可惜喺啲酸菜，酸椰菜唔夠酸，又太過腍，口感極之唔好。

德國式燒啤酒豬手配酸菜（套餐類別）$99

個豬手喺是晚重點想試嘅菜式，大大件嘅德國豬手非常有睇頭，基本上餐廳為方便客人會將豬手切好先上枱，若要原隻上記緊落單時說明。豬手外皮好香脆，不過一定要趁熱食，否則一攤涼就變韌，皮下脂肪唔太肥，肉質鹹香軟腍，食友嚐到淡淡啤酒香，可能我對啤酒一向唔好，感覺似有還無咁！但只賣$99，仲要包餐湯、餐飲，又喺另一抵食之選囉！

餐飲方面，我哋見佢啲菜式定價唔太貴，所以都加錢轉晒其他特飲。有3款轉咗自家調製雞尾酒，因為見啲名特別，所以就好奇試一試喺點。

碧咸（跟餐價$16 / 散點價$29），以伏特加、橙酒、朱古力沙冰溝埋，食友話無乜酒味，主要喺得啲朱古力味，勝在夠大杯！

藍冰洋（跟餐價$21 /散點價$35），藍橋酒、占酒、伏特加、蘭母酒、菠蘿溝七喜，色澤好貼題，甚有冰洋嘅感覺，酒味幾重，好冰涼。
蜜瓜精靈（跟餐價$16 /散點價$29），伏特加、蜜瓜酒、蜜桃汁、梳打打成，食友話有啲酒味，唔太強，易入口。

雖然都食得幾飽，但見佢啲甜品多元化又幾吸引，有法式班戟、美式班戟、芝士餅、港日台式甜品，同樣定價親民，跟出面嘅甜品、糖水鋪差唔多，仲要咁好環境，又唔收加一，晌附近住開嘅人過嚟食甜品都有數喎，至少唔使同人逼住食都抵啦。

朱古力美式班戟 $25

美式班戟系列有成7款之多，藍莓、紅豆、草莓、香蕉、朱古力、香芒、彩虹（即喺雜錦）。上下兩層美式班戟夾著鮮忌廉，睇樣好似好多，其實唔算，上面加咗朱古力碎、奧利奧曲奇、脆米及朱古力雪糕，再淋上焦糖漿，真喺好正，唔同口感，唔同味道，紛紛陳陳。不過要改善喺啲班戟，有啲乾硬，已反映過俾經理知，佢話所有班戟都喺即做，咁問題就唔知會唔會出於啲蛋漿擺得耐，無存封妥當。

藍莓法式班戟 $25

法式班戟亦唔少，同樣7款，都喺嗰一堆配搭。法式班戟加入忌廉捲成長條形，幾香軟，有少少似食卷蛋，不過最正喺啲藍莓醬，原來又喺以鮮果肉製作，怪不得味道寧捨鮮活，酸香細緻，就連個雲喱拿雪糕球沾咗啲藍莓醬都變得好食咗。

太子金露 $26

幾款北海道3.6牛乳奶凍嘅甜品，名字都好特別，太子金露、太妃金露、盛女幸福宅。太子金露應該以楊枝金露嘅變奏版，因當中成份有芒果、金柚，但改以加入黑珍珠及牛乳奶凍，味道幾香甜，牛乳奶凍既滑溜，又重奶香，值得推介。

晚市套餐除定價實惠、比市區低一截之外，仲唔收加一，而且菜式頗多元化，好啱啲學生哥、一家大細、想慳慳哋嘅情侶，據講未來仲打算晌其他區開新店，希望會晌美孚區插旗啦。

個人評分
味道：8/10
環境：8/10
服務：8/10
抵食：8/10
平均每人消費：HK$115（試食邀請）

餐廳資料：

Cafe 1950歐陸餐廳
屯門安定邨安定商場地下C107號舖
2861 1389