蘇浙滙 Jardin De Jade：再嚐廣式．金月滿堂

叨老細光，有幸試過米芝蓮一星蘇浙匯嘅酥凈月（蘇式禮盒），估唔到再有機會試埋蘇浙匯另一款嘅廣式月餅「金月滿堂」（$308元 / 盒），多得老細相贈。依款月餅禮盒絕對喺送禮大體之選，因為單講包裝已很有心思，餅盒本身先以綠橙菊花圖案花巾包裹，古色古香。

打開花巾，深啡色木盒，分上下兩層，上層放有4個廣式月餅，個個份量十足，足有185g一個；味就包括雙黃白蓮蓉月餅、咖喱牛肉月餅、金沙椰皇月餅及至尊金腿伍仁月餅。至於下層，喺蘇浙匯胎菊茶葉（15g）及蘇浙匯普洱茶葉（25g）各一罐，沖杯靚茶，嘆件月餅，何其悠哉！當然，作為送禮，亦非常大方得體。

木盒包裝，份外典雅！

一次過食晒就似乎滯啲，所以分幾次當下午茶或飯後「甜品」跟家人分享。 

雙黃白蓮蓉月餅
蘇浙匯嘅雙黃白蓮蓉月幾高質素，白蓮蓉雖然仍覺得佢甜，但清香柔滑，兼且蛋黃油水十足，兩項「基本因素」做得咁好，整體都唔會差得去邊！

金沙椰皇月餅

如果你鍾意食椰撻，咁依個金沙椰皇月就應該幾啱你，因為無論味道及質感都跟椰撻非常之相似，不過小弟對椰撻好一般，所以椰皇月淺嚐就夠喇，況且，佢較其他幾款月餅稍甜，少吃無妨。

至尊金腿伍仁月餅

外間對金腿伍仁月嘅喜惡好兩極化，鍾意嘅就話好好食，鹹香有咬口；唔鍾意嘅就話好難食，咬到牙軟，又鹹又甜唔知點。雖然餅餡有瓜子仁、杏仁、芝麻仁、核桃仁、西山欖仁為伍仁，仲加入好多配料，有少少肥豬肉，又有少少叉燒，金華火腿則唔多，而小弟本身都鍾意食果仁，不過夾埋做月餅，就唔喺咁對自己口味。

咖喱牛肉月餅

據說上海蘇式月餅中，鮮肉餡月餅做得相當出色，未知依個廣式「肉餅」又會做成點？打開包裝，已聞到陣陣咖喱味，咬落嘅香豆蓉充滿咖喱味，感覺都幾有趣，而內裡有絲絲牛肉，不過只喺得少少咋，未夠攝牙罅。

題外話，早前睇過一篇採訪新聞，話啲人如果食寫評食得好細緻，講埋有啲咩材料，又有咩調味，一般食客又點會有可能知，一定喺鱔稿嚟啦。小弟上文有啲地方描述得幾詳細，唔知會唔會被人「鱔」佢呢？哈哈，有相為証，頂多都只可以指控佢有「抄襲」之嫌囉！其實，有時家下好多食肆，不論中西，餐牌都會寫得好明有咩材料或醬汁，而且有啲較為突出嘅味道，如香茅、南乳、腐乳、蝦醬、金不換、味噌、露絲瑪莉、玉桂……等等，都會一食就知；再者，有時基於好奇，我都會問吓啲侍應道菜喺咪落咗乜乜乜，有啲咩成份。小弟就好少理人喺唔喺鱔稿，反正都只喺當個參考，大家都只喺分享心中美食啫，再者，人人口味各異，我成日話好食嘅，我老婆通常都唱反調，一喺麻麻，一喺就話唔好食，但我唔喺有心「鱔」佢架。

盒底成份說明

雖然上述幾款月餅唔太啱自己口味，其實本身幾有特色，相信總會有好此道之人，或許年紀再大啲，會食得出當中韻味。

個人評分
味道：5/10
環境：8/10
服務：8/10
抵食：8/10
平均每人消費：HK$0（禮物）

餐廳資料：

蘇浙滙 Jardin De Jade
灣仔港灣道30號新鴻基中心地下G3–4舖
3528 0228