Rachel's Cookie：好友狂嚐曲（六）

早前得蒙唔同食友送贈嘅曲奇，品嚐到唔同店家嘅出品，有嚟自咖啡店、麵包店、餅店、有本土製作、亦有外國直送，所以寫咗一系列「好友狂嚐曲」食評。今次，又得食友相贈嘅，喺本土製作嘅Rachel's Cookie，一共3家分店，港、九、新界各一家，而九龍店位處尖沙咀重慶站，依區亦喺小弟多出沒嘅地方，所以，事後都專燈走過嚟「參觀」一下，睇睇有咩產品，好等小弟送啲小心意俾人時有多個選擇。

店鋪晌商場最入位置，少少隱蔽，地方細細，牆上掛有好多曲奇相片，而所有產品就放晌唔同嘅銅櫃之上，感覺有點典雅。擺放整齊企理，分門別類，有輕便裝，有禮盒裝；有大盒，有細盒；有膠樽裝，有玻璃罌裝，有紙袋裝、亦有鐵盒裝，自用送禮都皆宜啦。，味道又多元化，價錢又幾實惠，所以，都不枉此次「收料」之行。而且，店方提供試食，絕對可以試啱先買！

烏龍茶曲奇 $20

平平哋嘅入門產品，每盒只賣$20，仲做緊優惠，買3盒只需要$50添。以膠盒盛載，不過用手拉鋁片密封，俾人感覺存封好又夠衛生。口味其實有廿多款，而且據店員介紹，有啲喺餅廚嘅大膽創意，製作出坊間少見嘅特色口味，如香草薯仔曲奇、黑麥芽曲奇、紅棗杞子花茶曲奇、香蕉曲奇……等，店員仲強調，佢哋啲曲奇以嚴選原材料，如法國一級牛油、法國朱古力、美國果仁……等，並全人手製作。更為求迎合健康潮流，特意減低甜度，卻不失牛油香味，更加入唔同健康配料炮製，又無添加，自家新界工場每日新鮮運抵店舖，可謂誠意十足。而小弟獲贈喺一盒有10片嘅烏龍茶曲奇，約重80g。 

通常飲茶先講茶味香濃，但打開罐烏龍茶曲奇，茶味飄逸，入口烏龍茶味頗突出，曲奇口感非常鬆化，確喺一份出色嘅本土製作。到咗新年過節，與其又喺丹麥屋，不如多啲支持本地小店！

個人評分
味道：8/10
環境：8/10
服務：8/10
抵食：8/10
平均每人消費：HK$20（禮物）

餐廳資料：

Rachel's Cookie
尖沙咀彌敦道36-44號CKE重慶站3樓312-315號舖
2676 2929