印度皇Basmati：印印腳嘆自助印度餐

早前同老婆去過西環嘅深井咖喱寶食印度菜，無論食物、環境、價錢都好對辦，尤其嗰杯芒果酸奶（Mango Lassi），真喺一試難忘。事隔數月，嚟到同系嘅姊妹店「印度皇」，跟朋友一齊食番個自助午餐，再次品嚐正宗印度菜，算喺返工日子食晏嘅好享受。

印度皇雖然位處上環，但面向干諾道嗰邊，對比起德輔道、皇后大道……幾條大街，以及蘇杭街、禧利街、急庇利街……多條細街，都喺稍為靜少少，尤其夜晚更明顯。當然食晏會好啲，不過早段真喺唔多客，始終印度嘢唔喺打工仔搵食晏嘅主流，但過咗1;00pm就坐到近滿，始終附近多商廈，打工仔都要搵依嘅。餐廳晌商廈一樓，內裡嘅裝修印度風格唔重，反而，仿紅磚牆，天花三角形木框柱廊，有啲農舍莊園嘅感覺，地方算寬敞，近窗一截對住大街，感覺最好坐！店員嘅服務都唔錯，大部份都似喺印度人，不過都有一個阿組，喺香港人，所以，英文水皮如我都無有怕。

 餐廳門口

自助午餐只有星期一至五提供，收費$88一位，另加一，有餐湯、沙律、有十來款印度食物、一款甜品及生果，包一杯餐飲，可選啤酒、果汁及芒果乳酪，當然奶茶、咖啡同樣有提供。

芒果酸奶（Mango Lassi）

坐定定就即刻落單叫杯芒果酸奶先，成份只有芒果同乳酪，不過比起深井咖喱寶嘅芒果酸奶就有啲遜色，依度佢加咗冰，溝淡咗芒果嘅濃度，但仍然都好飲，微酸中滲出芒果香。

印度烤餅（Nan）

每枱都會送上一籃印度烤餅，就好似食西餐時嘅餐包咁，最可惜所送嘅喺原味，感覺普通咗少少，故此，我哋晌出面攞啲特色黃豆蓉（Yellow Dal Fry），以烤餅蘸點，咁就好食好多，但單純啲黃豆蓉就認為鹹咗啲。

白菌湯

是日餐湯喺白菌湯，不過味道、質感都麻麻，菌味唔多突出，質感稍為稀薄。

 沙律吧

沙律放晌食物區一角，有沙律菜、菠蘿（罐頭貨色）、雞蛋、醃酸瓜、粟米粒、奶油椰菜雞肉，款式唔算多，一碟就可以搞掂晒，樣樣要啲，再加點青瓜乳酪，整體味道都唔錯啦，飯前開開胃，無所謂啦。

輪到印度食物登場，其實所有自助餐食物擺晒晌入門口右邊一截牆邊，十來款印度食物概略同大家介紹及分享吓。

春卷（Spring Rolls）

牌仔寫住春卷，原來仲有咖喱角，炸得香脆，香口小食幾時都咁受人鍾意，不過始終唔算有咩特色，食少少上吓就夠喇。

椰菜花薯仔咖喱（Aloo Gobi）
印度咖喱確實有一手，層層嘅香料味，令咖喱食落好有層次，再者，配咩食材都得。先試喺配椰菜花薯仔，沾滿咖喱嘅椰菜花同薯仔，少少辛辣，好惹味，薯仔粉腍好食。

白汁雜菜（Veg. Korma）
Korma 有用音譯「拷瑪」，喺一種以肉同奶油製成嘅印度菜，一般都喺配肉多，今次食到嘅喺配雜菜。由乳酪、奶油、果仁製成嘅拷瑪好重奶香，質感好幼滑，似喺西餐嘅忌廉汁，所以店家嘅餐牌都以「白汁」嚟翻譯，不過，就帶點甜味，食落都OK喎！

蒜蓉炒雜菜（Garlic Mix Veg.）
蔬菜類有咖喱、有拷瑪，當然要試埋個蒜蓉炒雜菜啦，雖然睇落都喺如一般炒菜，但好香蒜蓉，食多幾棵菜絕對無妨。

香燒魚（Fish Tikka）

魚肉頗為軟腍，以咖喱粉醃完香燒，口感唔乾，而咖喱味亦唔會太搶，配魚啱啱好。

試完第一碟，抖抖一陣再嚟第二碟，依碟就較多肉及澱粉類，總之就樣樣都試吓咁！

香燒牛油雞（Butter Chicken Tikka）
雞件好大件頭，咬落啖啖肉，而醬汁非常惹味，有牛油香之餘，富香料味，絕對唔好錯過嘅一款印度烤雞。

羊咖喱（Lamb Curry）
羊肉煮等十分腍滑，輕輕羊羶味，但羶而不臊，因為配羊關係，依個羊咖喱嘅咖喱就做得較為濃烈，好有個性，撈點飯食就仲正，又喺唔可以錯過嘅美食。

印度皇飯（Basmati Paullau Rice）
紅紅黃黃嘅印度皇飯，印度米飯粒修長，入口黏黏軟軟，因為加入咗黃薑粉嚟煮，據講黃薑粉有防癌、治療關節病嘅好處。

胡椒脆餅（Papadam）
圓錐形嘅胡椒脆餅已經喺印度小依嘅特色，胡椒餅極之脆，一咬咔嚓而碎，而且胡椒味整重，兼且挺辣口，但過鹹依個老毛病要改善一下，太鹹點都喺唔健康。

甜品、生果

甜品小弟就無試到，但聽朋友講似喺米糊、米布甸之類嘅嘢，但啲米粒仲喺好完整，味道頗甜，唔喺好啱個人口味，所以，都喺食多啲西瓜算嘞！

除上述自助午餐外，另外有多款午餐供選擇，包餐湯及沙律，主菜價錢由$55-$115，配印度薄餅或印度白飯都可以，仲包一杯普通嘅餐飲，如咖啡、檸茶、檸水。舒舒服服、平平哋試吓印度午餐，都喺個唔錯嘅選擇。

個人評分

味道：7/10
環境：7/10
服務：8/10
抵食：7/10
平均每人消費：HK$96（試食活動）

餐廳資料：
印度皇Basmati
上環干諾道中137-139號三台商業大廈1樓
2541 0995