Moon Thai：月滿泰誘人

港鐵嘅港島西延線明年底就會通車，不過，上環、西環等地已一早逐漸變天，好似依家已有唔少品牌酒店進駐，較新一員喺上環蘇杭街尾嘅香港蘇豪智選假日酒店。酒店跟飲食喺分唔開嘅話題，要介紹嘅喺晌酒店內開業無耐嘅Moon Thai，有幸獲邀到來試試其出品，所以就拉埋老婆同兩個舊同事一齊嚟陪吓小弟，其實喺想試多啲嘢就真。

首先點都要重點講吓個環境，門前招牌Moon Thai黑底銀白字，夠酷夠型格。一踏進餐廳內，感覺閒舒富情調，柔和嘅燈光，叫人倍感輕鬆，而枱櫈安排闊落，唔會有拘束感；外面仲有個非常大嘅露天雅座，雖然周邊環境都喺高樓大廈，但佈局仍不失泰國風情，藤椅、梳化……，有滿月底下，唔食飯晌度飲吓嘢，傾吓偈都覺得又爽又寫意呀！服務亦都好貼心，適時換碟添水，但略嫌上菜太快，有啲唔「襟」擺嘅菜式，可以逐道逐道慢慢上，咁會食得悠閒啲。

講開環境，順便講講洗手間，原來都甚有觀賞性喎，感覺唔會死板冷冰冰。究竟喺點樣？睇相好過聽我噏啦！（註：男士嗰邊我拍，女士嗰邊梗喺搵朋友代勞啦！）

食物選擇方面，頁首有數款得獎菜式，此外，由頭盤、湯、沙律、魚翅、海鮮、特色主菜、蔬菜、甜品一應俱全，過百款菜式，應該唔難搵到啱心水美食。

飲品亦值得留意一下，因為一入門口左邊吧枱酒櫃非常搶眼，放滿各式各樣嘅酒，故餐廳提供多款酒類飲品，由威士忌、伏特加、冧酒、龍舌蘭酒……以至十多款雞尾酒，應可滿足大部份需要。當然為要顧及唔飲得酒嘅客人，非酒精類嘅飲品仍十分之多選擇，有凍、有熱嘅特飲可能令較為吸引啲。

爽快特式凍飲

 - Mango Cool芒果特飲（$48），有啲似沙冰，可能芒果成份多，除咗芒果味濃郁外，質感就無沙冰咁冰咁雪；
 - Strawberry & Orange Cool士多啤梨香橙特飲（$48），味道極似雜果賓治，而士多啤梨味重少少；
 - Coco Mango Fizz（$48），以芒果汁加椰子忌廉做成，椰子味比芒果味略重；
 - Lychee & Coconut Soda荔枝椰果梳打（$48），荔枝同椰子味好平衡，帶少少汽，入口感覺更涼快。

冬蔭功湯 $98（1-2人）/ $178（3-4人）

撈一撈就知道非常足料，有唔少鮮蝦同草菇，鮮蝦又幾彈牙；原來下咗唔少紅辣椒、青辣椒，所以入口都幾啃吓，辣度十足，亦有有幾重金不換香味。怕辣嘅人就不妨考慮其他，如蜆肉菠蘿清湯，據介紹一樣咁有特色。

泰式生蝦 $158

一客有成12隻生蝦（基圍蝦），經理話最好即出即食，當然啦，否則攤暖咗就失真晒。蝦肉冰鎮過，寧舍爽身，加咗蒜蓉、特製辣汁醃味，味道頗辣，大可夾埋薄荷葉食，可以中和一下個辣度。墊底有好多苦瓜片，食完一件生蝦，再食番件爽脆苦瓜片，甘苦味亦有助減減辣！

鮮蝦西施柚沙律 $138

墊上少少沙律菜，以江魚仔、西施柚肉、鮮蝦、金不換、炸椰子所做嘅鮮蝦西施柚沙律，清爽、清甜、清脆。清爽，是因為鮮蝦又大隻，質感爽口彈牙；清甜，西施柚肉既肥大，又爆汁；而清脆，由於加入江魚仔及炸椰子碎，豐富咗個層次，多啲脆卜卜嘅口感。

香草粉絲焗蟹煲（時價）

經理介紹時，話以桂皮、八角、花椒、金不換、豬頸肉做底，再加入粉絲兜勻，最後放入新鮮膏蟹一同焗。所以，粉絲索晒啲香料味，食落寧舍香，口感估唔到又有啲似豉油皇炒麵咁；煲底下嘅豬頸肉又喺好入味、爽口；而鮮蟹非常之多膏，蟹肉亦好鮮甜！

蒜蓉豆醬炒椰菜苗 $88

椰菜苗由泰國直送，色澤翠綠新鮮，以蒜蓉豆醬爆炒，鮮嫩爽脆，非常惹味，可惜一碟唔多！

泰式甜品拼盤 $108（2-3人）/ $158（4-6人）

最後嚟嘅甜品拼盤，有齊店內散賣嘅4款甜品，可按人數要大份定細份。
 - 泰式千層糕，以斑蘭汁做，口感煙韌軟糯，斑蘭味不俗；
 - 泰式椰青糕，底層以椰汁做，上層以椰青水做，有濃，有清香，都幾好食；
 - 泰式南瓜布甸，原個南瓜加入雞蛋布甸，再切件上，部份爛咗影響賣相，南瓜粉甜，布甸幾軟滑；
 - 泰式椰汁西米糕，較常見嘅泰式甜品，香濃椰汁配西米糕，唔錯，只喺稍甜啫。

從餐牌嘅「餐廳介紹」所見，MoonThai奉行3A宗旨：Authentic（最上乖地道的美食）、Amiable（最親切可人的服務）、Ambience（包含傳統格調和現代品味的餐廳設計），原來佢亦喺赤鱲角機場嘅Erawan Thai首家分店。環境的確一流，服務有一貫嘅酒店級水平，食物質素中上，值得推介嘅泰國餐廳。但始終喺酒店內嘅食店，價格著實唔便宜，若有咩特別日子要慶祝紀念，食貴啲又何妨。

個人評分
味道：8/10
環境：9/10
服務：8/10
抵食：7/10
平均每人消費：HK$0（試食邀請）

餐廳資料：
Moon Thai
上環蘇杭街83號香港蘇豪智選假日酒店2樓
2851 1288