Express Bar by Lassana ：拉花？我都拉得吓！

曾經試過Spade by Lassana嘅出品，亦從飲食雜誌睇過佢背後掌管咖啡主腦人嘅訪問，所以，今次獲邀參加佢搞嘅拉花班，心裡著實非常高興，地點就晌位處觀塘另一姊妹店「Express Bar by Lassana」，雖然位置有啲吊腳，但跟大師學嘢，再遠啲都無所謂啦！

以往都有玩過拉花班，而今次嘅拉花班感覺有啲唔同，知識與實戰兼備就梗架啦，但知識層面唔單放於拉花上，仲有有關咖啡豆嘅，咩叫精品咖啡，飲咖啡喺咪好重咖啡因，瑕疵豆喺乜東東，採集要用日曬法 / 水沖法去處理……等等趣味資訊，令小弟得益不淺，多謝晒咖啡師Tracy嘅指導。

未開始之前，Tracy先示範嚟個以巴布新幾內亞豆手調咖啡俾大家品嚐吓啲原味，未沖前原豆研磨成粉末後，咖啡味極香；以滴溜沖調法，無加壓，沖調後嘅齋啡入口微酸，自然。

 巴布新幾內亞咖啡豆 

研磨好嘅咖啡豆 

Tracy準備十足，未實踐，當然要理論行先，一列投影圖片加短片，資料好豐富。由於店方喺買生豆返嚟自家烘焙，原來，烘焙完1個月後嘅豆喺最理想，此外，質素差嘅咖啡豆就需要烘焙耐啲，出嚟嘅色澤又會深啲。仲有，生豆可以分為好豆、瑕疵豆，後者通常用嚟做啲即溶咖啡，咖啡因亦會好高吓。Tracy順便又講講咖啡因嘅知識，高地所種嘅豆，咖啡因會低，苦啲，酸味重啲，所以佢話飲咖啡唔一定飲咗好多咖啡因，而咖啡有苦味除由於有咖啡因外，烘焙、沖煮都有少少影響。

好豆（左）、瑕疵豆（右）。

跟住又介紹吓咩叫商業咖啡（Commercial Coffee），相對嘅精品咖啡又喺點（Specialty Coffee），簡單而言精品咖啡喺指啲咖啡樹生長晌特定嘅環境，風味出嚟較獨特。又講吓一粒生豆會喺點樣，點解啲咖啡有酸味，靚嘅豆帶果酸香，有朕甜味，瑕疵豆嗰啲酸就似醋酸；咖啡行業裡有個專業叫杯測師，咖啡豆通常喺半粒，一粒過嘅叫Pear berry原豆，一樖樹只佔10%喺原粒架咋，真喺唔講唔知！

再落實踐層面，會由咖啡豆磨粉、沖咖啡、打奶泡、至拉花一條龍做晒。當然，我依個生手，如一起手就走去拉花，實死得啦，「棧」嘥晒啲咖啡，所以，我幾鍾意佢先搵啲清水學習一下拉花嘅手勢，加上精要嘅口訣：「中間落奶，拉高，轉圈，貼番近，流量增加，再拎高，收尾」，練得3、5、7次，至少都唔會咁騰雞先，然後再真正落場，拉得衰極有個譜嘛！

拉花示範

  沖泡出嚟嘅特濃咖啡

 用作打奶泡嘅明治4.3deluxe牛奶

 打好嘅奶泡

 導師嘅示範作

導師嘅示範作

「山區」鮮奶咖啡

依杯Latte喺小弟自家調製，味道一定喺世界最好啦（正在自我催眠），哈哈，有啲唔知醜嘅感覺添！經過今次學習，原來品嚐一杯鮮奶咖啡都大有學問。先講外貌，如果咖啡杯身印有餐廳商標，拉花個方向應對正個商標，喺刻意拉出嘅方向，依啲細心位唔喺間間餐廳都咁上心。此外，所拉嘅花靚唔靚及夠唔夠複雜，當然較為人注意，其實，入口夠唔夠柔滑、咖啡跟奶泡均唔均勻，先喺品嚐中嘅高層次。原來落奶手勢好，已可以把奶同咖啡溝勻，唔使再攪就可以飲出柔滑、均勻嘅口感！

自此，小弟飲鮮奶咖啡都無再加糖兼搞勻，為嘅就喺領略下咖啡師嘅手勢！

個人評分
味道：8/10
環境：8/10
服務：9/10
抵食：8/10
平均每人消費：HK$0（試玩活動）

餐廳資料：

Express Bar by Lassana
觀塘偉業街223號宏利金融中心1樓2號舖
2114 1003