紅樹林 Red Forrest：一樹無妨

星期日返完教會，因為打算去科學館睇特展，所以過到嚟尖東，時為午飯時間，當然要醫醫肚先啦，心想都只喺填肚就算，所以就好隨意入咗「紅樹林」。

一室以啡色為主系，木枱、木櫈、木架擺設、仿石牆，盡量配合店名。不過，鋪位細細，雖然鋪尾已伸延到商場通道之內，但枱櫈排得幾密，加上唔少客，所以都有啲逼。加上無靠背木櫈，自不然喺希望你嚟得快，食得快，走得快啦。順帶一提，招呼麻麻，睇耐少少餐牌想揀食咩，個侍應阿姐都顯得好唔耐煩，其他侍應又木無表情，感覺令人食完走得咁快。

雖然「紅樹林」主打台式，不過，翻一轉餐牌就知賣嘅嘢都幾雜。主要分為小食類及飯麵餐，因為都喺嚟食晏，故此，都喺晌飯麵餐度著手。飯麵餐整整有30款選擇，可配拉麵、烏冬、米線、米粉、通粉、白飯、泡飯、撈麵，套餐價喺包一杯冷熱飲品（$16以下小杯裝），如超過$16以上則需要補差價，轉大杯亦要+$5。

五香牛展撈麵 $35（散叫） / $40（套餐）

因為個碗大，有啲錯覺以為個撈麵好少，食落都足份量。攪起啲麵，加上無湯嘅緣故，下面墊住一大堆麵糰架，而麵條入口煙韌有咬口。此外，4大塊牛展，都算得上貨真價實，再者，炆煮得既腍且入味，都收貨架嘞，若然多啲汁就仲好。

海苔雙雜菌泡飯 $31（散叫） / $36（套餐）

飽肚之選，因為份量實在好多，泡飯多，草菇同磨菇亦多，所以，老婆食咗半碗就話飽晒，剩低嘅當然由小弟頂埋啦，好彩個撈麵唔算好大份，所以清埋半碗泡飯都絕無問題。講番個泡飯質素，咪睇佢湯色奶白，只喺不過不失，幸而未至於淡茂茂；草菇、磨菇別期望太多，罐頭貨色，勝在夠多。

咖啡沙冰

飲品若以$16以下計，其實選擇唔多，除基本嘅好立克、華田、啡茶之外，仲有細杯裝果汁茶系列。至於其他，如珍珠系列、咖啡系列、雪香系列、沙冰系列、特式熱飲、薑茶系列……等等，通通都要補差價。所以，小弟索性揀杯咖啡沙冰嚟爽快一下，都喺補多$5，就可以大大杯涼入心，咖啡味亦比期望中好。

九製皇帝桔蜜

喺店內人氣推介，有潤喉、化啖、止咳嘅功效，雖然老婆本身無咩毛病，但佢總喜歡飲得健康啲。杯內除咗有粒皇帝桔外，仲加多粒話梅，酸酸甜甜，幾有生津嘅感覺。

整體嘅質素其實唔差，以今次嘅食後感，個人覺得笑與OK之間，不過招呼方面有所缺欠，拖低少少總分俾個OK佢。

個人評分
味道：7/10
環境：6/10
服務：5/10
抵食：7/10
平均每人消費：HK$43

餐廳資料：
紅樹林 Red Forrest
尖沙咀加連威老道100號港晶中心60B - 61號舖
2721 9931