agnès b. DÉLICES：法越悠然甜點薈（下篇）

前文提要吓先，話說老友Ivan兄去完越南旅行，送贈小弟一套越南咖啡套裝做手信，搵個星期六，同朋友搞搞新意，自家製法式悠閒，Paul Lafayet馬卡龍夾agnès b. DÉLICES朱古力，襯越式咖啡，整咗個「高茶甜點薈」，悠悠然嘆一番。上篇就分享咗Paul Lafayet馬卡龍「月餅」，下篇就接住輪到分享agnès b. DÉLICES朱古力月餅。

自家搞作Paul Lafayet馬卡龍夾agnès b. DÉLICES朱古力嘅High Tea

今年agnès b. DÉLICES依舊有推出月餅甜品試圖分一杯羹，有朱古力月餅及朱古力曲奇月餅，前者以朱古力包裹住唔可餡料，一共有4款口味；後者則用曲奇製成餅皮，包裹優質可可做嘅朱古力餡料，而口味只有2款。

agnès b. DÉLICES月餅甜品嘅介紹小單張

Reunion Chocolate Mooncake Gift Box（朱古力月餅禮盒）$288

朱古力月餅禮盒以鐵盒包裝，外觀較平實，盒中嘅4個月餅，淺色喺牛奶朱古力月餅，深色則喺黑朱古力月餅，配以餅面兩款圖案，加上內附一張小簡介，可以輕易分辨出4款口味，唔使猜度。由於每個淨重都有35g，所以「高茶」中先試當中兩款，分別喺「焦糖餅乾黑朱古力月餅」及「榛子姜都亞牛奶朱古力月餅」。 

榛子姜都亞牛奶朱古力月餅（Hazelnut Gianduja Milk Chocolate Mooncake）

唔好睇佢個朱古力月餅好似「硬掘掘」，其實慢慢嗒落啲朱古力幾香滑，內有好多榛子碎。月餅名字中嘅「姜都亞」（Gianduja）小弟有啲在意，因為好陌生，都唔知喺咩嚟，好奇上網查查，啊，原來喺一種含加入咗超過30%榛子蓉嘅朱古力，怪唔之得朱古力內有咁香榛子啦。

焦糖餅乾黑朱古力月餅（Caramel Biscuit Dark Chocolate Mooncake）

又有焦糖，又喺黑朱古力，絕對喺小弟心願愛。原打算切開兩半，點知甚有難度，一切就爆開，因為朱古力殼挺薄，內餡唔似得榛子朱古力月餅咁樣實心法，而喺餅乾夾層同注滿焦糖漿，黑朱古力雖無列明度數，但憑甘苦味，可可度數應該唔輕，黑朱古力嘅甘苦，配搭焦糖嘅濃香，有啲互相輝映嘅感覺，agnès b. DÉLICES嘅黑朱古力果然好食。

至於另外兩款「荔枝玫瑰芒果黑朱古力月餅」及「香蕉脆脆牛奶朱古力月餅」，應吓節，等臨近中秋時先同老婆慢慢嘆，當飯後甜品。

荔枝玫瑰芒果黑朱古力月餅（Lychee Rose Mango Dark Chocolate Mooncake）

黑朱古力亦喺老婆至愛，所以知道依個「月餅」喺黑朱古力底，已搵晒印象分。黑朱古力加入咗荔枝玫瑰花茶嚟做，雖然淡淡味薄，但咁先唔會太搶黑朱古力嘅甘苦味；而餡心中間一大舊黃色喺芒果果蓉，咪睇佢好似「實崩崩」，一入口芒果香可以用綻放嚟形容，配黑朱古力，掂喎！

香蕉脆脆牛奶朱古力月餅（Banana Crunch Milk Chocolate Mooncake）

小弟都幾鍾意香蕉配朱古力依個組合，所以，內裡幼滑嘅牛奶朱古力加咗香蕉果蓉製作，誘發出陣陣蕉香味，認真「蕉氣」勃勃，認真唔錯。最有趣喺朱古力之內加入粒粒脆珠，咬落卜卜脆，好有脆口感，不過啲脆珠唔多，幾難先搵到粒出嚟影番張相呀！

 依粒就喺脆脆珠喇！

好老實講，近三百大洋食一盒只有淨重140g嘅朱古力月餅，對小弟而言真喺唔多捨得買架，反正小弟又唔喺朱古力狂熱份子。不過，撇開價錢，單而依盒agnès b. DÉLICES朱古力月餅嚟評論，真喺好有質素同心思，絕對喺高水準嘅朱古力，或許4款味道都極之啱晒小弟口味，對號入座自然有分加！

個人評分
味道：9/10
環境：8/10
服務：8/10
抵食：7/10
平均每人消費：HK$0（禮物）

餐廳資料：
agnès b. DÉLICES
九龍塘達之路80號又一城UG層20號舖
2265 8990