味千拉麵 Ajisen Ramen：全盛拉麵

繼上次因為有信用卡推廣所贈嘅現金券嚟食咗餐晏仔之後，今次再幫襯荃灣味千已事隔大半年嘞。老婆話想食吓拉麵，原本打算去拉麵台風，不過唔知點解好多人，無打算食嘅時候經過見佢就唔多人，依家想試佢嘅時候就人咁多，我哋一向食嘢都隨而遇安，亦唔想等位嘥時間，所以就去咗近近哋味千，反正佢都無乜要求，都喺一餐晏仔啫。

雖然拉麵熱晌香港熱過不停，一間又一間有名氣嘅拉麵店在香港插旗，不過，荃灣始終唔喺拉麵嘅真正戰場，再者，味千紮根香港多年，都薄有名氣，有一定嘅捧場客。今趟食評打算食得hea啲，所以，環境、服務，其他嘢就唔多講，一於入直路講碗拉麵。

湯底之謎

豬軟骨拉麵 $64

老婆揀嘅喺豬軟骨拉麵，你估點解？全因有海帶喎，通常拉麵配紫菜，不過依碗拉麵就配海帶，仲喺有唔少添，認真啱晒佢，此外，除豬軟骨，仲有好多銀芽，亦都好啱佢。個豬骨湯底著實唔錯，味道幾濃鮮，又唔會太漿口，睇番餐牌對個骨湯嘅介紹，似乎都幾認真，由「骨湯之源」、「熬湯之藝」、「取湯之髓」到「成麵之魂」，真喺唔打得都睇的啦。麵條方面，水準都保持到喎，有幾分彈牙，而且份量好足；豬軟骨意外地鹵得入味鬆化，足足有3大舊，帶少少肥膏，油香啲。

全盛拉麵 $62

小弟揀全盛拉麵純粹一個貪字，因為貪佢夠料多，包括天婦羅蝦、叉燒、栗米粒、蟹柳、福袋、溏心蛋、嗚門卷、紫菜、蔥等等，唔喺得過講字，有相為正，啲餸料堆到成個碗面都喺，難得隻天婦羅蝦放晌所有餸料最上面，天婦羅脆漿無被浸濕，所以當然要食炸蝦先啦。叉燒屬於少肥，不過都唔嚡，入口鬆軟；蟹柳亦唔喺啲太平價貨色，不過福袋就麻麻哋，福袋以豆腐皮包住日本年糕，唔知喺咪個福袋煮得唔夠熱唔夠透，啲年糕有少少生硬，缺少期望中嘅黏糯感，而最走樣喺溏心蛋變咗鹵蛋，上次就溫泉蛋變咗鹵蛋，即喺問題未解決，喺唔喺一時做唔徹溏心蛋，就搵鹵蛋頂住先呢？實在要改善依方面問題，因為先後兩次出現同樣事件！

今日食到嘅兩碗拉麵，以豬軟骨拉麵優勝啲，各環節都平均，相反，全盛拉麵雖然料多抵食，不過，福袋及溏心蛋就拉低晒啲分，原本可以俾個笑面佢，但咁情況就只可以俾到OK架咋。

個人評分
味道：7/10
環境：7/10
服務：7/10
抵食：7/10
平均每人消費：HK$70

餐廳資料：

味千拉麵 Ajisen Ramen
荃灣眾安街68號荃灣城市中心1期地下28-32 & 33B 號舖
2940 6671