福禧越泰美食 Full Viet Thai Restaurant：不再重福

厚福街絕對可以稱得上喺一條食街，因為，短短一條掘頭巷，目測估計有超高七乘地鋪都喺做飲食，未計仲有幾幢食廈添。與其等政府去搞，集合商戶力量仲易成事。不過，嚟厚福街搵食，好就好在有平有貴，豐儉由人。是日幫老婆送完大堆文件返公司，就一齊嚟到「福禧越泰美食」食晏，試一試佢推介嘅手撕雞絲湯粉。

稍稍過咗午市，又未到茶市，所以，客人唔算少，又未到爆場嘅情況。店內環境企理乾淨，似茶記好過一家越泰菜館，因為裝修簡單，卡位佔多，最重要喺搵唔到有咩越泰相關嘅擺設啫。

因為都喺兩公婆簡單食餐午飯，所以，餐牌就無點刻意影俾大家做參考，但臨走時見有外賣單張，就索性掃描出嚟俾大家參考。但點菜時就稍為留意吓，除越泰嘢，佢哋仲有啲中式嘢，皆因叫佢前身喺「福禧中越美食」呀！

嚟得就當然打算點啲越泰式嘢食，所以，坐落就約範圍縮窄晌「午市越泰套餐」，再收窄到越式粉麵一欄，近廿款選擇，定價$36-$44，包一杯熱飲。

手撕雞絲湯粉 $42

既然喺老婆推介當然要試啦，粉底就要金邊粉。啲雞絲一睇齊晒邊就知唔喺手撕啦，但就勝在多，多到一碗面都喺，如果講手撕，上次晌長沙灣「正 麻辣·茶·雲吞」嘅麻醬青瓜雞絲冷麵，就堅喺絲絲手撕喇，還好嘅喺雞絲唔算嚡，但亦唔喺嫩到滑，OK咁啦，而金邊粉細滑有少少韌性，瀡一聲就滑落喉嚨；湯底就一般般，個人就覺得喺啖口咗啲。

鮮魚蛋湯粉 $39

老婆就要咗鮮魚蛋配檬粉，檬粉可以講喺越南米粉，佢就最鍾意食米粉。碗面喺大量銀芽，魚蛋就只有4粒，可是，啲魚蛋口感唔爽彈，但亦唔會話好似溝咗粉咁，最失望老婆話喺無乜魚味，真喺唔知喺店家自己打抑或喺來貨，總之就唔覺得喺鮮魚蛋囉。

熱奶茶、熱檸水

見佢茶記咁嘅格局，就一於大膽少少試熱奶茶，可惜喺唔滑，茶底普通，而杯熱檸水就勝在夠多檸檬。

「福禧」明顯都喺做街坊（即喺附近上班族）嘅生意，賣嘅都喺穩穩陣陣款式，質素亦算喺叫穩穩陣陣，唔可以話佢差，亦唔可以話有咩突出，晌尖沙咀旺區，幾十蚊落樓，普普通通嚟食一餐，喺OK嘅，之但喺，應該唔會重複再嚟喇。

個人評分
味道：6/10
環境：6/10
服務：6/10
抵食：7/10
平均每人消費：HK$40

餐廳資料：
福禧越泰美食 Full Viet Thai Restaurant
尖沙咀厚福街5-6號地舖
2369 3108