阿公麵店 The Public Chinese Noodle：川菜公略

無正式統計或查証，但感覺上近年開多咗好多賣四川菜、重慶菜嘅菜館，而且喺小店居多。是日就嚟到荃灣「地皇廣場」，曾經喺死城嘅劏場，原來依家一樓變成「大食皇」美食廣場，場內仲有唔少特色小店，「阿公麵店」就喺其中一家。

初頭以為喺賣車仔麵，走近啲望望，原來喺主打麻辣嘅川式麵店，晌鋪面打量一下，睇見一罌罌辣油，感覺對辦。而且，順便窺探吓廚房其他位置，企理乾淨，唔會污糟邋遢。

由於都喺以劏場轉型，用餐區就較一般美食廣場細而窄，還好嘅喺全場都配上梳化椅，坐起嚟都舒服。

菜式選擇印晒晌兩張A4紙之上，大部份嘢都有圖片做參考。一張羅列晒多款四川經典麵食，如四川擔擔麵、四川酸辣粉……等等。不過，講到食川菜，小弟就無乜攻略，隨心即可。

另一張則喺四川湯麵套餐、四川涼菜、四川小食、飲品，不過，店主都講明飲品喺廣場內嘅「飲品部」提供，然而，豆漿及羅漢果水喺自家製，值得一試。整體嚟講，定價都貼地，但如果啲四川涼菜、四川小食有半份或雙拼就更好，一個人嚟都可以試多少少嘢，哈哈！

順帶一提，晌收銀機旁掛有一張溫馨提示，提示品嚐麵食嘅客人一啲小貼士，可見店主都幾細心。哈哈，不過，香港人一向匆匆忙忙，乜都要快，唔知有幾多客人會留意到呢！

川北涼粉 $25

白雪雪嘅涼粉，當然跟我哋嘅黑色港式涼粉喺兩回事啦。啲涼粉嘅口感較挺身，唔喺軟腍或煙韌嗰種感覺；由於本身無乜味，靠啲汁醬，酸酸辣辣幾醒胃，咪睇啲醬一身艷紅，辣度無想像中咁霸道，點到即止，大可過過辣癮。

夫妻肺片 $38

喺川菜經典嘅冷盤之一，雖然稱為肺片，但其實喺牛脷、牛肚、豬心組成，並無肺片，個菜名認真吊詭。淋上自家調嘅辣汁、花椒粉，立時味道變得好唔同，由於確喺有股辣勁，小弟亦只喺試試三幾片，我就覺得頗有水準喇。

四川餃子 $32

呢個原先無打算點，喺店主推介我哋，話喺自家製，每日新鮮包。隻隻都包得豐滿，餃皮薄而滑，塞滿嘅菜肉餡刴得幼細，卻不失口感，同樣咪睇面頭嘅辣油紅噹噹，無想像中咁狠，一客8隻，都只喺$32，絕對試得過。

四川湯麵套餐（刀削麵+3餸） $50

湯麵套餐共有4款麵底供選擇，濃湯嘅話小弟就覺得刀削麵喺最佳選擇，因為較為掛湯。而每配湯麵已附有肉碎及芽菜，揀幾多餸就睇你個胃有幾大喇。

最後，揀咗刀削麵配雲吞、醬爆蟹籽丸及枝竹球，湯底要細麻辣。啲刀削麵好食，有咬口，有韌勁，食到尾都唔會腍，夠晒耐浸。而且，份量十足，兩個女生可以一個麵底再嗌多少少餸嚟「些牙」都夠食。湯底亦不俗，少少辣，又少少麻，之但喺，有少少偏鹹，雖然可以再添清湯，但啲麵索晒汁後就變得稍鹹，個人覺得鹹度可再略為調整。

餸料方面，雲吞跟水餃差不多，只喺形狀有別，上文都講過，而醬爆蟹籽丸好食喎，彈牙得嚟啲蟹籽餡果然幾爆，不過，最有驚喜喺啲枝竹球，其實喺枝竹嚟，做成球形，口感富層次，又有豆香，吸收咗少少麻辣香，夠晒過癮。

凍羅漢果茶（跟餐）

一啖辣嘢，一口凍飲，可以講喺冰火交融，爽到爆。但凍飲都有啲健康嘢嘅，就喺凍羅漢果茶，大杯，冰涼，羅漢果味不俗，但個人口味，再甜多少少就正晒。

家常紅燒牛肉麵 $38

紅燒牛肉麵多數都喺晌啲台灣麵店度食，今回嚟到四川麵店，亦想試試。嘩！同樣份量十足，啲麵條由配底堆到上面，而啲牛腩目測都有6、7嚿，咁嘅價實在賣大包。

先試啲麵，個麵底嘅設定喺四川排掛麵，形狀如港式麵檔啲粗麵，不過，質感較腍。雖然，店主都曾叮囑呢個麵要盡快食，不過，影吓相，份量又多，頭段都食到麵條嘅柔滑，但尾段就確喺有啲偏腍。

然而，啲紅燒牛肉有質素，炆得軟腍鬆化，卻唔會一咬就散開晒，仲保持一份咬口感，兼且甚富肉香。

不得不溫提一下，小店開星期一至六，但做生意嘅黃金日，即喺星期日，反而喺休息日，有興趣嚟試嘅朋友就切記，咪摸門釘喇。

感覺店主都好有心搞好檔生意，會問問客人意見，傾開先知道師傅嚟自重慶，仲喺梁平縣，正正喺小弟晌重慶山區走訪近廿年嘅縣城之一，所以，就更多幾句話題。順帶一講，好多人仲以為重慶喺四川裡面一個市，曾經喺，四川喺一個省，省會喺成都市，好多年前重慶市已升格為直轄市，地位可以講喺等同北京、上海、天津……等直轄市喇。

個人評分
味道：8/10
環境：6/10
服務：8/10
抵食：7/10
平均每人消費：HK$50

餐廳資料：
阿公麵店 The Public Chinese Noodle
荃灣大河道18號地皇廣場1樓119A至D號舖
無聯絡資料