Espuma：開懷午餐

香港人一向俾人印象都喺好忙碌，有時朋友間約食餐飯都唔容易，有啲人要加班難預時間，有啲人要照顧屋企難就時間，各有原因，各有苦衷。如果彼此工作地點近就可以食餐晏仔，中環一向搵食難，放飯時間周圍都喺人，所以，俾多少少搵間餐廳好坐啲，又舒服嘅跟朋友聚一聚。Espuma幾年前嚟話過，記得環境唔錯，食物又有一定水準，較安心同朋友嚟用餐。

店內嘅裝修好似跟幾年前嚟嘅唔同，印象中，以前嘅喺帶點復古典雅，有唔少馬賽克及手繪壁畫作裝飾，但今次再訪，感覺就簡約咗，木地板、木枱椅，牆上少少盆栽做裝飾，無太多餘嘅擺設，一句「Eat for Happiness」點出餐廳方向。我哋被安排後排落地大玻璃旁嘅二人枱，自然光嘅透入，讓人更感舒服。

餐廳設午市套餐，以中環區而言，都幾划算，包是日餐湯或沙律+主菜+精選甜品+特選咖啡/茶，定價為$118-168，主菜共6款選擇，有薄餅、豬、牛、魚、海鮮……等種類，可加錢升級其他特飲。

田園沙律

小弟就喜歡頭盤揀食沙律，可以開開胃嘛。個沙律好簡單，喺慣見嘅組合：沙律菜搭車厘番茄。反而個醬汁有啲特別，辣辣哋，似泰式醬汁，酸酸辣辣咁。

南瓜忌廉湯

友人揀咗餐湯，伴有一小件香蒜法包，小弟只喺淺嚐一口，南瓜味相當濃郁、清甜，質感打得柔滑，算合格有餘。

慢煮豬仔脾配香橙汁及煙肉粟米牛油飯 $138

主菜我就想試個豬仔脾，貪其配個香橙汁，睇睇會唔會有啲火花。雖然，話啲豬仔脾喺慢煮，但就未有預期咁軟腍，不過，就燒得幾香口，而且，酸酸哋嘅香橙汁配豬仔脾確喺幾好；只喺煙肉粟米牛油飯就失望啲，煙肉就無影，牛油香欠奉，反而啲伴菜燒意大利黃瓜、蜜糖豆、車厘番茄就好好食。

香煎盲鰽魚柳配西京山葵汁 $158

友人就好滿意佢嘅主菜香煎盲鰽，我都「些牙」咗兩口，條盲鰽的確煎得正，外皮夠香脆，魚肉嘅魚味濃且嫩滑，沾上由白麵豉做嘅西京山葵汁，真喺好得；而且，除烤菜，仲伴有蕃薯蓉，軟滑香甜，極之好食。

精選甜品

甜品其實唔算喺咩精選，只喺細細件忌廉芝士蛋糕一件，還好喺味道都唔錯，幾有芝士味，口感亦好幼滑。

焦糖鮮奶咖啡 +$15

飲品方面，一定揀咖啡，因為曾經試過佢哋啲咖啡，確喺沖泡得出色，皆因以西班牙Novell咖啡豆即磨沖製。而我呢杯鮮奶咖啡，加入焦糖元素，入口醇香細滑之外，滲出嘅焦糖香，讓人更添半分寫意。

招牌水果茶 +$15

水果茶亦喺呢度嘅招牌，大大壺水果茶，浸入唔少新鮮生果。茶底頗清香，滲出微微酸甜果香，予人感覺清爽。

除咗小弟嘅煙肉粟米牛油飯失準之外，整體樣樣食物都好稱心。雖然午市有丁點嘈，無晚市有情調，但居高臨下，對上開揚嘅景觀用餐，再者，招呼貼心有禮，確喺讓我哋都食得開懷。

個人評分
味道：8/10
環境：8/10
服務：8/10
抵食：7/10
平均每人消費：HK$180

餐廳資料：
Espuma
中環威靈頓街2-8號威靈頓廣場M88 17樓
2973 6088