麵屋黑岩 Kuroiwa Ramen：精打細蒜好脂味

上回晌「軟橋」食過米苔目，路經見有家拉麵店「黑岩」，鋪門就似模似樣，門口掛住大大個日式燈籠好易望到。因為晌門口都貼有餐牌，拉麵定價都喺$68/$78，都試得過喎，再者，都有近半年無食過拉麵，所以，就趁過開嚟深水埗黃金買嘢，就食完碗拉麵先返屋企。

店內環境如大多數嘅拉麵店差唔多，地方唔算大，以深色木系餐枱椅為主，大多數喺二、四人細枱，對住開放式廚房仲有一列吧位。

餐牌亦喺落單紙，直接晌上面剔就搞掂，環保便捷，拉麵共有4款：原味、黑蒜、辛辣及海老，叉燒可以揀厚切或火炙，配菜有蔥或椰菜，麵條亦可以自選軟硬度。再加上額外配料選項、多款小食及普通汽水。

黑松燒叉燒 $28

叉燒角切，燒香之後再加上黑松露，真喺唔幽香有鬼，再者，肉質鬆化並帶點油香，絕對喺「脂」味無窮喔。

黑蒜拉麵 $78

唔喺刻意，不過，不其然食好幾次拉麵都揀黑蒜口味，貪其配合埋豬骨湯變得更香濃。此外，叉燒揀火炙，配蔥花，而麵內本身已加有木耳絲，不過，就唔跟溏心蛋、紫菜等基本常有嘅配料。

叉燒有兩片，滷得入味，炙燒後外觀更吸引，入口好鬆化，亦唔太肥膩。

麵條則揀硬麵，其實都唔會有好硬口嘅感覺，而喺有一份韌勁。湯底除混入黑蒜油，面面仲加有炸蒜同豬肉碎，變得更滋味，而麵條掛上香濃嘅湯汁，瀡瀡聲好快食晒。

「黑岩」嘅食物嘅質素確喺唔錯，價錢亦喺跟隨市場大環境定價，不過，總感覺欠缺一啲獨有賣點，好似幾款拉麵，口味都喺慣常見到嘅款式，亦無見有咩期間限定嘅款式推出，再者，深水埗都不乏拉麵店，好似「隱家」、「混亂」都做出咗口碑同成績，要突圍實在唔易，望小店繼續努力。

個人評分
味道：7/10
環境：7/10
服務：8/10
抵食：7/10
平均每人消費：HK$106

餐廳資料：

麵屋黑岩 Kuroiwa Ramen
長沙灣長沙灣道219號地下
2628 3369