Today's Food Lab：有營有款

現代人講嘢越嚟越講求健康，所以，一啲以健康掛帥嘅店子當然大有市場，友人就推介咗呢間小店「Today's Food Lab」俾我，以多種新鮮蔬菜，配搭出唔同嘅餐盒，以健康有營為主。

講明喺小店，餐廳地方真喺唔大，晌外面往內望一眼睇晒。裝修簡約，但乾淨企理，雖然設置三數個座位，不過，明顯都喺主力做外賣生意，堂食嘅人應佔少數。

收銀櫃上就以大屏幕顯示所有菜式選擇，點餐就進行3步曲，望望就知簡單易明。第1步就喺主食選項，有沙律菜、雜薯粒或、15穀飯；第2步喺揀主餸料配搭，共有6款，定價$68/$78，全部均伴有甘筍粒、紅椒粒、青瓜片及四季豆；第3步唔喺必然一步，就喺加配飲品或餐湯。此外，亦有兩款指定沙律可供選擇。

自家製蘋果雪梨薄荷茶 +$6

見只加$6就不妨試試，蘋果、雪梨本身都好潤，加埋薄荷，晌呢個炎夏飲落，感覺更清爽，絕對喺消暑解熱嘅佳品。店長仲話喺自己煲，無添加，叫人更放心飲用。

鮮茄什菜湯 +$12

雖然英文採用「Minestrone」一詞，但中文並無用意大利雜菜湯，反而強調「鮮茄」，湯色喺無比慣常見到嘅意大利雜菜湯咁深，味道亦無咁濃，比較清香、酸爽，夾雜好多蔬菜粒，夠健康，喺意大利雜菜湯嘅清爽版。

慢煮雞胸配香滑南瓜醬15穀飯 $78

揀咗15穀飯配慢煮雞胸，一盒飯份量可不少，而且，件雞胸亦頗大件頭，遮晒成兜飯咁滯，且睇到墊有大量蔬菜粒。

先試試雞胸，以慢煮形式煮熟，再灑少少七味粉之類作簡單粉飾。雞胸本來喺成隻雞比較健康、少脂肪嘅部位，但肉質會無咁滑，食一口算唔錯，唔會覺得好嚡口。或許再煎封一下會香口啲，如煎封讓人感覺有些微油膩，或者以面火烘焗一會，效果唔知會唔會好啲呢？

15穀飯拼上啲雜菜粒，健康、有營無疑，沾上香滑嘅南瓜醬，味道合晒心水，啲醬真喺堅滑溜且帶有濃郁南瓜嘅清甜。唯挑剔位則喺啲飯未算得好飯粒分明，其實呢類飯唔易煮，因為我老婆都經常加入紅米、糙米煮飯，因為要浸軟先，受水方面唔易控制。

題外話，餐廳採用紙湯盒、木製即棄餐具、可分解膠飯盒，算為環保出分力。店員亦好有禮貌，感覺親切，雖然晌度消費唔便宜，但偶爾都要食得健康啲嘅。

個人評分
味道：7/10
環境：6/10
服務：8/10
抵食：7/10
平均每人消費：HK$96

餐廳資料：
Today's Food Lab
上環文咸東街6號順發樓地下6B號舖
2555 1368