韓閣 Korean Loft Cafe：親民韓風

行完山，又要返荃灣聚會，最好嚟路德圍呢邊搵食，因為選擇十分之多，而且，唔少食店賣嘅嘢有特色，定價亦好大眾化。「韓閣」就喺其中一家，賣韓國菜，菜式種類多，價錢貼地，吸引到唔少年輕人幫襯。

我哋嚟得早，都未夠6:30pm，店內一樣坐滿人。裡面地方其實唔大，座椅都排得頗逼，逼逼哋大概坐到30、40人。不過，透過幾面玻璃，營造出空間感，紅磚牆、銅水管、昏黃吊燈，帶點工業風。記住嚟呢度唔喺食服務、環境，所以，要有少少心理調節。

打開餐牌翻一轉，所賣韓國菜嘅種類可以講得幾齊全，炸雞、湯鍋、鐵板、飯品、麵類、小食、野菜小品、特色手卷、一人鍋、韓式特飲……等等，款式多到可以媲美港式茶記。果然定價相宜，而且，點任何食物，都可以加配白飯、炒野菜拉麵、年糕……等等。順帶一提，好似茶記咁，餐具早已放晌枱下嘅櫃桶中。

泡菜、大豆芽和菠菜

落好單，先送上韓式前菜，爽脆酸辣韓式泡菜、充滿麻油香嘅大豆芽及嫩滑無渣嘅菠菜，正所謂各有特色。

真露煮海蜆 $48

如日式嘅清酒煮蜆，法式嘅白酒煮青口，加入韓國燒酒「真露」去煮，最特別嘅地方喺以銅盤呈上，甚具韓風。酒味唔太重，蜆肉鮮甜，湯內仲有滑豆腐、洋蔥，所以，食完啲料千祈唔好嘥個湯唔飲，挺鮮甜架。

泡菜豬肉芝士手卷 $38

雖然叫手卷，但稱為壽司卷就較為習慣啲，韓國特色手卷有4款選擇：牛肉雜菜、泡菜豬肉芝士、雜錦、海鮮。加入泡菜、芝士，令啲手卷幾惹味，鹹中帶點微辣，加上豬肉、青瓜，口感豐富，而且，餡料清晰可見塞得唔少，唔會得嚿飯咁搵笨。

亞之媽炸雞（秘製甜酸醬油味）$88 / 半份

炸雞有眾多口味，而呢一款甜酸醬油味未有試過，睇睇如何秘製。雖然只喺點半份，但份量十足，堆滿一大碟，兩三個人都夠分。確信佢喺即點即炸，因為送到嚟新鮮熱辣，直頭熨手，而味道好正，甜酸味有層次，醬油令味道更濃郁，炸漿厚薄適中，酥脆又唔硬，肉質嫩滑，尤其雞翼同脾位，兼且啲醬汁入晒味，賣$88真喺超值。如果夠人多，真喺想叫多份呀！

夢幻蝶豆花特飲 +$12

外面天氣鬼咁熱，加上食炸雞，點都喺叫凍飲嘅。朋友嘅蝶豆花特飲，紫色果然顯得夠夢幻，但其實味道就唔會太特別，因為，蝶豆花本身喺無乜味。

荔枝梳打 +$12

而我杯荔枝梳打唔喺齋梳打加糖水，堅有啲荔枝果肉，入口好有荔枝香味，就算罐頭貨都叫俾足誠意啦，因為，有時出面飲到嘅荔枝梳打只喺溝糖水。

路德圍呢邊確喺超多食肆，競爭唔細，不過，見佢哋食物做得有水準，定價親民，怪唔得有咁多後生仔幫襯，離開時，門口真喺企滿後生仔等位架。

個人評分
味道：9/10
環境：7/10
服務：8/10
抵食：9/10
平均每人消費：HK$100

餐廳資料：
韓閣 Korean Loft Cafe
荃灣路德圍運通街地下10M號舖
3956 8101