西班牙小食坊 Spanish Tapas Place：滋味良坊

唔知點解，觀塘「東廣場」地下層搞吓搞吓變咗個「美食廣場」，香港人一向都鍾意食，正所謂民以食為先，以前都去改啲由死場改為美食廣場而翻生番。今次到訪嘅「西班牙小食坊」雖然位處其內，但用餐區有鋪外，亦有入鋪嘅鋪內，加上有啲裝修，唔會太街坊。間唔時有朋友問，搵好嘢食有咩良方，我會講笑咁話，睇小弟啲食評囉，哈哈！

鋪外有唔少高腳枱櫈，幾啱嚟個歡樂時光，飲吓酒，食吓西班牙小食。不過，用餐我就較喜歡入到鋪內，雖然地邊細細，但裝修骨子，而且，唔會人來人往咁騷擾。而最入位置，更有間房仔，但喺就無問有無最低消費。

既然連名都以西班牙小食打正旗號，餐牌內嘅菜式自不然主打喺西班牙菜。店鋪細細，選擇可不少，3大版喺西班牙小食，仲有湯品、沙律、黑毛豬菜式、其他肉類或海鮮主菜，當然唔少得西班牙海鮮飯，原來仲有生蠔供應添，餐牌製作認真，兼且圖文並茂。

此外，有一個特色小菜推介，重點介紹店家嘅西班牙燒黑毛乳豬及西班牙特色腸，由於兩個人胃納有限，想試多啲都唔得。晌入面牆上，更掛咗唔少木牌，講明佢哋嘅食材都喺天然嘢，無抗生素、無重金屬、無激素、無基因改造、無農藥，好味之餘，務求令客人食得健康。

配西班牙小食，飲品一環亦喺重點，餐酒、啤酒、西班牙果酒故然唔少得，但顧及唔飲得酒嘅客人，可考慮冷壓果汁、花草茶或咖啡。唯一可惜喺，呢度未見有甜品供應，將來唔知會唔會考慮吓，或者同附近嘅糕餅店合作。

Mango-Orange Juice $28

餐牌標明喺天然冷壓果汁，投其信心一票，無心儀嘅菠蘿味，芒果一向都喺另一心水。估唔到杯冷壓果汁有成咁大杯，而且，芒果味濃郁，口感厚身，唔會好水咁，猶如新鮮榨出嚟，賣$28抵飲喎。

Red Temptation $32

花草茶以茶包沖泡，睇餐牌所知，成份有木槿、小薔薇、香茅、玫瑰，有助放鬆及舒緩疲勞之效，啱晒繁忙緊張嘅城市人飲啦。入口微微酸，幾清爽，今晚唔少肉類菜式，啱晒啦。

36個月橡果黑毛豬火腿 $65/20g

晌餐廳一旁，直情有個專櫃放啲西班牙黑毛豬火腿，從餐牌所見，更備有24、36、48個月嘅種類，點都要試一試架喇。豐儉由人，我哋就揀咗中間價嘅36個月嚟試試，雖然色澤較深，但仍睇得出有光澤，入口肉質細膩，味道鹹香而油潤，不愧高質。

精選海鮮沙律 $78

講明喺有五款海鮮，再配搭水欖和水耕菜，果然童叟無欺，海鮮包括青口、蝦肉、沙甸魚、海蝸牛及八爪魚，而且，整碟嘅份量唔細，賣$78都算抵食。簡單以油醋調味，食得出啲食材夠鮮味，水耕菜又好爽脆，相比起普通嘅沙律菜，成本又會貴啲，感受到店家肯用靚料。

一口牛串燒 $45、黑毛豬爽梅肉串燒 $35、黑毛豬肋肉串燒 $35

除火腿，黑毛豬肉亦喺餐廳嘅主打之一，與其點扒類只試得一款，不如叫幾款串燒，可以試到一款牛及兩款豬。師傅好醒目，分別以三色椒嚟分3串唔同嘅串燒，伴紅椒嘅喺一口牛，伴青椒嘅喺梅頭，伴黃椒嘅喺肋肉。啲一口牛雖然味濃，但未夠嫩滑，感覺可能有少少過火；梅頭肉最好食，軟腍得嚟真喺帶少少爽口感；而肋肉本身帶筋，燒完可能會收縮，索住支簽，所以，扯起嚟有啲尷尬，但肉質其實又唔喺咁韌喎。

傳統西班牙海鮮飯 $198

嚟西班牙餐廳唔叫個西班牙海鮮飯總感覺好可惜咁，以前好多餐廳做嘅「大鑊」飯真喺幾大鑊，但近年見唔少為方便食客，都會出啲細份量，難得呢度都有二人份量嘅，一於試吓佢哋嘅質素會煮成點。點菜時，店員都會講明製作需時，要預番半個鐘，食完啲前菜、沙律、串燒就啱啱好。而個西班牙海鮮飯送到嚟，其實都唔細份，兩至三個人都OK。

鑊西班牙海鮮飯外觀幾有睇頭，鋪咗唔少大海蝦、青口，餐牌仲寫到明喺以西班牙米、海鮮湯煮成，入口飯粒軟綿，果然有陣陣海鮮鮮味，飯內仲混有蝦仁、八爪魚粒，非常豐富，而啲大海鮮質素不頗，鮮甜爽彈，大家都好滿意個飯嘅質素。

「麻雀雖小、五臟俱全」用嚟形容「西班牙小食坊」都算貼切，鋪仔細細，提供嘅菜式都多元化，而且，啲店員招呼有禮，上菜嘅速度啱啱好，不緩不急，讓人感覺稱心。

個人評分
味道：8/10
環境：7/10
服務：8/10
抵食：8/10
平均每人消費：HK$290

餐廳資料：
西班牙小食坊 Spanish Tapas Place
觀塘成業街7號東廣場地下G07號舖
3160 8399