山區裡的走走趯趯: 香港郵意 Postcollectionhk Cafe：意郵未盡

工作關係，間中要在大陸山區跑呀跑，周圍走走趯趯（音：笛），所去的都是窮鄉僻壤，雖然靚景欠奉，但身處農村時，就自然有種令人感到寧靜、安然的感覺！在城市忙碌地做呀做，都是為了賺得三斗米，不過，慶幸有餘有剩等我都可以出外隨處盪，不單只見識一下不同地方的風土人情，還可以調節一下知足的心靈。小弟的旅遊足跡，可暫時瀏覽以下網址：http://travel.openrice.com/traveller/userdetail.htm?userid=49632

2018年6月8日星期五

香港郵意 Postcollectionhk Cafe：意郵未盡

大概年半前，到訪過一次「香港郵意明信片航海主題咖啡廳」，當時仲喺開晌灣仔嘅一條後巷，貪佢一派悠然，環境有個性，咖啡亦沖調得唔錯。最近，睇到食友嘅食評，先知搬咗過嚟尖沙咀嘅「首都廣場」，繼之前去過荃灣嘅「地皇廣場」，又一個劏場變死場，真喺唔知「香港郵意」開晌度有無得搞。

今晚老婆有中學同學聚舊飯局，得一支公，所以，就過嚟「香港郵意」嘆嘆咖啡食餐飯。跟灣仔店好唔同，地方頗大，呢度哋全開放型，以之前部份嘅劏鋪變為用餐區，公共空間感強，而裝修簡約，以淺木色系為主，悠然隨意，亦頗有文青氣氛。

座位喺自由選擇，鍾意坐晌邊就坐晌邊，唔怕唔習慣嘅，可以試吓坐晌如榻榻米嘅地蓆座，鋪晒座墊，小弟就無試坐，但睇起嚟就幾舒服咁。現場好多後生仔女，並且以女生多，小弟就得一支公，所以，就自己搵個自閉位嘅二人座，靜靜局食好嘢。

餐牌印晌晒一張張嘅A5紙，主食包括沙律、意粉、薄餅、全日早餐。

飲品選擇亦非常之多，類別分為沙冰、梳打、花茶及多款咖啡系飲品。

甜品當然唔少得，兩頁紙合共有成15款，如提拉米蘇、芝士餅、班戟……等等。

晌收銀落單後，便有個傳呼器，等佢響就即喺食物整好，自行晌櫃枱出餐位攞食物，而餐具就擺晌櫃枱旁。

溫馨提示，呢度叫得全自助，就連食完嘢嘅收拾都要幫幫手，自行將餐盤收拾好。目測所見，枱面上都無乜點見到有啲無收拾起嘅托盤或餐具，可見大部食客都好自律。只可惜，除咗啲花茶茶壺喺玻璃外，其他餐具、餐碟都喺塑膠，否則就喺紙兜，都比較唔環保。然而，如果能夠將廚餘、膠餐具、紙餐具分開回收，晌唔環保之中，再做多少少，都叫做好過乜都唔做啫。

班尼迪克蛋 $98
講賣相，就肯定喺差咗少少喇，主要因為兩隻班尼迪克蛋嘅蛋白部份睇起嚟煮到散咗，無咗尼迪克蛋盪吓盪吓嘅誘惑感。不過，基本上味道就唔太大影響嘅。題外話，咪睇隻白色餐碟以為喺瓷嚟，其實喺膠底，而且，圓周大過個木托盤，搞到切嘢時隻碟搖嚟搖去，唔多方便。

切開蛋黃，仲喺做到流心效果，伴上酸酸甜甜嘅荷蘭汁，糝咗少少巴馬臣芝士碎，再墊埋巴馬火腿，整體嘅味道真喺唔錯。不過，仍有改善空間，第一就喺巴馬火腿炸得乾身咗，去走咗啲油香，其實，小弟就覺得唔需要炸，烘番暖就可以；第二就喺個英式鬆餅包底，雖然烘過，但似乎烘過籠少少，有些微乾，加上把膠刀真喺唔太夠力，切起嚟有點韌嘅感覺。

相反，要讚讚嘅喺啲伴菜，啲沙律菜咬落「索索聲」，故然新鮮爽脆，淋上經處理過嘅黑醋，酸香細緻；而啲蕃茄唔喺普通貨式嘅車厘荷，而喺串茄，更清甜、更多汁，好食。

拿鐵咖啡 $38

杯拿鐵無太刁鑽嘅拉花，但拉得都好細緻，而且，入口口感好均勻，撞奶泡嘅手勢十分好，加上咖啡底好醇和，喺一杯好有質素嘅拿鐵。

蘋果蓉烤批配雲呢拿雪糕 $42

千呼萬喚始出來嚟形容呢個蘋果蓉烤批就最適合，因為拎班尼迪克蛋時，個店員話焗緊，大概要20min後就有，啱啱好我都應該食完份班尼迪克蛋，但點知之後問過幾次都話焗緊，足足額外再等多25分鐘先有。然而，講番個蘋果蓉烤批本身，其實口感、味道確喺唔錯，外皮幾酥香，而蘋果蓉柔滑富蘋果香。以個人而言，如果加入玉桂，以及混入少少蘋果粒，相信味道、口感更有層次。此外，本身配雲呢拿雪糕，可能無晒貨，球雲呢拿雪糕得丁多，故就搭多球冧酒提子雪糕，兩個雪糕都正。