牧羊少年咖啡館 The Alchemist Café Bistro：懶羊羊嘆個Tea

無事不入將軍澳，之前都喺因為行山先入到嚟，今次就梗唔喺行山啦，大佬，成35°C喎，雖然小弟身體狀況都唔差，但都怕怕哋會中暑。今次就因事入到嚟坑口嘅香港單車公園，趁空就順道到訪「牧羊少年咖啡館」食番個下午茶。

由坑口地鐵站過嚟頗為方便，行10分鐘左右就到。而餐廳環境非常之大，而且，樓底十分高，空間感十足。再者，枱椅排列唔擠迫，加上對出一列落地玻璃窗，好似今日晏晝咁，陽光普照，令人感覺更有活力、醒神。

餐廳採半自助形式，自己搵位，晌櫃枱落咗單，再由店員將食物送上。而基本餐具早已放晒晌枱上，其他嘢如調味料、額外嘅餐具、牙簽……等等均晌出面自助區都會搵到。

食物選擇方面，點餐櫃枱旁標示晒出嚟。

唔想「戇居居」企晌度睇，拎本餐牌埋位慢慢研究都得。種類大致可以分為二人、四人套餐、午餐、下午茶餐、薄餅、單點小食、甜品、飲品。

京都春日 $75

紅紅綠綠，窩夫烘得靚仔，所以，賣相幾討人歡心。窩夫入口非常香脆，裡面好綿密，但蛋香味唔算濃，而士多啤梨有點酸，反而士多啤梨果醬則頗甜，夾埋啲忌廉食都好唔錯。而兩球綠茶雪糕好大個，算幾夠茶味，帶點點甘苦。

焦糖朱古力芝士餅 $35

件芝士餅嘅雲石紋做得幾靚，咪睇佢個樣好似好乾咁，查實就唔喺，晌儲存方面做得幾好，出面有啲餐廳會雪到件餅乾晒架。最上層嘅芝士打得幾柔軟，芝士味也不俗；中層嘅朱古力芝士就有啲顧此失彼，因為朱古力味唔夠突出；下層嘅消化餅底小弟就覺得厚咗啲啲。講咁耐，無提及焦糖，其實表面嘅雲石紋索性用焦糖漿去做，突出個主題就仲好，所以，整體件餅嘅質素喺唔失禮，但覺得可以做得更好。

黑糖卡布奇諾 $32

面層無一層厚厚奶泡，反而拉花拉咗隻天鵝，而且，入口似鮮奶咖啡多過似卡布奇諾，不過，杯「鮮奶咖啡」本身確喺幾好飲，醇香，撞奶泡均勻，口感順滑。之但喺，既然拉花隻天鵝咁靚，再灑啲黑糖粉就整花晒個拉花，感覺有啲可惜啫。

荔枝蜜瓜鮮打綠茶 $42

綠茶底打得夠清香喎，綠茶內有少少纖維，相信喺嚟自啲荔枝及蜜瓜肉，不過，除茶味，荔枝嘅味道就突出啲，蜜瓜嘅味道就唔喺好覺。晌炎夏，呢杯綠茶就好透心涼，唔會太冰，飲落感覺好舒服。

凡惠顧都會送返張午市（$5）及晚市（$10）現金券，不過，再睇睇後面嘅使用條款，限星期一至五使用都無乜問題，但只限將軍澳店就用唔着喇，小弟有幾何入嚟吖，都喺啱啲附近住嘅街坊客多。

枱上仲放咗個儲印花換美食嘅推廣牌，消費$60就有一個印花，儲齊7個就免費換到一客指定小食或甜品，雖然無睇過啲條款，但相信間間「牧羊少年」都用得，對比起啲現金券，嚟得更有實用性。

外面雖然好熱，熱到爆炸，但坐晌裡面，環境「涼枕枕」，不知幾爽。食啲甜點，飲杯熱啡，悠閒咁渡過一個懶洋洋嘅炎夏下午。

個人評分
味道：8/10
環境：8/10
服務：7/10
抵食：8/10
平均每人消費：HK$97

餐廳資料：
牧羊少年咖啡館
將軍澳寶康路105-107號香港單車館地下G53號舖
2632 7107