馬丁王越式法包 Vuong's French Sandwich：越食越有脆

表甥生女年初先去完胡志明，又話九月中去蜆港，我話使唔使去越南去得咁密呀？佢話機票平，食住又平，玩三五日輕鬆吓，叉叉電，不知幾爽，而且，啲嘢又啱佢食，尤其越式法包，佢話特別鍾意。聽佢咁講，不如帶佢試試佐敦嘅「馬丁王越式法包」，差唔多4年前食過一次，印象記得確喺有水準，而且，夠正宗。

不過，事前都講明佢知，「馬丁王」屬小店，店舖細細，主要喺做外賣，買完都喺企晌門口食，佢話仲好啦，夠地道風味。鋪面貼有唔少食物嘅菜單，但拎張單張慢慢研究就仲方便，除越式法包，其次仲有兩款飯類、越式撈濛、小食、三文治及飲品，整體定價都好大眾化。

順帶一提，越式法包有大、小、迷你呎吋供選擇，食多食少彈性大啲。而且，所有越式法包都會夾埋芫茜、辣椒、酸蘿蔔絲、青瓜、蕃茄，呢埋配料亦可以揀多啲、少啲，甚至乎全走，真正貼心嘅政策。

燒豬頸肉越式法包（小） $40、生死戀（青檸+鹹檸雪碧）+$10

目測細份大概有8吋長，塞滿好多酸蘿蔔絲、青瓜絲、蕃茄、芫茜，小弟就無要求加多或減少，喺正常份量，裡面最入先見到啲燒豬頸肉。一啖過咬落去真唔喺件易事，然而，法包外層超脆，包心軟綿，所有食材混合所帶出嘅味道紛陳，清香酸爽，而豬頸肉質感爽脆，喺覺得啲肉偏少。至於杯生死戀，鹹鹹酸酸，最緊要夠凍，入口爽晒。

燒豬肉條越式法包 $40（小）、青檸雪碧 +$10

表姨甥女就覺得燒豬肉條特別，就點客細份嚟試，跟我嘅越式法包差唔多，只喺換上燒豬肉條，燒豬肉條食起嚟雖有點點油膩，但配搭上酸蘿蔔絲、青瓜絲、蕃茄、芫茜等等配料，感覺仍然好清爽酸香，加上脆口嘅法包，口感豐富。表姨甥女就大讚跟晌嗰邊食嘅一樣！

由於所有越式法包都喺即叫即焗，製作需時，唔想等喺可以打定電話嚟落單。越式法包中，仲有一款以素肉做嘅素越式法包，下次可以帶老婆嚟試吓。

個人評分
味道：8/10
環境：6/10
服務：7/10
抵食：8/10
平均每人消費：HK$50

餐廳資料：
馬丁王越式法包 Vuong's French Sandwich
佐敦德興街1號B4地舖
2658 3800