初初嚟到都未喺咁多人，越坐就越多後生仔女嚟幫襯，確實，環境又幾舒服，尤其坐晌啲梳化椅之上。
之前已睇過相關食評，望過吓啲餐牌做參考，專登揀2:30pm嚟，因為午餐仲有供應（12:00-5:30pm），但又開始可以點下午茶餐（2:30-6:00pm），咁我哋想食正餐又得，輕啲點個茶餐都得，皆大歡喜。再者，兩者都選擇不少，尤其下午茶餐，將雞蛋仔、西多士加添新意進行二次創作。結果，我哋點咗一客午餐跟兩客茶餐。
餐具、基本調味料早已放好晒晌枱上，而最得意喺啲餐碟仔，隻隻圖案都唔同，印上一啲打氣或祝福字句，如：Good Luck Day、Today is Nice Day，令人睇到心情都正面啲。
什菌忌廉湯（午餐）
午餐其實都幾抵食，包餐湯/碗仔翅及餐飲，定價都喺$58-$88。揀咗餐湯，睇落又大碗，又多料咁，質感唔錯，由於保持粒粒菌粒，所以，有口感大於滑溜感，但就頗有菌香。
龍蝦汁海鮮意大利飯 $78
七十零蚊有個意大利飯，都有擔心會唔會將貨就價，流流哋，不過，當送到上枱，就真喺真材實料幾堅咁，兼且賣相有睇頭。啲意大利飯沾滿龍蝦汁，濕潤而香濃，雖然口感未似到正宗嘅意大利飯仲有啲「硬」心嘅感覺，似似哋台式燉飯咁，但飯粒分明；至於啲海鮮料，無欺場喎，有大蝦、青口、蜆、魷魚及大量蟹籽，質素不頗，比預期有驚喜。
和牛豬仔包漢堡 $68
老表就想試其豬仔包漢堡，成份包配埋黑醋沙律菜及脆薯格，而且，個包亦唔細，當正餐食都可以。其實，個包裡面有好多餡料，包括漢堡和牛肉、芝士、蕃茄、紫洋蔥、生菜及特別嘅醬汁，包身極之脆口，牛肉鬆化而富肉味，醬汁酸香有層次，好好食，喺啲薯格嫌佢未夠脆啫。
紫薯吉士法國西多士伴雪糕 $68
未食過咁「豪華版」嘅西多士，難得店主又諗得出咁樣搞法。以一個中式磚瓦罉為盛器，感覺都已經幾破格，西多炸得金黃，配上紫色蕃薯蓉、黃色吉士，加上爆谷、雪糕球，雪糕球之下，原來仲有啲焗棉花糖，賣相繽紛，食落去又真喺幾唔錯喎，估唔到咁嘅組合夾得到，尤其啲紫薯蓉香甜好綿，順帶一提，啲西多應該唔喺搵方包整，因為橢圓形一件件，疑似喺法包，但無向店員求証，唯覺得炸得嚟有少少油膩，幸而配合埋其他食材先無咁覺。
街坊蒸餾咖啡
既然店家都刻意寫明喺蒸餾咖啡，就即管點嚟試試，入口又幾醇香，有點兒果香味，最欣賞喺佢哋有將啲牛奶溫番熱，難得小店都肯花時間咁做，心意嚟。
港式奶茶
雖然唔喺茶記，但老表就想睇吓佢哋沖奶茶沖成點。佢話個茶底唔錯，只喺略嫌未咁滑啫。
女神 +$8
餐飲可另加$8轉藍蝶花凍飲或街坊汽泡水，所以，貪得意就嗌咗杯街坊汽泡水「女神」，以柑桔、百香果、芒果、藍橘沖泡出嚟嘅女神，一身青綠，晌炎夏望落去讓人感覺幾清爽，味道酸酸甜甜，確喺幾得意嘅。
做飲食的確唔易，又要將食物做得好，又要有啲新意，仲要俾人覺得值。今次嚟到「街坊Cafe」，幾款食物都做得唔錯，價位貼地，多款甜點亦有其亮點，但招呼唔會好「街坊」，服務都幾有心。與其晌附近嘅街坊茶記搵食，倒不如嚟「街坊Cafe」，至少都好坐、好招呼先啦。
個人評分
味道：8/10
環境：8/10
服務：8/10
抵食：8/10
平均每人消費：HK$80
味道：8/10
環境：8/10
服務：8/10
抵食：8/10
平均每人消費：HK$80
餐廳資料：
街坊Cafe Kaifong Cafe
旺角通菜街1號威達商業大厦地下1E,F& H號舖
9061 3820
街坊Cafe Kaifong Cafe
旺角通菜街1號威達商業大厦地下1E,F& H號舖
9061 3820
沒有留言:
發佈留言