Express Bar by Lassana：從善如榴

無刻意去留意，但感覺「Express Bar」呢家連鎖咖啡店近年做得唔錯，分店亦越開越多，不過，所開嘅地點都喺唔多就我腳，好似觀塘區、天后區，唔知幾時開到嚟中環區、美孚區？咁啱因事過開天后一帶，路經呢家分店，見到出咗隻法式焦糖榴槤芝士蛋糕（Creme Burlee Durian Cheesecake），法式焦糖、榴槤、芝士都喺心水甜點元素，老婆又鍾意食榴槤，點都要試一試。

法式焦糖榴槤芝士蛋糕 $148

Express Bar嘅出品都非第一次試，尤其佢最初出嘅法式焦糖芝士蛋糕，將薄薄嘅法式焦糖放晌芝士蛋糕之上，印象幾深，今回再加入榴槤在內，自然有一定嘅期望。以小木盒包裝，有種小農場田園風格，外觀討好。

雖然唔知喺用咩產地、級數嘅榴槤，但絕對唔喺揸流攤，因為打開盒蓋，啲榴槤香已經湧晒出嚟，而蛋糕面做成一層嘅法式焦糖，聞落、睇見都覺得吸引呀！

款芝士蛋糕掂喎，榴槤味濃郁突出又夠香，與其聽啲店家點吹點吹咩咩咩榴槤，倒不如相信自己嘅味蕾，佢哋無講用咩榴槤，但食得出喺靚嘢；此外，嗒落有帶有芝士嘅鹹味，整件蛋糕嘅質感柔滑，餅底薄而鬆化，好有個性。

今次佢哋嘅芝士蛋糕仍保持一貫嘅高質，確喺值得推介，尤其喺啲榴槤控，應該唔好錯過囉。

個人評分
味道：9/10
環境：-/10
服務：-/10
抵食：-/10
平均每人消費：HK$37

餐廳資料：
Express Bar by Lassana
銅鑼灣興發街88號地舖
3184 0882