莆田 Putien：捧福開懷

一年一度到鑽石山墳場掃墓，以往就會晌返附近搵食，今次就同家人落咗荷里活廣場食晏。認識福建菜、福建嘅食材，都喺始於「莆田」，其實，晌香港賣福建菜嘅餐廳都屬小眾，唔似得京川滬呢幾個菜系。故此，帶佢哋試試咩喺福建菜，不經不覺，佢已經喺米芝蓮一星餐廳。

呢家分店幾年前都有幫襯過，店內環境骨子古雅，餐廳源自新加坡，故又有點點馬來懷舊風。因為我哋都嚟得早，出面大堂位差唔多坐滿人，而裡面陸續先開始慢慢有客。

無論鋪面，還是枱上，都有介紹福建產嘅蟶子，比慣常食海鮮所見嘅蟶子短啲，但就肥啲，既然喺推廣緊，都點咗一客試試。

不過好搞笑，餐牌印有8款食法，但點菜時店員話只得冰爽酒糟蟶子及薑蔥炒蟶子兩款，真喺有少少理解唔到。原本我哋嘅心水喺鐵板鹽焗蟶子，唯有退二求其次，揀咗薑蔥炒蟶子。

九轉小腸 $79

呢道前菜喺「莆田10醉」之一，喺頗有特色嘅心機菜嚟，點解？將啲豬腸去晒內壁肥膏，一圈又一圈捲成，正所謂九轉之意喇。故此，食落有少少爽爽哋嘅感覺，加上滷得入味，就算喺大腸，都絕不邪惡。

薑蔥炒蟶子 $99

以薑蔥炒都喺處理海鮮嘅好做法，一碟望落去好似唔喺好多，但都已有十多隻，且勝在啲蟶子肉真喺頗肥美，有肉地，亦都挺鮮甜，帶有薑蔥嘅香味。

酥炒芋芯 $89

芋頭嘢一向喺老婆嘅至愛，所以，點一客嚐嚐。唔似賣相似似哋潮州菜嘅反沙芋，就連味道都有啲似添。據介紹，雖然叫炒芋頭，但做法卻喺先煎，再炸，然後以沙糖再兜炒，故此，入口外層有份香脆感，而內裡芋香酥化，怪唔之得咁似。

馬來風光 $78

加多道蔬菜平衡吓，講特色嘅呢道「馬來風光」名就夠特別，其實就喺炒通菜，不過用上馬來西亞嘅參巴醬，所以，啲菜食落鹹香而微辣，非常惹味。仲有，食剩啲醬唔好嘥，等陣用嚟撈米粉都正。

興化炒米粉 $78

興化炒米粉喺店家另一道招牌菜，特別在於米粉超幼細，所以，專登點嚟俾家人試。再食，都保持到水準，啲米粉幼細得比天使麵仲要幼，頗似「超力」嘅銀絲米粉，粉內混有蝦仁、蜆肉、紫菜、花生、西芹等等，食材豐富，撈埋上面啲參巴醬，好食。

餐廳嘅環境本身都幾舒服，招呼唔錯，茶錢$9位（好香嘅菊花茶），小食$9（酥炸頭水紫菜），價位都OK，重點喺有啲特色菜俾到大家試吓嘛！

個人評分
味道：8/10
環境：8/10
服務：7/10
抵食：8/10
平均每人消費：HK$130

餐廳資料：
莆田 Putien
鑽石山龍蟠街3號荷里活廣場2樓214舖
2111 8388