S³ 186：美食3次方

本來就只喺約老表交收，我無飯開，佢又無飯開，就不如約埋食番餐。就一就佢，晌番佢屋企附近搵食，就推介呢一間新開無耐嘅小店「S³ 186」。

估唔到雖然喺小店，但裝修上都花咗好多心思，近門口閃爧爧嘅月兒彎彎，絕對喺打卡點。而入口呢邊因為設有酒吧區，所以，座位唔多。

不過，轉向另一邊，就有好大嘅空間，仲滿天掛上小燈泡，猶如天上繁星，加埋枱上唔同嘅星體枱燈，完全喺個好令人有想像空間嘅環境。再者，枱與枱之間都好闊落，讓人坐得舒服。

翻一翻餐牌，食物選擇非常之多，此外，更有不少期間限定菜式、時令生蠔、蟹肉盛宴……等等。而優惠主食一份，可以加$48轉為套餐，就多咗餐湯、沙律、飲品及甜品，真喺無理由唔加架。

田園沙律
簡簡單單嘅沙律菜、車厘茄、青瓜、粟米粒，再淋上胡麻醬，清新開胃，食食吓，原來裡面仲有少少水牛芝士，實在喺點點驚喜。

是日餐湯

餐湯會配上蒜蓉包，而是夜嘅餐湯喺洋蔥忌廉湯，口感幾滑溜，好有奶油香味，最緊要喺夠熱焫焫，好怕啲湯喺凍嘅，西班牙凍湯例外。

黑松露野菌意大利飯 $88
一向都幾鍾意食意大利飯，因為可以真正試到師傅嘅實力，加上只賣$88，感覺幾划算。一上枱聞到陣陣黑松露香，而入口亦好有黑松露味，加上混有唔少野菌，飯粒亦煮到好有咬口，確喺做得唔錯。

巴伐利亞脆香豬手 $188

據店員講，雖然未必好多人點，其實，呢一道喺招牌菜嚟，我都好耐無食過德國豬手，所以，今晚就大快朵頤。一整份豬手連埋薯角、野菜非常有睇頭，豬手外皮勁脆口，其實切嗰吓已感受到，而啲肉鹹香軟熟，沾上芥末醬，食味一流，再搵啲酸椰菜中和吓，成件事就喺咁夾。就連薯菜都好食，用上厚身薯角，風味十足，啲菜都唔喺普通嘢，俾咗意大利青瓜、蜜糖豆，都值得加佢分。

即磨咖啡、熱奶茶

嚟到啲西餐廳就梗喺揀咖啡啦，比較穩陣啲嘅選項，而杯咖啡其實又無話太特別，都夠香醇嘅，但就唔會有咩驚喜，但啲奶打熱咗，仲有啲奶泡添；相反，老表就話杯熱奶茶普普通通咁囉。

朱古力奶凍

雖然只喺太餐嘅甜品，但做得好認真，睇賣相就知無馬虎，非常靚仔。奶凍口感比較挺身，而朱古力味好濃郁。

雖然小店一間，但今餐飯都有啲驚喜，尤其喺個豬手，侍應都喺啲後生仔女，招呼殷勤，而且好有禮貌，讓我哋兩老表可以慢慢食、慢慢傾。

個人評分
味道：8/10
環境：8/10
服務：8/10
抵食：8/10
平均每人消費：HK$205

餐廳資料：
S³ 186
地址：深水埗北河街185-187號地舖
電話：3468 8348