覓 ‧ 甜 ONE ‧ SWEET：真材實料

正準備由「寶萊街」行去黃埔港鐵站，偶然望入條巷仔見到呢一家小店「覓•甜」，除因為晌條巷仔中佢顯得燈火通明之外，更寫住手工甜品，就幫襯吓買咗兩客糖水返屋企食。

雖然無入到鋪內，但從外面都睇到入面喺點，鋪內好細，望落都喺得幾張枱仔，而外面有啲立食位，因為明顯啲櫈點都唔啱高度俾人坐晌度食。而所以食物選項，就晌晒鋪外嘅磚牆之上，一眼睇晒，仲圖文並茂。

芋圓陳皮紅豆沙 $26

呢一款甜品喺本期特價，不過，都只喺比正價平兩蚊。拎上手時，已覺得好足秤，揭開撈兩嘢，絕對喺真材實料，碗內好多紅豆，唔會得啲糖水，加上有微微陳皮香，而啲紅豆好清甜，且煲得好軟綿，再者，啲芋圓軟糯煙韌，每樣嘢都好食。

花生麥米粥 $20
麥米粥呢款懷舊糖水，依家都好少鋪有做，真喺賣少見少。成碗糖水都顯得一片金黃，同樣真材實料，睇都睇得見有好多麥米，而且，啲麥米好有咬口，加埋混有唔少花生粒，整體確喺唔錯。

呢個價我都覺得抵食，點知臨行到去黃埔站時，有家「一豆花」，所有特色豆花賣$8，其他傳統港式糖水都喺$9-$13，真喺平到唔信，下次再嚟點都買碗豆腐花走。

個人評分
味道：8/10
環境：6/10
服務：7/10
抵食：8/10
平均每人消費：HK$23

餐廳資料：
覓 ‧ 甜 ONE ‧ SWEET
地址：紅磡湖光街1-7號聯成大廈地下3號舖
電話：5519 1503