山區裡的走走趯趯: Plato Cafe & Bistro：高質二人餐

工作關係，間中要在大陸山區跑呀跑，周圍走走趯趯（音：笛），所去的都是窮鄉僻壤，雖然靚景欠奉，但身處農村時，就自然有種令人感到寧靜、安然的感覺！在城市忙碌地做呀做，都是為了賺得三斗米，不過，慶幸有餘有剩等我都可以出外隨處盪，不單只見識一下不同地方的風土人情，還可以調節一下知足的心靈。小弟的旅遊足跡，可暫時瀏覽以下網址：http://travel.openrice.com/traveller/userdetail.htm?userid=49632

2024年1月10日星期三

Plato Cafe & Bistro：高質二人餐

都無約單車老死食飯好耐喇，所以，趁佢無咁忙，就搵佢出嚟聚一聚，就佢返工嘅位置，相約過嚟佐敦一帶，晌網上搵到呢間「Plato Cafe & Bistro」，風評不俗，位置好，食完大家各自搭車都方便。

雖然只喺周中，但餐廳極旺場，目測都有9乘滿，而餐廳嘅環境幾好，一室咖啡店木系裝修，配以燈光，牆上有好多食物繪畫，感覺溫馨舒服。店員嘅服務都好細心，會主動俾個布籃你擺袋，又主動添水收拾，服務頗為熨貼，而且，都好有禮貌。

餐具、糖包、牙簽就放晌枱上一旁，擺放整齊，份量充足，其實，亦反映到服務一環，晌預備上交足功課。

摺頁式嘅主餐牌，打開一睇就有齊所有菜式，包括湯品、沙律、薄餅、前菜、主菜、全日早餐、意大利麵、意大利飯、甜品……等等，選擇非常之多。

如果想食抵啲，就梗喺揀晚市套餐啦，包是日餐湯、主食及基本飲品，而主食都有成14款選擇供應，應該都唔難揀。

再想食得好啲、又抵啲，就不妨晌兩款二人套餐中落手，一款賣$498，另一款賣$546，同樣包前菜、餐湯、主食、甜品及飲品，計落確喺幾划算，最後我哋就揀咗$498個二人餐，因為睇落都已經好豐富。

天婦羅魷魚鬚

3款前菜中，沙律、薯條當然食得多啦，反而呢個魷魚鬚真喺少食，所以梗喺揀佢。唔喺講笑，雖然只喺前菜一道，但喺份量都幾多，滿滿嘅一大兜，魷魚鬚軟熟柔韌有口感，加上外層脆漿好薄，沾上自家製他他醬，食味一流，真喺一件接一件食個唔停口。

粟米忌廉湯
跟住就喺餐湯登場，是晚嘅餐湯喺忌廉粟米湯，相對上算喺無咁特別嘅西湯之一，不過，做得都唔欺場，口感調得綿滑，好有濃濃嘅粟米香味。

龍蝦汁虎蝦意大利飯

當一間餐廳有意大利飯供應嘅時候，小弟就偏好會揀呢一款菜式，因為我成日都講，煮意大利飯唔難，但喺煮得好食唔易，好考師傅手勢。眼前呢碟虎蝦意大利飯個人嚟講真喺接近滿分，因為先講賣相，已經非常靚仔，飯粒沾滿汁醬之餘，望落唔會太水，無過多汁醬嘅問題，兩大隻虎蝦煎得金黃，擺盤夠立體，已鎅背處理，方便食用，而食落蝦肉彈牙、鮮甜，真喺無乜挑剔位，飯粒食落就帶點咬口感，最正嘅喺每粒飯都沾滿濃香嘅龍蝦汁，味道好豐厚，加上裏面混有好多野菌、三色椒、蘆筍仔，絕對喺用心製作！

西班牙黑毛猪鞍

老友話牛扒比較食得多，所以，試吓豬鞍，加上貨源嚟自西班牙嘅黑毛豬，自然喺加分位，成品上枱非常有睇頭，大大件豬鞍煎到金黃帶焦香，睇見都流口水，而落刀嗰吓已感受到肉質嗰份鬆化，入口仲有少少爽口嘅口感添，沾上好似帶有香梨味嘅醬汁，更感清爽好味。伴菜方面有焗薯、翠玉瓜，而前者好有薯味，覺得夠軟腍，佐以酸忌廉同啲煙肉碎，實在滋味，後者炒得爽脆，做得一啲都無馬虎。