望月軒 Moon Palace：討人喜「月」二人餐

近來多咗同老婆出街食飯，其實無咩原因，當喺支持吓香港餐飲業，亦可以話喺想試吓唔同嘢。今晚佢要過嚟港島區攞證書，而食友推介，就嚟咗信德中心嘅「望月軒」，因為信德呢度好似進行大翻新，所以，都要兜兩兜先搵到餐廳。

踏進餐廳，環境真喺幾雅致，雖然都有啲傳統中菜館嘅格局，但一來枱櫈排得唔密，二來侍應都好醒目，安排啲客人坐疏啲，隔住枱咁坐，咁大家傾偈都自在啲。

入門口左邊有幾張二人座嘅馬蹄位，其實功能就等同卡位，當然，依家設計成咁就顯得優雅好多啦；仲有，抬頭一睇，啲吊燈都好靚架。

此外，近門口位放咗個魚缸，擺咗好多活海鮮，因此，我哋今晚都揀咗個套餐食，因為品嚐到其中兩款海鮮。

再行入啲，見到幾大罌酒，好奇望兩眼，原來喺自家手工釀造嘅酒，由左至右：有機檸檬養顏酒、天山瑪咖養身酒、梅子酒、野生蟲草松茸酒，每壺定價$68-$108，不過，我哋就唔好酒，否則都可能叫一壺試試。

主餐牌內有好多選擇，主打喺川菜同粵菜，亦有唔少秋冬推廣嘅精選菜式，甚至盆菜都有做。

而我哋就睇啱店家嘅套餐，分別有2人、4人套餐，前者為$688，後者就$1,588，另收茶位$25及加一服務費。睇過散點嘅價錢，好似燉湯都要近百元一客，一份例牌嘅蜜汁火肪又近二百，所以，套餐計起嚟絕對划算好多。

時令燉湯

是夜嘅燉湯喺羊肚菌燉走地雞，撈一撈，絕對喺真材實料，裡面有好多羊肚菌及其他野菌，飲飲吓仲發覺有赤肉、響螺、乾瑤柱，真喺唔怪之得個湯咁香甜，仲要濃而不濁，味道好清潤，老婆超鍾意個燉湯，尤其依家秋冬天氣寒寒哋，感覺更加一流，飲完成個人暖晒。

宣威蜜汁火肪
原來老婆未食過呢道菜式，佢都喺一次食，所以，俾到唔少驚喜佢。其實，除咗浙江金華火腿， 雲南嘅宣威火腿都好有名氣，一客有4件火腿，仲伴有青瓜、炸腐皮、蝴蝶餅，火腿已經處理好，咬落口感軟腍，有少少咬口，並且沾滿蜜糖，味道鹹鹹甜甜好特別，以蝴蝶餅夾埋其他配料入口，有多重口感，食落更滋味。

蒜蓉開邊蒸波士頓龍蝦

餐牌中，其中一款海鮮菜式只可揀龍躉仔或者波士頓龍蝦，我哋就揀咗後者，以大量蒜蓉開邊蒸，底下仲墊咗唔少粉絲，睇見隻鉗咁大隻就知喺波士頓龍蝦，蒸嘅時間啱啱好，我哋輕易就拆晒啲蝦身同鉗嘅蝦肉，大大啖就咁食啲龍蝦肉不知幾過癮，再者啲蝦肉好鮮甜，口感爽彈，又充滿蒜蓉香味，正呀！

板燒薑蔥鮮鮑片

啲鮑片就喺從門口嘅鮮鮑切出嚟，所以，絕對夠晒新鮮，睇相都見用上大量薑片、香蔥去爆炒，又充滿鑊氣，所以，味道喺充滿薑蔥香味，鮑片切得好夠薄身，咬落爽爽哋，一啲都唔韌，非常好食。

翡翠有機時蔬

接近尾聲，就喺清清哋嘅時蔬登場，時蔬主要喺白菜仔同黑木耳，伴有少少甘筍絲，當然單睇食材就唔喺咩特別嘢，不過，標明有機就信佢有機，叫做新鮮有營養，加上用咗上湯浸，好夠味，食到尾其實啲湯都可以飲埋唔好嘥。

養顏冰糖銀耳羹
作為一個套餐，梗係唔少得糖水啦，呢個銀耳羹入口非常之清甜、滋潤，好啱秋冬呢個時候食；而啲雪耳煮到透晒，口感軟滑，最欣賞喺加咗啲馬蹄粒粒，添加咗一份粒粒爽口感。

老婆就超滿意今餐飯，尤其個燉湯，喺佢嘅是晚心水推介，而我就好喜歡過蜜汁火肪。綜合而言，環境夠靜侷，好適合一少班朋友嚟聚一聚，加上啲食物確喺做得高水準，而服務都幾唔錯，侍應好有禮貌，整體嚟講喺一次讓人喜悅嘅用餐體驗。

個人評分
味道：9/10
環境：9/10
服務：9/10
抵食：8/10
平均每人消費：HK$406

餐廳資料：
望月軒 Moon Palace
地址：上環干諾道中168-200號信德中心西座3樓澳門廣場3017號舖
電話：2111 4558