皇室宴會廳 Royal Banquet Hall：人多擠「室」

都好多年無入過嚟迪士尼，一來我唔喺迪士尼控，二來樂園入場費都確喺幾貴。老實講，今次 喺作為義工身份入嚟，可以講話喺做啲扶老攜幼，帶吓路，幫大家影吓相、拍吓短片。差唔多到午飯時間，就揀咗響旋轉木馬對面嘅「皇室宴會廳」食晏，諗住價位相宜少少。

咪睇個名好似好勁，乜乜宴會廳，其實定位喺個美食廣場。用餐區分室外同室內，不過，唔知點解今日超多人（非假期嘅閒日） ，就連入餐廳都要排隊，不過，排隊唔喺安排入座，佢只喺控制人流，入到去都要自己搵位，無人招呼。周圍都喺人，最後就搵到戶外一角落嘅枱，靜侷少少。

正如上述所講，呢度喺以美食廣場形式營運，不過，就喺先去各分區攞咗食物後，再到收銀櫃枱俾錢。一入到各食物分區你會見到喺分開幾條隊，視乎你想食邊一大類嘅食物。好似我哋咁，一個食薄餅，一個食炒飯，因為喺兩個唔同嘅大類，所以喺要分開兩條隊攞。如果你人多可以分兩邊排，如果得你一個負責買嘢，就要排兩次，好唔方便。

晌一排收銀枱附近，擺放咗好多個凍櫃，放置好多飲品，又喺隨意揀，到時一次過俾錢。

而食物嘅選擇真係喺唔算多，喺門口排隊時候見到個餐牌，一眼睇曬，不過，入到食物區，又多咗一區和食。入得嚟食嘢都知貴，就算只喺個碟頭餐百零蚊都走唔甩。

意式肉腸薄餅套餐 $140
個薄餅有直徑八吋大，一個人嚟講好夠份量，所謂套餐就即喺加多杯汽水，原先對呢類美食廣場式嘅食物都唔抱太大期望，不過，成品又真喺有少少驚喜喎，首先就賣相似模似樣，其次，非常多餡料。由於夠客源，所以，喺人等食物，個批算喺新鮮出爐，入口熱焫焫，批身幾軟熟，有麵粉嘅香氣，加上鹹香嘅餡料，濃郁嘅芝士，食得滋味。汽水喺「百事」可樂唔喺問題，不過，似擺咗好耐，走晒汽就喺問題。

鮑魚海鮮雞肉炒飯套餐 $165

老婆就揀咗個炒飯，不過，出嚟嘅製成品同我哋心目中預期嘅有啲出入，唔喺揚州炒飯嘅一類，而喺類似鴛鴦炒飯嗰種，炒飯底跟住上面淋上好多芡汁嘅餸料。其實味道上喺唔錯嘅，個炒飯都夠乾身，仲堅有兩隻鮑魚仔，不過有相你睇，現實真喺太多芡汁，正正我老婆就唔鍾意多芡汁嘅碟頭飯。

本來都想坐晌室內，因為天氣都有啲凍，但今日實在好多人，結果就坐咗外邊，似乎人手不足，唔喺好夠人收拾，整體服務一般般！

個人評分
味道：8/10
環境：7/10
服務：5/10
抵食：7/10

平均每人消費：HK$150

餐廳資料：
皇室宴會廳 Royal Banquet Hall
地址：大嶼山香港迪士尼樂園幻想世界區
電話：N/A