山區裡的走走趯趯: 再臨閣 The Haven：春「臨」大地食餐好

2024年1月11日星期四

再臨閣 The Haven：春「臨」大地食餐好

睇返啲食評紀錄，原來都有成大半年無食過自助餐，其實，近幾年都少咗食自助餐，因為好老實，無以前咁有食力。不過，一班朋友約出嚟聚一聚，揀食自助餐就方便到大家各有所好，而且，流流長食成晚，大家就可以盡情咁傾，而今次就嚟到尖沙咀「港青」嘅「再臨閣」餐廳。

雖然成日聽人講北上消費，但今日雖然喺週中，但估唔到全場坐滿，真喺有少少意外。環境裝修摩登，但殺食位就喺對住文化中心一面全部落地大玻璃，所以，景觀開揚。

依家感覺香港好似無咗個冬天咁，凍一個星期就暖和返晒。將快又過年，依家都唔知算唔算已經踏入春天，姑勿論點，今晚嘅自助餐主題「春日盛宴自助晚餐」就有多款菜式環繞春季而設計。價錢方面，平日成人嘅原價要$668，不過，實際喺有59折，折實咗收$460，確喺抵食。

整個場地嘅格局都算幾歸一，一入門口右邊就喺食物區，順路直入，左右兩邊擺放晒各款食物，唔會東一忽，西一忽。

沙律、凍肉盤、生果

自助沙律吧唔算喺好大陣容，有兩款沙律菜，十零款配料，5款醬汁，以及4款預製好並頗有特色嘅沙律，如椰菜花米沙律、黑醋野菌沙律，。此外，仲有幾款凍切肉，如莎樂美腸、無骨黑椒豬柳，又有自家製嘅鵝肝醬添。晌甜品區唔邊，仲放有幾款新鮮生果，有新鮮菠蘿喎，小弟實唔會錯過啦。

打頭陣就梗喺一份豐富嘅頭盤啦，將上述嘅沙律、凍肉盤、生果樣樣執啲，砌成一大碟超級頭盤，望見都正啦。啲食材食落確喺新鮮，預製好嘅沙律都好好食，加埋啲新鮮生果，呢個頭盤夠晒高纖、有營，又清爽怡人，絕對喺令人大開胃口嘅前奏。

海鮮吧

雖然無生蠔供應，但所提供嘅凍海鮮有波士頓龍蝦、龍蝦鉗、琵琶蝦、松葉蟹腳、龍蝦仔、熟蝦、大蜆及青口，再佐以幾款汁醬，如辣椒豉油、泰式魚露、咯嗲汁及檸檬角。如果想食蠔都唔喺無，晌熱盤區就有芝士焗蠔，為安全理由而唔提供生蠔，改而做成熱盤菜式都喺好多自助餐慣常做法。

為咗回吓本，食凍海鮮喺走唔甩嘅選項，又喺砌咗一大碟凍海鮮返嚟，老實講款款都有質素，波士頓龍蝦啲蝦肉好爽彈，仲要有咁多膏添，真喺無得頂啦！啲龍蝦鉗拆咗半殼，一拉出嚟就有得食，啖啖肉，爽呀！而其餘嘅海鮮味道鹹鮮，可以講絕無欺場。

餐湯、麵包籃、芝士拼盤、冷盤小食
跟住落嚟介紹下餐湯，一般自助餐都會供應一款中湯，一款西湯，呢度就有藥膳瘦肉湯同南瓜忌廉湯，而麵包籃內有多款軟包、硬包。芝士方面，都提供有成4款，包括藍芝士、高達芝士、金文畢芝士及車打芝士，呢幾款芝士我都好鍾意食。漏咗介紹，晌沙律區附近仲有數款做得精緻小巧嘅冷盤小食，如煙燻黑魚籽雞蛋、櫻花蝦豆腐、黑松露蜜桃半芝士、紫蕃薯柚子沙律球 ……等等，都好有亮點。

食完一輪頭盤、凍海鮮，都喺時候飲少少湯暖番個胃，小弟就揀咗南瓜忌廉湯，再額外加少少鮮奶，飲落就更加滑溜，南瓜味又夠突出，再搭之前介紹過嘅鵝肝醬多士，完全喺高級組合。另外為咗試幾款芝士，再配個歐陸小圓包，亦都好好食，而冷盤小食就揀咗黑松露蜜桃半芝士及紫蕃薯柚子沙律球，前者味道複雜，個人覺得未必個個都接受到，但後者就真喺好好食，紫薯蓉打得幼滑，裡面又有粒粒爆汁嘅柚子肉，食得過癮！

刺身、壽司

本身都喜歡食刺身、壽司，不過，平常食自助餐就好少揀，因為覺得大多數都喺普通嘢，但點都要講兩句，睇相都見款式唔喺好多，反而，側邊有一款即做壽司七彩蝦片，原本都諗住試下，不過影完晒相，之後已經遺忘咗，抱歉介紹唔到俾大家知喺乜嘢嚟。

熱盤、即煮檔口
喺時候介紹另一重頭類別，就喺熱盤同即煮檔口呢個大片區啦，介紹幾款焦點菜式先，分別喺海鮮喇沙、慢煮鮑魚、燒美國肋骨牛肉、扒大虎蝦，啲賣相非常吸引，雖然啲鮑魚、虎蝦每次限攞一客，但後段大家都食飽晒之際，已經無限咁任攞

跟住，就再一口氣介紹埋其他熱盤，無影太多相，唯有文字記錄，俾大家參考吓：香草燒T骨羊扒、炸薯絲蝦卷、芝士焗蠔、魷魚仔墨汁麵、柚子蜜黑豚肉、燒新薯、黃金鍋鈀、香草牛油焗法國田螺、醬燒雞、蜜餞三色甘筍、蒸比目魚、日式牛肋條。

人大咗，胃納有限，所以，都精華啲揀最心水嗰幾款，再件少少燒新薯同蜜餞甘筍，扮晒成碟主菜咁。鮑魚果然好入味，口感柔韌有咬口；肋骨牛肉正呀喂，好有肉味，而羊扒無得輸，煎得係香，肉質軟腍；扒虎蝦亦都好正，蝦肉極之彈牙，充滿蝦鮮味！

未介紹甜品之先，印象中大槪7:45pm-8:00pm之間，突然見到門口甜品區堆滿人，原來有啲互動環節，餐廳餅廚做咗一款超長形嘅蜜糖蛋糕，會搵啲食客為此灑上食用鮮花，令其賣相更洋溢出一份春日生機處處的暖意，非常有意思！

甜品、雪糕
所有甜品都放晒近門口嘅一角，所以，一入餐廳，多多少少都被啲色彩繽紛嘅甜品所吸引。因為小弟工作關係，加上自助餐6:15pm就開始，所以，未能影到所有蛋糕嘅完整全貌，不過，單睇款式都應該幾唔錯，一邊長枱放有花彩杯子蛋糕、柚子蜜糖布甸、白桃奶凍、櫻花水玄餅、花盆杯、香橙西柚蛋糕、鮮花蜜糖蛋糕、蜜糖芝士餅、草莓撻；另一邊仲有桂花小丸子、豆腐花、即做班戟、心太軟、暖蘋果撻，所以，款式確喺唔少。此外，仲提供Häagen-Dazs雪糕，口味會不停轉款。