彩龍大酒樓 Lucky Dragon Restaurant：「龍」情不變

母校搞咗個重聚日，我哋好幾個舊同事約埋返去走一轉，之後，當然要聚一聚食埋飯啦，因為呢個組合真喺自疫情以嚟都無見過。近近哋，就搵番當年久唔久都會幫襯嘅「彩龍大酒樓」。

真喺估唔到，呢間屋邨酒店屹立到咁多年，就算疫情都無事，今晚（星期六）都坐得好爆。整體裝修就好街坊酒家嘅格局，算得上乾淨企理，加上我哋得9個人，安排張12人枱，當然坐得鬆動舒服。

燒鵝皇（半隻） $228

好多時啲酒樓都有自己啲燒味部，啲出品一向都唔差，所以，我哋叫咗半隻燒鵝皇，單睇賣相真喺有板有眼，而食落一啲都唔失禮，皮脆肉嫩，好甘香，之後用埋啲混有鵝油嘅汁嚟撈落糯米飯度食，包你食到另一個層次嘅味道。

雙冬羊腩煲 $268

以前就話冬天先有羊腩煲，依家咩時候都見到羊腩煲嘅出現，不過，都喺冬天先嚟食羊腩煲感覺好似滋味多啲。滿滿一大煲羊腩，滾住食份外芳香，而啲羊腩好軟腍，微微羶香，正呀喂，裡面嘅冬筍、枝竹嗦滿汁同樣好味。

XO醬小炒王 $98

港式小炒中，叫小炒王多多少少喺情意結，間間餐館嘅小炒王都大同小異，都喺土魷、蝦乾、韭菜花、腰果……等等，有啲就會加埋豆腐乾、菜譜之類，咁呢度用埋XO醬炒，自然更加惹味香口，而且份量十足，喺大排檔餸啤酒嘅最強之選。

鳳梨生炒骨 $88

食小炒嘅另一情意結就喺生炒骨，因為酸酸甜甜 餸飯一流，況且唔會晌屋左煮，因為有難度。啲生炒骨我覺得比較大件，所以，食起嚟相對啖啖肉，而最欣賞嘅喺啲汁酸香得嚟唔嗆喉，而且，緊緊好掛滿晒每嚿肉，無多餘嘅汁醬。

香煎枇杷豆腐 $88
老實講，外觀就做唔到琵琶嘅樣，不過，單以質素嚟計，其實幾唔錯，啲豆腐好嫩，魚肉亦打得 軟滑，勾個茨汁亦唔會太身，啱啱好。

豉汁蒸大鱔 $138

似乎我哋揀親都係啲濃味嘅菜式 就好似 呢一碟大鱔， 睇到都覺得正呀，濃濃嘅豆豉香，而啲鱔又大件，卻喺好嫩滑，又滿滿油香，滿意。

椒鹽味果鮮魷 $108

哈哈，又喺碟香口菜式，講明呀，今次唔喺小弟負責點菜架。原來菜名中嘅味果即喺腰果，幾脆口，至於啲鮮魷好軟腍，外層嘅脆漿亦唔會太厚，算合格，至少唔會咬落一口粉，不過，就略嫌椒鹽味唔夠重，比較薄身。

臘味糯米飯 $98

一大棚人梗喺要啲粉麵飯嚟墊肚，糯米飯就最易飽肚架喇，雖然講到明都唔喺生炒，但都無所謂啦。單睇表面就睇唔到啲臘味，其實食下食下都有幾多餡料，而且啲糯米煮得啱啱好，軟糯煙韌 ，喺嫌啲醬油落得唔夠多，味道稍稍偏淡。

乾燒伊麵 $88

一個飯，另一個就要麵，同枱有人想食乾燒伊麵，就順其心意，碟乾燒伊麵炒得都算乾身，食到尾唔會一碟都喺油。

綜合一句，呢度啲定價唔算貴，但碟頭夠大，雖然啲侍應算叫做上年紀，但都幾好招呼有講有笑，同啲客打成一片，始終都喺做老街坊生意。一班舊同學廿幾年後再嚟到「彩龍」聚一聚，講返唔少往事，確係勾起唔少回憶同趣事。

個人評分
味道：7/10
環境：8/10
服務：8/10
抵食：8/10
平均每人消費：HK$145

餐廳資料：
彩龍大酒樓 Lucky Dragon Restaurant
地址：石硤尾九龍仔大坑東道窩仔街
電話：2779 9111