翠河餐廳 Green River Restaurant：自討沒「翠」

秋高氣爽，週末嘅好節目梗係去行山啦，不過今次唔係平時行開嘅行山友，而喺另一班較少行山嘅朋友，所以，揀咗青衣自然徑，短啲，又輕鬆啲。行完之後落返長康邨嘆下午茶，呢度有好幾間茶記，不過見到「翠河」，比較有信心少少。

美孚以前都有間「翠河」，我哋都周不時落去食吓早餐，不過摺咗之後就無機會再幫襯。環境格局就如一般茶記，不過「翠河」有樣好，就喺有啲細圓枱，人多少少嘅話揀圓枱就方便傾偈。

下午茶時段，除咗主要嘅下午茶餐餐牌之外，仲有個額外嘅超值下午茶餐餐牌，同埋一個是日精選餐牌，其實呢個是日精選喺由午市供應到晚市，只不過唔同時段收唔同嘅價錢而已。

乾炒牛河 $47
幾款炒粉麵中，小弟覺得呢個做得最好，一來無論河粉還是牛肉，都份量足，二來炒得有啲鑊氣 ，而且，牛肉亦都好軟腍，河粉上晒色，唔會炒得唔均勻，唯一就喺睇都睇到，稍稍油咗啲，但味道真喺幾好食。

鮮魚湯方魚肉碎泡飯 $47

另一個交足功課嘅茶餐就喺呢個泡飯，個鮮魚湯底真喺鮮甜，加上面頭放咗唔少方魚碎、肉碎，令到整體味道鹹香好味，再者啲飯粒分明，做成泡飯索滿湯之後仍然爽身。

酸菜魚湯飯 $48
除咗上述嘅泡飯，呢個湯飯都做得唔失禮，都算喺幾有酸菜魚嘅風味，不過，朋友就話欠咗少少辣度，再辣啲更具神髓，但對我嚟講就啱啱好，而啲魚非常之嫩滑，當然都知道唔喺咩貴價貨。

泰式炒金邊粉 $47

本來都對呢個金邊粉有期望，不過，失望而回，雖然份量十足大大碟，之但喺味道好單薄，無乜酸甜味，餸料亦好少吓，感覺喺hea炒。

魚香茄子炆米 $49
碟金邊粉都未喺低點，反而呢個炆米就喺今日大家推為最唔抵，雖然唔叫難食，未算喺中伏，不過，完全無乜鹹香味，味道寡，茄子少得可憐，同樣都只喺得個大碟。

即磨咖啡

見佢擺咗部即磨咖啡機出嚟，所以，就試下啲即磨咖啡，話好唔算好好，但話差又唔喺，中規中矩咁啦，有咖啡香，但感覺唔夠醇厚。

今次所叫嘅碟頭，有頭威無尾陣，只可以講揀得唔啱，不過，又點會估得架。綜合嚟講，就喺水準不穩。

個人評分
味道：6/10
環境：7/10
服務：7/10
抵食：7/10
平均每人消費：HK$48

餐廳資料：
翠河餐廳 Green River Restaurant
地址：青衣長康邨長康商場二期地下108-110號舖
電話：3160 4115