若男冰室：慳錢嘅靈丹妙「若」

呢間茶記極之隱蔽，一來佢位處工廠區尾，出咗地鐵嘅人都極少向呢個方向行，二來一睇就知喺攞廠廈食堂牌，所以，門面無名無姓，好易行過都唔知。都喺街坊通報，先知有間早餐只喺賣$22嘅茶記，應該算數一數二平通港九新界。

睇格局唔似茶記，較為似家西餐廳，一來啲櫈比較西化，二來好少茶記啲位排得咁疏，所以坐起嚟 比一般茶記嘅感覺舒服好多，招呼方面，朋友就話麻麻地，不過今次我就覺得無乜太多特別問題，況且出面啲茶記，一般嘅招呼都喺普普通通。

早餐選擇可以講喺分為4大款式，最平嘅$22，最貴都喺$30，一張餐牌仔睇晒，而B款喺日日都唔同，當日就喺雪菜火鴨絲通粉 / 米粉，配多士煎蛋。

仿鮑絲米粉配煎蛋、多士 $22
初入去無為意仲有火鴨絲選擇，否則，老婆話會要佢。至於碟米粉，睇啲湯頭色澤，味道絕對唔會淡茂茂，仿鮑絲就唔喺好多架喇，但米粉份量就絕對唔少，加埋一整片多士、炒蛋，肯定夠晒飽。

火腿絲通粉配滑蛋、多士 $22

小弟就要火眼絲，一心嚟都喺求求其其，填飽肚為本啫，咁嘅價一早無預太高期望。不過，算喺唔錯，至少通粉唔會煮過籠，炒蛋都算滑，份量夠晒足。

熱奶茶、熱檸水
呢兩樣喺我哋晌茶記嘅慣常選擇，小弟杯奶茶OK啦，唔叫好好，亦唔太差嘅，只喺未叫好滑咁啫。

老實講，咁嘅價真喺無咩要求啦，嚟得嘅都志在天飽肚啫。

個人評分

味道：7/10
環境：7/10
服務：7/10
抵食：10/10
平均每人消費：HK$22

餐廳資料：
若男冰室
地址：荔枝角長沙灣道912-914號時信中心地下1號舖
電話：3482 0368