一張L形板前席，喺食「廚師發辦」嘅指定最佳位置，因為可以睇到師傅切魚生嘅刀功、揑壽司嘅手勢，以及跟佢哋嘅互動。再者，啲梳化椅背墊夠厚，坐得好舒服，櫈下亦可以放雜物、背包。人少當然揀住吧枱就最好，人多啲亦有四人枱供選擇。由於防疫關係，枱面已備有消毒啫喱自由取用，唔好見佢哋無放啲隔板，而喺寧願做少幾個客嘅生意，唔使等啲隔板影響晒成個場嘅美觀，將客人安排隔開啲嚟坐。
順帶一提，除環境以和風木系為主之外，近玄關仲有個清酒櫃，嗰時晌「友樂亭」都見到有同樣嘅設定，清酒中有唔少掛住個名牌，原來喺遜客嘅，可見小店甚受歡迎。
此外，酒櫃下面仲模造咗一個「迷你」日式庭園嘅砂石丘，而餐廳內仲有少少日式嘅小擺設，都喺令到餐廳整個氣氛都更日系！
晌呢啲中高檔餐廳，除咗環境，餐具及服務都喺值得留意嘅一環。一碟、一杯都好古雅，就連筷子托都特別別緻，之後盛載之食物嘅器皿亦都賞心悅目；而服務方面，好熨貼，侍應落單時會先問問有無嘢唔食得，或食物敏感，態度既有禮，又不時為我哋添茶及收拾餐具。師傅上菜嘅速度，亦喺恰到好處，令人用餐感到悠閒唔急促。
雖然，一大本餐牌有唔少菜式供選擇，沙律呀、酢物呀、刺身呀、卷物呀、壽司呀……等等，但相信大多數人嚟都喺揀套餐。分別有3個價位，「友樂晚餐」（$580）、「廚師精選Omakase」（$1,180）、「廚師精選Omakase」（$1,300），有平有貴，豐儉由人。而小弟今次喺試試$1,300的「廚師發辦」套餐，因為事前唔知會食乜，但往往食材都帶嚟好多驚喜，喺一次奇妙嘅體驗。
飲品方面，清酒、燒酎、生果酒、啤酒、汽水……一應俱全，反轉後面仲有幾款特飲提供！
晌影吓環境、影吓餐牌，不經不覺師傅就預備好幾款前菜，除有啲薑片外，仲有醃漬嘅牛蒡同蒜頭，前者入口爽爽哋，細嚼後有陣陣甘味；後者入口喺好爽脆，有別平常食到咁軟軟腍腍，有種食緊「酸蕎頭」嘅感覺，非常得意。
時令前菜三款 一切準備就緒，就上第一道菜，亦喺食「廚師發辦」嘅典型安排，三款特色前菜：北海道粟米、青瓜漬配松葉蟹、蓴菜配水母。以日式便當小木盒一次過送上，單喺賣相已有啲先聲奪人嘅感覺，非常精緻而富雅氣，貫徹日本菜一向嘅匠人精細。
師傅更特意提醒，享用都有其次序，先食嘅喺北海道粟米，咪睇佢好似好白會無乜味，食過北海道粟米都知，甜度非常高，而且，粟米味突出。
第二道要試喺青瓜漬配松葉蟹，伴有少少啫喱醋，青瓜配上啫喱醋入口十分清爽，而松葉蟹肉鮮甜無比，以質取勝。
最後喺蓴菜配水母，好在有個哈日朋友，先知蓴菜（音：純）喺啲乜，喺啲浮葉性水生植物，有層透明薄膜包住，口感滑潺潺，好得意。而水母咬落似海蜇，爽爽脆脆，伴以酸醋汁，好清新嘅感覺。
北海道雪解蠔第一道刺身喺雪解蠔，好陌生嘅名字，所以，絕對喺第一次享用，蠔形偏長，師傅處理得好乾脆，亦唔會有蠔殼碎，面頭仲加咗梅酒啫喱，平衡番個海水味。雪解蠔肉質飽滿，入口蠔味重，質感脆身，海水味唔算太重，喺好有質素嘅生蠔。
鮫鰈魚薄切又喺一道極少接觸嘅魚類，第二道刺身喺鮫鰈魚薄切，盡顯師傅刀工，每一片厚薄均一，並且薄至透光，加一朶菊花，灑上點點柚子青作點綴，感覺立時好唔同。魚肉有少少爽爽哋，魚味唔算好濃，但佐以柚子醋，有一份小清新嘅感覺。別忘了菊花下仲墊有不少昆布，都好好食架。
深海池魚第三道刺身喺比較常遇到嘅深海池魚，相信大家都唔陌生，色澤晶瑩而帶淡粉紅，保持一貫光澤亮麗，足見其新鮮度。師傅特登晌刺身上鎅幾刀，増加美觀感，並搽咗醬油，加咗芥末，一啖放入口就得喇，食落肉質嫩得嚟帶爽口，魚鮮味頗突出。
新鮮北寄貝第四道刺身喺北寄貝，但當然唔喺平常晌迴轉壽司食嗰啲紅紅哋嘅平價貨莓，而喺新鮮貨色，外觀已明亮光澤。咬落去質感軟腍，帶少少爽口感，味道喺非常之鮮甜，輕輕沾丁點醬油，真喺鮮味盡出。
北海道牡丹蝦牡丹蝦以往都食過好幾次，不過，今次呢隻算好大隻吓，介紹時，師傅仲話蝦膏煮過仲深番上面，味道帶甘甘哋，再襯上蝦籽，而且蝦身本身色澤光亮紅潤，可謂顏值高，新鮮度已搶晒分。一啖入口，肉質黏黏哋卻又帶有爽身嘅口感，非常好食。
炙燒北海道帆立貝食刺身最緊要喺夠新鮮，咁就已經差唔得去邊。第六道刺身喺炙燒帆立貝，刺身級嘅帆立貝既大粒，又厚身，炙燒後以紫菜捲起嚟食，香脆嘅紫菜搭上軟滑綿綿嘅帆立貝，嗰份嘅感覺，的確令人印象深刻，真想再要多件呀。
中拖羅轉眼間，已嚟到最後一道刺身，即喺刺身中嘅常客中拖羅。中拖羅比赤身油份重啲，但又唔會好似大拖羅咁好多油脂，可以講脂肪適中。跟深海池魚一樣，已搽咗醬油，加咗芥末，睇到油花細緻，油分充足，入口確喺柔嫩味鮮，滲有少少油香。
金目鯛壽司一輪刺身已有好奇妙嘅體驗，跟住落嚟嘅壽司又會喺點？先登場嘅第一道壽司喺金目鯛壽司，師傅三手就捏好壽司飯，飯粒鬆軟唔會死實，卻又唔會一夾就散，並已加入赤醋作調味。金目鯛嘅溫度剛好，入口肉質細膩，味道鮮甜，油脂唔太重。
石垣貝壽司第二道壽司喺用上嚟自沖繩嘅石垣貝，又喺未接觸過嘅食材，嘩！唔喺講笑，隻石垣貝仲郁郁吓，大力拍落去仲會有反應，足見新鮮到不得了。雖然都喺貝，跟北寄貝又好唔同，口感比較軟滑，搽上醬油，提升其鮮味嘅層次。
鰤魚壽司 第三道壽司喺鰤魚壽司，第一次聽鰤魚覺得好陌生，其實，鰤魚就等同油甘嘅大人，咪以為大條咗就會肉質嚡，其實佢算喺頂級食材，而且，好講時令。泛紅嘅魚身無暗啞，食落口感鮮滑細膩，油脂豐腴。
沙甸魚壽司沙甸魚？當然唔喺講罐頭嗰啲，第四道就以沙甸魚做成壽司卷，呢段時間沙甸又喺幾時令，裡面仲捲住一啲鹹菜及幼蔥條，整體口感及味道幾唔錯，沙甸嘅油香都幾突出。
海瞻壽司嚟到最後一件壽司，雖然選材海瞻，但做法可以不一樣。以一個方形小碗盛載，擺上一小花束紫蘇，如藝術品般美。北海道嘅海瞻，向來都喺高質素，外表有光澤，入口果然喺甘香豐腴，綿密細膩，仲有種甘甜嘅餘韻。
碎蔥吞拿魚腩手卷之前食過好幾次「廚師發辦」，臨近尾聲都會有一道手卷，唔知喺咪啲師傅情有獨鍾，都好鍾意用上吞拿魚，並捲成長條形，今次亦喺。將吞拿魚腩刴成蓉，加入蔥碎、一啲漬物，食起嚟有吞拿魚嘅油潤，但就令口感唔會太膩，增添少少清爽感。
廚師特選一品料理 究竟喺咩料理呢？師傅賣關子，到最後一刻先送出嚟，原來喺一道煎靜岡金目鯛。賣相有種清灑脫俗嘅意景，因為以海苔做成「翠綠嘅湖泊」，墊上一件薄豆腐，再放上煎香嘅金目鯛。魚肉非常嫩滑，而且，非常鮮甜，豆腐亦滑溜，充滿豆香。
蟹肉茶碗蒸 加入咗蟹肉，自不然令個茶碗蒸升咗兩級啦，而且，個陶瓷碗亦都好別緻。睇到表面蒸得好平滑，滔一羹試試，蟹肉落得唔少，蛋漿蒸得滑溜無比，兼且甚有蛋香，正呀。
玉子蛋糕突然間，師傅捧咗個玉子蛋糕出嚟，話請我哋試吓，突然令小弟想起有次食「廚房發辦」，又類似喺咁，師傅捧咗條伊達卷出嚟請客人食。雖然，只喺一小件玉子蛋糕，但蛋味勁濃，卻喺好清甜。仲有少少印象，有師傅話過，食壽司，最尾喺蛋，有句號嘅意思添。
時令清湯食日本嘢，佢哋喜歡最尾先嚟飲湯，今次嘅清湯喺舞茸白身魚清湯，而白身魚用上時令嘅真鯛。師傅話先飲個湯，個湯應該喺鰹魚湯，味道比較清，而再食啲舞茸同真鯛，前者頗有香菇味，後者肉質纖維比較細嫩，食起嚟比較清爽。
豆腐雪糕配柚子柿卷直到最後，都仲有驚喜，豆腐雪糕嘅豆腐喺十二分濃郁，口感柔滑富奶香，而伴碟嘅柚子柿卷喺日本農民婆婆嘅手作嘢，口感軟軟腍腍，柿味清甜，真正為今餐有個完美作結。本應，仲包一杯咖啡，但都已經好飽，同埋，今朝早餐、晏晝，都飲咗兩杯，用晒是日嘅配額喇！
全程除咗一位Billy師傅直接招呼之外，另一位侍應嘅招呼亦非常熨貼，如收碗、換碟、添茶（頭段喺玄米茶，尾段喺抹茶，都無問到有無咩特別意思呢），都喺恰到好處；而師傅刀功了得之外，所有刺身、壽司，啲魚生晌溫度上嘅處理，均值得一讚，因為入口時唔會太凍，亦唔會好似擺耐咗攤暖咁。環境舒服，又有少少輕鬆嘅音樂襯托，真叫人樂在其中，渡過咗一個愉快、稱心嘅晚上。
個人評分
味道：9/10
環境：9/10
服務：9/10
抵食：8/10
平均每人消費：HK$1,430
味道：9/10
環境：9/10
服務：9/10
抵食：8/10
平均每人消費：HK$1,430
餐廳資料：
友樂鮨 Yuraku Sushi
美孚美孚新邨蘭秀道5號地鋪
9535 3369
友樂鮨 Yuraku Sushi
美孚美孚新邨蘭秀道5號地鋪
9535 3369
沒有留言:
發佈留言