Food Garden ETC：「花園」餐廳

小弟細個嘅年代，上「花園餐廳」食豉油西餐，算喺高級架喇，但時代變遷，我見「花園餐廳」仲健在，亦有好幾家分店，不過，對好多人嚟講，尤其年輕一輩，都唔喺咩特別嘢，當佢喺高級少少嘅茶記。今晚又過嚟潮店集中地嘅D2 Place搵食，不過，呢一家「花園」餐廳就絕唔喺講緊上述嗰間，而喺環境裝潢得仿如小花園嘅「Food Garden ETC 」，賣嘅食物亦高一個層次。

由門面到室內，都用上富叢林氣息嘅牆紙，餐廳內亦放有不少盆栽，都頗有晌個小「花園」用餐嘅感覺。如果，天花再掛啲盆栽，或砌啲假花、假草，就更富大自然感。

整體環境都幾闊落，配以木枱皮椅，加上柔和嘅燈效，讓人心情輕易放鬆。再者，我哋被安排坐近靠商場通道嘅一排位，而餐廳位處通道尾，行過嘅人極少，但感覺就比坐入面啲位開揚，側邊又擺咗好多盆栽，感覺喺寫意好多。

餐牌好簡約，打開為一大版，一面喺食物，另一面就喺飲品。食物方面，有共享（小食）、沙律、湯品、意粉、主菜、手工薄餅及甜品。

飲品呢？都多選擇，咖啡、茶品、梳打特飲、汽水、手工啤、餐酒、烈酒。叫做麻雀雖小，五臟俱全。唯可惜只有散點，無啲套餐組合。

煎銀雪魚柳配海鹽焗雜椒 $268

老婆非常喜歡食銀雪魚，尤其喺日式嘅西京燒，簡直喺鐵粉，反而，西式煮法佢就少食，今次見到主菜類中有銀雪魚，當然被「欽點」咗啦。件銀雪魚厚切大大件，再加上鹽焗荷蘭彩椒，色彩斑斕好睇。

啲銀雪魚好嫩滑，極富油香，外皮又非常脆口，沾上自家製嘅他他醬，魚味更鮮、更突出。而啲彩椒口感較本地嘅腍身、多汁、清甜，此外，仲有啲秋葵、扒蕃茄、沙律菜，淋上濃厚嘅黑醋，真喺用料無欺場。

松露醬雜菌芝士手工薄餅 $128

餐牌標示為手工薄餅，喺我哋揀嚟試試嘅原因之一，約10吋大細，都幾大份吓。睇餅面，鋪滿好多雜菌，而且擺得平均，唔會聚埋一邊，而且，芝士亦落得無手緊，所以焗到個面面金黃，睇到點點黑點，就知松露醬亦落得夠狼，其實，送到嚟都聞到陣陣松露香。

拎起一件，即時拉起絲絲芝士，喺誘惑嘅表徵，餅底屬薄批，但口感又未到「餅乾底」，不過，都帶少少脆口，批身軟熟；芝士軟綿綿又香，配合埋啲松露醬，真喺無加雜菌，就咁淨食都覺得正呀！兩個人食一份薄餅，都可講啱啱好。

精選蛋糕 $38

其實食完個薄餅都幾包吓，不過，有少少意猶未盡，追加多一客甜品，最平喺精選蛋糕，有美國芝士餅或意大利芝士餅可揀，揀咗後者睇睇師傅手勢。單睇外表似模似樣，餅面灑滿唂咕粉，入口陣朱古力味好濃，帶點甘苦，下面嘅馬卡風芝士打得柔滑，但有別傳統，無用手指餅之餘，只以薄薄一層海綿蛋糕做底，更喺無酒味版本，小弟就較喜歡有酒嘅版本啫！

雖然只喺試咗店家兩個主食及一客甜品，幾樣嘢都甚有質素，服務又幾熨貼，兩位較年輕嘅侍應，亦好有禮貌，食完又唔會催你走，所以，用餐都好寫意。

個人評分
味道：9 /10
環境：8 /10
服務：8 /10
抵食：8 /10
平均每人消費：HK$245

餐廳資料：
Food Garden ETC
荔枝角長義街9號D2 Place一期3樓303-304號舖
2868 9155