良日雞蛋糕專門店 onefineday：閒情「日」致下午茶

上次同個死佬晌佐敦食完越南粉，大家講開食，又知我咩都鍾意試吓，就介紹我晌佢屋企附近有家新開主打賣雞蛋糕嘅專門店，我話雞蛋糕有咩特別呀，好多港式麵包鋪都有，佢話唔喺嗰啲呀，喺韓式嗰啲呀，大大件，中間夾咗唔同餡料，新鮮即點即做，聽起嚟又幾吸引。唯一喺唔多近地鐵站，卒之等到今日去開睇戲，真喺有啲閒情逸致，就順道拜訪一下。果然位置有少少「隱世」，其實，只喺遠少少，識路嘅10分鐘內都行到去，店面一派和風木系，有種小清新風格。

款式方面，一共有5款雞蛋糕：原味（雞蛋）、芋泥麻糬、雙重芝士蛋、香蕉朱古力及芝士煙肉蛋，定價$13-$20，都唔算貴喎。此外，仲兼營吓啲雞蛋仔同多款特色小食，一旁嘅雪櫃仲提供多款凍飲。雞蛋糕不停製作，故此，晌門外已聞到陣陣雞蛋香味！

雖然小店一間，但個包裝盒都見到啲心思，兩邊有少少透氣位，唔會因倒汗水整濕個雞蛋糕，而且，店員會晌盒邊根據蛋糕嘅位置寫上蛋糕口味，因為除香蕉朱古力喺深啡色之外，全部外觀都一模一樣。

原味（雞蛋）口味 $13

雖然叫原味，但唔喺得個蛋糕，裡面有成隻蛋，一陣切開你就知，每個雞蛋糕大概喺一個成人手掌般呎吋。我見有啲人寫蛋黃有流心嘅效果，我呢個就無喇，但整體有好香蛋味，蛋糕好軟綿，大大隻蛋黃，好綿密。

芝士煙肉蛋口味 $19

試完原味，再嚟試試個鹹味，今次呢個做得真喺一流，見到蛋黃有流心嘅效果，配合埋芝士同煙肉，可以講喺完美組合，集鹹鮮香於一身，咪睇佢手掌大小，食完一個都有少少飽肚感。

香蕉朱古力口味 $20

甜品中，香蕉配朱古力一向都好夾，所以，對呢一款口味喺有期望，實際上，亦無失望，半溶嘅朱古力，夾着香甜嘅香蕉肉，真喺好食，而一身深啡色嘅雞蛋糕明顯加入埋朱古力粉去做，自然更有朱古力香。

原味、鹹嘅、甜嘅都試勻，可以講各具特色，但整體而言，都好對辦。所以話呢，就算一件簡單嘅雞蛋糕，只要肯花啲心思，一樣製作出好嘅出品。

個人評分
味道：8/10
環境：7/10
服務：8/10
抵食：8/10
平均每人消費：HK$17

餐廳資料：
良日雞蛋糕專門店 onefineday
葵涌榮芳路65號美豐大廈地下11號舖
6406 8162